Read Poumei Naga HABAKKUK 1 Bible Online

HABAKKUK 1 - Poumei Naga bible

HABAKKUK 1

¹Ramai nou paosüngao peiyu rachipaolawo Habakkuk nou zho ngaoyu haitao-e.

²Oh MAPAO, E kasho-a ne hinou kra-a soukha kholai, alia nenou keipei moa bulaige? Mokhai-a veahore tea ne hi pao-a buyuma ne khaipei moa bulaiwu?

³Ne daisounou Eye panou kaozü moyu alia veayu khaikho nou ngao-a bue? Soushi khaitouyu alia taidayu khaikho nou anghoujü bubaire, züveiyu alia taidayu nou buliki phoutao-a baire.

⁴Chikha khesü khouko hare, alia kaozü hai-a bumore. Mai ashimai nou cheche maiye sü haoloure, südonou kaozü nasü porei laiwu baire.

⁵Süthaisü MAPAO nou puh maitao hi paoe, “Ne pehao hi hrüa buyu tyahrütao ye zhukhaio, alia sütao nenou ngaoloua khupalai. Enou nevei teile hinou hali soungaolai alia süsü paolouzü nenou louche laimoe.

⁶Enou zhaipou shiyu alia sashi shoyu Babilon maiye panou khouko pfüloua puletao vei moyu teidei kukhe taoye shaoloulai.

⁷Ngaopiyu alia zhaishiyu sü puletao hi bue, kharochi alia khekai sü lah puletao bah hi bubaie.

⁸“Puletao vei rheitao hai shirakhao jünou tuveih hie, hrouyu nüsei jünoua khusho hie. Rheipfüyu mainou khuveishoa hukouwe. Puletao vei rhei pfüyu maitao hai doushoyu buh hinou vewe, lüche linou ha nütoulai busoua puletao sü zhaovewe.

⁹“Puletao hrülai sü taidare donou ve-e, mai hrülai nou puletao laire toukhai-e ngaopi shoe. Puletao nou maiye nükhai touyu hai vonai zhoure.

¹⁰Puletao nou vemaiye konüwe, alia nuh khoa buyu maotaoye sü poa panü-ralya souwe. Rokhu bomü nou puletaoye nulou hore - puletao nou dei heloulou-a talou nülou baie.

¹¹Süthaisü puletao nou teikhai büa tabaiwe, puletao vei khouko sünou ramai soua baie.”

¹²Oh MAPAO, avei Ramai, avei Masheeo, Ne sü teisa nou hria buyu namowu? Oh MAPAO, nenou Babilon maiye panou Eye souveare donou soudusho peiwure; Oh chuhduo, nenou peletaoye panou Etaoye tudeere donou soushu peiwure.

¹³Ne nghithou hai sheeleyu donou shiyu sü zhuthou louhoe; alia kaozü moyu hisü zhukhai louhoe. Ne daisounou maishi maiye zhua buwe, alia daisounou puletao jünou checheyu maiye southa-souha buki ngasoua buwe?

¹⁴Ne daisounou mai haitaoye khopeire mai hayu zai hi kha büa ae dei hi ngao-a-laiyu khaona touli büa panou buge?

¹⁵Babilon mainou puletaoye sü kha büa khasü rainou süthai palou baire, puhnou peletaoye sü besah nou bekhai loure, sübüa peletao nou sa-a shusou-a bure.

¹⁶Südonou peletao nou puletao vei besah ye sü posheelawe alia kainüveih nou poa meidei-a thowe, daisounou tiyuo puletao vei besah na vanou puletao hai vasho-a toushoyu sü ngaolouwe.

¹⁷Puletaoye pa teisa nou besah polaiwu, alia zhuveayu lia ha-a panou tyahrütao ye southa laiwu?