Read Poumei Naga MAIPEI PHOUYU 5 Bible Online

MAIPEI PHOUYU 5 - Poumei Naga bible

MAIPEI PHOUYU 5

¹MAPAO nou Moses hi paoe,

²“Israel maisou hisü kharochi peio, süolouzü fühao hi mai talinoua loukhaora soulouzü moa sheemoyu dzü küa bulouzü, moa thaiphao deiwua sheemoyu mai hrülaiye sü vakou hupa khaio.

³Naanou hinou sheemoyu mai hrülaiye sü vakou hulaio, sükulouzü puletao vei fühao, Enou avei maitao hi buyu buh hai souzhai laimoe.”

⁴Israel maitao nou paochi züa sheemoyu mai veishi puletao vei fühao hinou hulaiwure.

⁵MAPAO nou Moses hi chikha hai Israel mai hi paopeio tea nou peie. Mai talinou MAPAO ye louche moyu hinou mai tali hi soumah louzü,

⁷puhnou puhvei mah sü paopa loulai ae paozho hai khache peilai, süpei hinou puhnou zha kaihli pei hinou zha kai hai thoupuloua nou puhnou soumah khaitouyu maina hisü peilai.

⁸Ana mai süna hai thaita louzü, ae puhvei kityarai mai ali-a paoh khapeiyu na hai pore mai halouzü, süna hai MAPAO vei napao maitaoye donou peiwulai. Paoh-zho khayu pei hinou puhye soushee loure vei naanou soure donou nghitsü ali hai pove peilai.

⁹Israel mainou veishoyu posheela peiyu teitei hai puhnou pove peiyu napao maivei soulai.

¹⁰Maikhe mainou poa sheela peiyu natao hai napao vei soulai.

¹¹MAPAO nou Moses hi haibüa Israel maiye panou soupfülo tea paodou peie. Hakinou mai ali nou puh kipfü hai puh hi chilee more ae mai kukhe aliye sabu sazü phare tea lechü louzü, ana vah ashi souyu sü mai lia ngaolou more toulouzü, ae maipfü nou khei-a nou poku louzü, moyuma maipfü nou vah ashi soumoyuma maipuo nou puh pei hi lechüyu bulouzü,

¹⁵puhnou puhvei chapfü hai napao hi savelai, ae puhnou posheela peire donou barli sou sühcho ali hai pove peilai, ana sühi theadzü ae poukai nüvei hai thouhrülai moe, daiolouzü hai nasü maipuo nou maipfü hi lechüa acheche nasü süloure donou posheela peiyu baie.

¹⁶Napao nou naotupai sü posheelabu nghoujü hi sakou laloulai.

¹⁷Napao nou sheeyu dzü daotu poloua nailee ali hisü lathou loulai ae MAPAO nou buyu Sahpao hinou deinai daotuli poloua dzü hisü thouhrü loulai.

¹⁸Süthaisü napao nou naotupai vei peishu hai souphopa peiwulai, ae honapai bah hisü posheela peiyu sou nasü thoupeilai. Napao nou puh bah hinou chaa peiyu dzü khayu nasü poa bulai.

¹⁹Süthaisü napao nou honapaiye panou haibüa chaachou soulai: “Nenou khulou vah ashi soumo louzü, chaa pfüyu dzü khayu hai nanou neye soushilai moe.

²⁰Ana nenou khulou vah ashi souwure toulouzü,

²¹MAPAO panou nevei zhih sü maikhe mai hi chaa southeo, ae nevei tei-mou sü panou kita theo, ae ne pou sü panou maapa theo.

²²Dzü hai nanou ne pou hi koulouyu phaki, hai nanou nevei pou sü pfüa maapalai ae nevei tei-mou sü panou ki talai.” Naotupai nou haibüa paolai, “E-a aetouwe; MAPAO panou sübüa soupeio.”

²³Süthaisü napao nou chaa sütao hai larü ali hi rüthouloua sünasü khayu dzü hisü khüthou loulai.

²⁴Khayu dzü nasü honapai nou kethou loure toulouzü, pfüa sousho louveiyu nasü naotupai nanou kümo jünou,

²⁵napao nou naotupai bah hinou posheela peikhai touyu sou nasü poloua sünasü MAPAO hi posheela peilai.

²⁶Süthaisü napao nou posheela khaitouyu sou hai bahzü ali poa licho louyu vei posheela soua meidei peilai, süthai sünou naotupaiye panou dzü sü kelai.

²⁷Hakinou honapai nou khulou vah ashi soulouzü, honapai nou chaachou soua dzü kelouyu nasü nou pfüa sousho palai, ae puh pou hai maapalai, alia puhvei tei-mou hai kita-a bailai. Honapai vei zhih hai maikhe maiye donou chaa ali soulai.

²⁸Ana honapai nou mah soumo louzü, veahoyu hai puh hi velai moe ae honapai nou nahmai hrüloua bailai.

²⁹Maipuo nou puh kipfüye ngaorai loua honapai hai khulou vah ashi souyu phare tea lechü louzü, paokhai touyu chikha haibüa soulai. naotupaiye save posheelabu nghoujü hinou laloua napao nou naanou haitao hai soulai.

³¹Maipuo hiolouzü mah hai bulai moe, ana naotupai nou mah soulouzü, honapai hai veahoyu sü ngaolai.