Read Poumei Naga MIKAH 7 Bible Online

MIKAH 7 - Poumei Naga bible

MIKAH 7

¹E hai daizhou koute veasa! Hrou-a laiyu mai ali nou rashibe hi ae darkhabe hi rashithou aliro ngaolou hoa laiyu mai ali büre. Darkha shithou ae doushi thou sü haikhai touloure.

²Mai aveih mai hai hazei toure, Ramai hi chilee checheyu mai aliro hare. Mai hrülai nou maiye soushi peire donou kaozhou veiyu nasü phoua baire. Puletao hai lahvei maiye soushi peia bure.

³Puletao mai hrülai nou vah ashi souyu hiolouzü souvei shore. Peikho maitao ae chilou kupeiyu maitao nou seihla sü khore. Aduso maitao sünou puletao vei jüpa khesü paopa peiwe, südonou puletao nou koa ashi sünasü soutare.

⁴Puletao hrohi mai veikayu ae le sheekayu maitao-a komoyu shube poube ali büa baire. Puletaoye kho-apei maitao, rachipaolayu maitao nou paopi peiyu büa puletaoye Ramai nou tudee laiyu teithe sü velaire. Chuo puletao hai büraroua bure.

⁵Nevei kinapa maiye loucheso moa nevei samai khamaiye lüloucheso. Nevei maipfü koute hia nevei chipao sü leikei-a paolo.

⁶Daiolouzü chu teile hai nahpoutu nou puo ye sü tsükhou more, nah naotupai nou pfü ye sü dure, ae nahleyu naotutao nou lah vei nai-paoh ye sü züvei-a baire; mai ali vei ngaobamai hai lah vei kihikhamai baire.

⁷Ana Ewo louzü MAPAO vei vu kho-a bua bailai; Enou Eye khailupa apeio Ramai vei vureih-a bulai. Avei Ramai nou Eye keinou peilai.

⁸Etaoye ngaobayu maitao nou Etaoye ngaophou moa jünüre qo lia hae. Etao hai kaodu tare, ana Etao nou tashupu loulai. Etao hai chuo azhi hi bue, ana MAPAO nou Etaoye ava sü peilai.

⁹MAPAO vei lekha rarou ae chaa nasü Etao nou teile daotuli hai pfüa bulaire, daiolouzü Etao nou mah souwure. Ana akhai hiolouzü puhnou Etaoye vupa peilai, ae Etao hi kaozü moyu nasü souzü peilai. Puhnou Etaoye ava hi popa peilai; Puhnou Etaoye khailupa peiyu nasü Etao nou ngaolai.

¹⁰Süthaisü Etaoye ngaobayu maitao nou haisü ngaolai, “Neletao vei Ramai MAPAO sü daiki bue?” tea konüyu maitao sü hraongu ngaolai. Puletao nou kaodu tayu sü Etao nou ngaolai; ae puletaoye sü mainou taidei poa ta-a bailai.

¹¹Jerusalem hi maitaore, nuhdu vei kivo sü soushupure teile sü velaire. Süzhou sü neletao vei teidei hai soudu sousopu peilai.

¹²Neletao vei maikhe mai sü buliki hinou veloulai — teinghei palova buyu Assaria hinou, khelova buyu Ejipt hinou, Euphratis hilo vanou, zaidu hilo nou ae deichitao hinou veloulai.

¹³Ana teidei sühi hrüyu maitao nou mai ashi vanou teidei sü radeiki vita-a bailai.

¹⁴MAPAO, nenou dopa louyu maitao vei zhaokhopu sü nenou soupeio. Puletao nou vaohro hinou hrüa buyuma, puletao vei pehao hisü teidei aveih sü bue. Raichoki büa puletaoye panou füdei aveih Bashan ae Gilead hinou taho panou hrüo.

¹⁵MAPAO, nenou raichoki Ejipt hinou khupayu vah haso soupeiyu büa khupayu vah sü Etao hi soupu peio.

¹⁶Tyahrütao nou khouko bushoyuma haisü ngaoloua puletao hai hrao-a bailai. Puletao nou bah nou mü holoua bailai ae noubi kaloua bailai.

¹⁷Puletao nou deiphi hinou ngaotayu khaona büa ngaota-a bailai; puletao nou Etao Ramai MAPAO ye ngaopi-a puletao vei reihkhaobu hinou ngaopoa tapalai. Puletao nou ngaopi-a Etao Ramai MAPAO hisü veloulai.

¹⁸Oh MAPAOwo, neye raiyu ramai ali-a ha-e; shokhai toua buyu nevei maitao vei mah sü nenou khaipeie. Ne sü teisa nou rarou koute moe, ana nevei maitao pei hi nevei tobai soumoa zhuvea leshi peiyu nasü nenou jüpae.

¹⁹Ne nou Etao pei hisü zhuveapu peilai. Ne nou Etao vei mah khesü phi nou taicha peilai ae zai khehi laithou peilai!

²⁰Nenou raichoki Etao vei puopaoh Abraham ae Jakob hi paohpei khaitouyu büa nevei maitao hisü nevei tobai soumoa leshi peiyu nasü ngaopeilai.