Read Poumei Naga HABAKKUK 2 Bible Online

HABAKKUK 2 - Poumei Naga bible

HABAKKUK 2

¹Enou kuyu buh hi taopaloua MAPAO nou ahi daichi paolaisa alia ahi daitea chila peilaisa touyu kho-a zhulai-e.

²MAPAO nou ahi haibüa chila peie: “Sheesha teanou Enou ne hi ngaopeiyu nasü naikü phaohi rükhailouwo, süsü panou maiye ngaoha loua choloure donoue.

³Süna hai rükhailo, daisounou tiyuwo, cheche-a vepare teile sü koumo hie. Ana teile sü thashoa laire, Enou ne hi ngaopeiyu nasü vepa vuzülai. Sünasü sososoua veyu büa bailai, ana süsü kholo; sünasü vepa vuzülai, ponapu khailai moe.

⁴Sünavei chipao sü haire: ‘Ashi vah soua laiyu maitao hai hrilai moe, ana checheyu maisü puletao vei lü vanou hriloulai.’ ”

⁵Kini haio louche loushie; khaophu souyu mainou hrüsowu moe, puletao nou adu tounüyu haio athai büa rukhayu hae. Südonou puletao nou tyahrü veishi alia mai hrülaiye lah puletao vei soua pojü khaitouwe.

⁶Sübüyu maiye sü konüa alia haibüa poa panü-ralya soulai mowu: “Lah vei moyu natao pojü khaitouyu hai daizhou veasarou! Daizhou koute neletao lahye donou maivei natao pojü khailaige?”

⁷Tsü-khai moa bukinou nevei paozho pfüyu maitao lahshu laimowu? Puletao nou neye soupi laimowu? Süthaisü neye puletao nou nüpoa tabailai.

⁸Nenou tyahrü taoliye soushi peiyu donou, sühi hri-a buyu maitao nou ne-a soushiwulai, daiolouzü nenou deiphao hi alia nuhdutao hi hrüa buyu mai hrülaiye sü souveawure alia taitha-dathawure.

⁹Hashi hinou ngaoloua soushi louhore teanou deitaoh hinou pa phe soukhai tiyu mai hai daizhou vealaisa!

¹⁰Nenou maiye soushi-souhayu donou lah ne ki hi hrao pove loua baie, alia ne lah ne hrü soujü lou-a baie.

¹¹Bouvo vanou chuhtao nou rapalai, alia dei hi khukhai tiyu süütao nou chila peilai.

¹²Maiye taitha-dathayu alia kaozü moyu vah-sovei hinou poa nuhdu soushu khaitiyu neletao hai daizhou vealaisa!

¹³Mainou terou-a vah soukhai tiyu sü panou mei vitayu, alia tyahrütao nou halia moyu donou veayu hai Khoukhoulai MAPAO hinou mowu?

¹⁴Ana deiphao teitei hi MAPAO vei aduso alia kathe vei tsü hai zai hi dzünou phoutao-a buyu büa bulai.

¹⁵Maivei hrao zhulai tea puh nou rarouyu pai hinou puh kinapaye zhaoh peizhiyu mai nasü daizhou koute vealaisa!

¹⁶Neye tsükhouyu thao nasü hraongu nou peilai. Ne lah kelou-a lulai! MAPAO vei bah zhoulo nou pai nasü poa ne hi peilai, alia kathe vei thao nasü hraongu ngaoyu nou peilai.

¹⁷Nenou Lebanon hi poushisho-a souyu donou ne-a souhawulai. Nenou soukhaorü ye southayu vanou sütao nou neye soupilai, daiolouzü nenou deiphao hi buyu mai ae nuhdutao hi hrüa buyu maiye southayu donou ne hi-a haibüa vepalai.

¹⁸Mainou souyu bashara ae da-a nou dou-apei maitaoye thoyu hai dai viyu bue? Daiolouzü puletao hai halia soupei louhoyu ae raolou hoyu bashara, lah nou soukhai tiyu nasü louchewe.

¹⁹Süünou souyu na ali hi “Kushulo” alia la hayu chuh liye “Tashulo” teanou paoyu mai hai daizhou koute vealaisa! Zhukhaio, süna hai sana ae shahu nou phaohi nyakhai toubaie, sühi hrirai hae.

²⁰Ana MAPAOwo louzü puhvei sheeyu rathoki hinou bue, deiphao mai hrülai Puh nghojü hi ngasou-a buwo.