Read Poumei Naga MAIPEI PHOUYU 8 Bible Online

MAIPEI PHOUYU 8 - Poumei Naga bible

MAIPEI PHOUYU 8

¹MAPAO nou Moses hi paoe,

²“Aaron hi paopeio, süolouzü puhnou meivabvü anaitao hai taoloua meivabvü khaibu hi khaiyu phaki, panou nghoujülo vapoa koure donou khailo.”

³Aaron nou paochi züa meivabvütao hai nghoujülo rei-a meivabvü khaibu hisü khaipeie.

⁴MAPAO nou Moses hi paopeiyu zhai büa meivabvü khaibu nahai pei hinou poa teihi koute hai sana veitya nou souloue.

⁵MAPAO nou Moses hi paoe,

⁶“Levi maitaoye Israel mai hrohinou poku paloua puletaoye soushee peio.

⁷Puletaoye haibüa soushee peio: Soushee khaitouyu dzü nou puletaoye kavu peio, ae puletao vei pfüphao veishi hai panou mai sailaio alia puletao vei sabanü khesü dzü shaowua panou lahkuku soushee-a bulo.

⁸Süthaisü puletaoye panou chode ali ae theadzü thouhrü khaitouyu sou hai thoudzü posheela peire donou pa polo; ae nenou chode ali nahai mah vei posheelare donou polo.

⁹Süthaisü Israel maisou hai kupoa vejülo alia Levi maitao hai Enou buyu Sahpao nghoujü hisü sakou lalo.

¹⁰Israel mainou Levi maitao pei hisü bah deiloulai,

¹¹süthaisü Aaron nou Levi maitaoye sü Israel maitao hrohinou popa MAPAO hi posheela peilai, sübüa puletaoye panou avei kuvah hai soulai.

¹²Levi maitao nou süthai hai chode ahai pei hi bah deiloulai; chode ali nahai mah vei posheela soua peilai, ae ali nanou meideia posheela peilai. Haizhai büa Levi maitaoye soushee peiyu naanou hai soulai.

¹³“Levi maitaoye soushee peiwua puletaoye panou Aaron ae puh nahpoutu maitaoye baboua vah soulai.

¹⁴Haibüa Levi maiye sü Israel maitao hrohinou poku paloua panou avei mai soulai.

¹⁵Nenou Levi maitaoye soushee loua poa peithouyu thai, puletao hai Sahpao hi talou vah soutalai.

¹⁶Israel maivei nahpoutu naraio maitao thaosü Enou Levi maitao hai avei soua khaloure, puletao hai avei mai soure.

¹⁷Ejipt hinou nah narai mai hrülai hai Enou southa khaitouyu teile hinou, Israel mai kikha hinou nahpoutu naraio hrülai ae kikhaorü toukou raikayutao hai Enou soushee peiwure.

¹⁸Chuo Enou Israel maivei nahpoutu naraio hrülai thaosü Levi maiye nou poloure.

¹⁹Israel mai hrülai hrohinou Levi maiye panou Israel maitao thaosou puletao vei mahmo khailoure vei posheela peire vah hai panou Sahpao hinou soulai tea Enou puletaoye Aaron ae puh nahpoutu maitao hi peiwure, sübüa Israel mainou rathoyu Sahpao hi tanghi kouyu phaki, puletao hisü panou rahta-rahvu velai moe.”

²⁰MAPAO nou Moses hi kharochi peikhai touyu thaifüa Moses, Aaron ae Israel mai hrülai nou Levi maiye sousheeloua popeiwure.

²¹Levi maitao hai linaonao nou soushee loure ae puletao vei sabanü hai dzü shaoloure ae Aaron nou puletaoye sü sousheeloua nou poa MAPAO hi sheela peiwure. Aaron nou puletaoye sousheeyu vei naanou soua posheela peie.

²²MAPAO nou Moses hi Levi maitao donou kharochi peikhai touyu teitei hai Israel mainou soupeie. Südonou Levi maitao hai Aaron ae puh nahpoutu maitao vei khakhe hinou Sahpao hisü talou vah soutare.

²³MAPAO nou Moses hi paoe,

²⁴“Po kaingou payu Levi mai hrülai hai Enou buyu Sahpao hinou vah hai soulai;

²⁵ae po raingou pare toulouzü puletao hai vah soumoa soyu ngaoloulai.

²⁶Süthai hai neletao nou puletao vei thaihou jürai maivei vah hai soukha-a bailai, ana puletao hai lah puletao vei vah sü soulai moe, haizhai büa neletao nou Levi maiye vah hai peilai.”