Read Poumei Naga MIKAH 6 Bible Online

MIKAH 6 - Poumei Naga bible

MIKAH 6

¹MAPAO nou Israel mai hi chikuyu sü keilo. Oh MAPAO, tashuloua nou nenou paolaiyu chi sü paopei khaio; deichi deirao khesü panou ne chi sü kei khaio.

²Deichi taore, MAPAO nou paodouyu chi sü keikhaio! MAPAO nou puhvei maitao hi chikure sü bure, puhnou Israel mai pei hi züvei-a mah paodure sü bure.

³MAPAO nou paoe, “Oh avei maitaore, Enou neletao hi daisou peire? Enou neletaoye kabüa souveayu sü buge? Eye chila peio!

⁴Enou neletaoye sü Ejipt teidei hinou sapa peie; Enou neletaoye maivei qila soua buyu hinou vupa peie; Enou neletaoye panou süthaisa-a tapeire donou Moses, Aaron ae Mariam ye seive peie.

⁵Oh avei maitaore, Moab hi Veo Balak nou neletao hi shodo ashi soupeilai tea tsüchoda-a buyu ae Beor nahpoutu Balaam nou puh hi chila peiyu sü lichokhaio. Akasia fühao hinou Gilgal hi kouyu phaki daidai vepa-e touyu khesü lichokhaio. Hai khesü licho louyu phaki neletaoye MAPAO nou khailupa peire donou soua baie touyu hai neletao nou süloulai.”

⁶Enou rakiva buyu Ramai tholai tea taveyu phaki MAPAO ye dai nou pove peilai? Enou meidei-a posheela peire donou veikayu chotoutu nou puh hi pove peilaiho?

⁷Zhaotu thethe nou MAPAO hi pove peilouzü, moyuma oliv theadzü nou reidzü küyu büa pove peilouzü puhnou jüpalai mosa? Enou soumah khaitouyu donou avei nah naraio sü puh hi posheela peilaiho?

⁸Moe, MAPAO nou Etao hisü kabüyu paityanou veiwe touyu sü paopeiwure. MAPAO nou Etao hinou jüpayu louzü: kaozü souyu, tobai soumoa leshiyu nasü soungao peiyu, ae tainoutou soua Etao Ramai ye koa hrüyu hai nou jüpa-a baie.

⁹MAPAO ye piyu sü tsüvei-e. Puhnou nuhdu nasü kue, “Nuhdu hinou tave jüa buyu maitaore, keinoulo!

¹⁰Mai ashimai ki hisü tsüle sheemoyu hinou nangi khesü pojü khaitoue. Puletao nou da-a nou sühdoukhao sü powe, süsü Enou ngaora-e.

¹¹Kaomoyu sühdoukhao ae dourai poyu maitaoye sü kabüa Enou puletao vei mah sü khaipei khailaige?

¹²Neletao vei toungiyu maitao hai zhaipou shi-e, ae neletao mai hrülai nou dahrührüa baie.

¹³Südonou Enou neletaoye soushi talaire, ae neletao vei mah vanou neletaoye sü panou haka talaire.

¹⁴Neletao nou toulai, ana rukhalai moe — neletao hai houzüa bukoute-a bailai. Neletao nou nakhesü poa talai, ana sükhesü pojü khailoulai moe; neletao nou hana taralia pokhai touyu khesü Enou soureih souyu hinou pa soushi souhawu bailai.

¹⁵Neletao nou taimou hai thoulai, ana chachi loulai moe; neletao nou theadzü sü souloulai, ana neletao vei soulai moe. Neletao nou darkha zhaoh sü southoulai, ana neletao nou kelai moe.

¹⁶Daiolouzü neletao nou Veo Omri ae puh nahpoutu Ahab kihikha mainou vah ashi souyu sü thaifüa soutare. Neletao nou puletao vei zhaihrü ashi nasü soupfü tare, südonou Enou neletao hisü hakatayu sü pove peilai, ae mai hrülai nou neletao ye sü ngaoralai.”