Read Poumei Naga MIKAH 5 Bible Online

MIKAH 5 - Poumei Naga bible

MIKAH 5

¹Jerusalem hi maitaore, neletao vei reihmaitao sü soudalo. Etaoye mainou haoloure! Puletao nou Israel maivei peikho maitaoye sü dulai!

²MAPAO nou paoe, “Oh Bethlehem Ephrathah, ne hai Judah hinou taikayu nuh ali baie, ana ne vanou Enou Israel maiye khopeire mai ali vepeilai, puhvei kikhamai hai daoh puopaoh maivei khaphao hinou vewe.”

³Südonou naotupai nou nah navere teile hi koumo koute sü MAPAO nou puhvei maiye sü ngaobayu maitao bah hi thoupeiwulai. Süthai sünou vakou nou hrüa buyu Israel maitao hai lah puletao vei thaihou jürai sü phouloua tave zholoulai.

⁴Puh velouzü, puhnou puhvei maitaoye sü MAPAO vei khouko sünou khasa-a hrülai, ae puhvei Ramai MAPAO zhih hinou kaozü soua kiko peilai. Puhvei maitao nou kaozhou ashi lia ha-a hrülai, daiolouzü teideiphao teitei nou puhvei aduso nasü süloulai,

⁵ae puhnou kaonayu nasü pove peilai. Assaria mainou Etao vei teidei hi soureih hulou Etao vei reihkhaobuh hai souphe soupho louzü, Etao vei khoukayu süthai-apei maitaoye sü panou puletaoye dulai.

⁶Puletao nou Assaria maivei teidei sü khoche nou poa veiloulai ae Nimrod teidei sü khoche nou zhapoa khaloulai. Puletao nou Etao vei teidei hi reih hulouyu phaki, puletao nou Etaoye Assaria mai hinou khailupa peilai.

⁷Shokhai toua buyu Israel maitao hai tyahrütao hrohinou MAPAO nou seive peiyu vidzü ae teirü kou shopeiyu pounghou bülai. Puletao nou Ramai ye louche-a bailai, maiye louchepu khailai moe.

⁸Shokhai toua buyu Israel maitao sü soukhaonatao hrohinou souveo ali bülai: zhaotu hrohinou talou nülouyu nasü paide sasa peiyu bülai— ae halinoua khailupa peilou hoyu bülai.

⁹Israel mai nou ngaobayu maitao jünou veiloulai ae puletaoye sü souhakhai toulai.

¹⁰MAPAO nou paoe, “Süzhou teithe Enou neletao vei rhei ae rheiluki khesü potawulai.

¹¹Enou neletao vei teidei hi nuhdu khesü souhawulai, ae reihkhaobu khesü souphe soupholaiwulai.

¹²Enou neletao vei teingumai sü souhawulai ae panou neletao hisü keingumai bupulai moe.

¹³Enou neletao vei bashara ae chuh shokhai touyu khesü soushilai; neletaoye panou neletao lah soukhai touyu na khesü thopulai moe.

¹⁴Neletao vei teidei hi buyu Asherah rapfüpai vei zhurai soukhai touyu khesü Enou souhawulai.

¹⁵Alia avei lekha rarou hinou achi zübayu tyahrü teitei hisü Enou khüngu phouwulai.”