Read Poumei Naga HABAKKUK 3 Bible Online

HABAKKUK 3 - Poumei Naga bible

HABAKKUK 3

¹Rachi paolawo Habakkuk nou veachi paoyu sü haitaoe:

²Oh MAPAO, ne daisou-e tiyu Enou süre, alia nevei vahso veitao hai sülou-a ngaopi shore. Nevei vah sütao hai Etao teile hi-a soupu peilai-o, sütao hai panou Eh vei teile hia sülouo; Nenou rarou-a lekha bukia zhuvea peikhaio.

³Teman hinou Ramai hai velai, Sheeyu Puh hai Paran deichi hinou velai. Puhvei kathe hai nou rakiva hopfüa bue, alia deiphao teitei hai Puhye paoshoyu nou phoutao-a bue.

⁴Puhvei ava hai teinghi büe; Puh bah hinou ava nasü pawe, ae sühinou puhvei khouko sü kukhai toue.

⁵Sounou hai Puh nghoujü nou rai-a vewe, alia rahtayu hai Puhye thaifüa vewe.

⁶Puhnou chaoyu phaki deiphao hai lüa baiwe; Puhnou zhuyu phaki tyahrütao hai pingu-a baiwe. Puhnou daohraiki tayu ludutao hisü lümoa buyu deichi dutao hai pota baire, alia teisa nou buyu deitao khesü leitare.

⁷Enou Kushan hi sahpaotao hai vea buyu ngaowe; Media mai teidei hi sahpao hrakhai tou-a buyu sahtao sü pheirürüa buyu ngaowe.

⁸Oh MAPAO, reidzü nou nevei rarou sourevu? Reitao nou nevei lekha soupadou? Molouzü nenou vamoyu hai zai pei hiwu? Ne sü teihao phao vanou tawe; teikhai teirü nou nevei rheiluki souwe, nenou nevei maitao hi veilouyu nasü pove peie.

⁹Nenou voulou sü paipa loure, ae voulou hisü loushu khailoure. Nenou deiphao sü reidzü nou pa souphewure.

¹⁰Deichitao nou neye ngaolouyu phaki, pinguwe; raki vanou teirü sü rükou baiwe; zai thou hinou zaidzü khüpa baiwe.

¹¹Nevei loushu kapayu phaki ae nevei heung reiyu ngaolou-a khouh-teinghi-a lah buh hinou chao baide.

¹²Rarou-lekha nou pfüa Ne deiphao ta sühaowe; Nevei rarou hinou tyahrütao ye taikya khaiwure.

¹³Ne maitao ye khailu loure donou Ne vewe. Nenou dopa khaitouyu maitaoye khailu loure donou ve-e. Vah ashi souyu hi süthai-apei maiye southa peie, phi hinou poa pei hi khete sü soushi peiwure, alia puletaoye thaipfüyu mai hrülaiye sü souha peiwure.

¹⁴Soureih souyu mainou Etaoye teikhai raroshi büa soupholai teanou veyu phaki, alia veahoyu maiye kheikhei sou-a teinou zhaoloulai tea veyu phaki, Nenou puletaoye pa lah puletao vei loushu nou khelou-e.

¹⁵Nenou rhei pfüa zai hi taipeiyu vanou dzü khü-a lapae.

¹⁶Enou haihai chouloua ngaopire: Kho sü chouloua a mütai pheire, avei raotao hi tanguyu sü louloure, a phi-a sülou baire. Eye ngaoba-a reih souveyu mai hi veahoyu vere teithe nasü E kheikhei soua kho bulai.

¹⁷Doushibe nou rashithou shipei moyuma, Darkhabe nou thoutao moa buyuma, Oliv be nou thou shipei moa, dou-rou chilou moa buyuma, alia kikhaorü hatayuma,

¹⁸E MAPAO zhih hinou asa-a bubailai; Eye khailu-apei Ramai zhih hinou asalai.

¹⁹Ramai MAPAO hai avei khouko-e. Puhnou a phi hai shuh phi büa soupeie, Puhnou Eye panou kuyu buh hinou tawe. Lou süthai-apeio hi poa lou souyu bvü noupu peie.