Read Poumei Naga ZEKHARIAH 10 Bible Online

ZEKHARIAH 10 - Poumei Naga bible

ZEKHARIAH 10

¹MAPAO hinou khonü khyana vei teirü sü kholo. Teikhai teirü ae teihao sü MAPAO nou soupeia baie, alia puhnou neletaoye donou dei hi buyu vupou shinamara teitei pei hisü teirükou peiwe.

²Deiphao mainou bashara ae prousouyu mai hinou daie vepalai touyu nouwe, ana kohmoyu ae dayu chila ngaoloua baiwe. Kamai-a nou me paopeiwe, ana da-a nou paola peiwua panou hamako hinou lesa baiwe. Südonou maikhe mai hai hayu zhaotu büa moa laire. Süthai-apei mai hayu donou puletao hai veawe.

³MAPAO nou paoe, “Amaitao ye khasa nou hrüa buyu maitao hisü E rarouwe, alia puletaoye sü Enou souvea peilai. Judah mai hai Amai-e, alia Khoukhoulai MAPAO Enou puletaoye sü kiko peilai. Puletaoye sü panou reih hi khoushoyu rhei bülai.

⁴Puletao hrohinou peikhomai, süthai-apei mai, alia teidei khoyu maiye sü panou palai.

⁵Puletaoye sü panou soureih souveiyu mai büa puletao ngaoba maiye sü ludu hi nai tainya poa tayu büa panou taloulai. MAPAO nou puletaoye kozho peiyu thaifüa, puletao nou reih sü souloulai, alia rhei pfüa laiyu puletao ngaoba mai jünou veiloulai.

⁶“Enou Judah maiye sü soukhoupu peilai; alia Israel maiye sü vupa peilai. Enou puletao ye sü ki hi sa-a dakhai ve peilai, daiolouzü Enou puletaoye zhuvea-e. Puletao hai Enou malai moyu bütou tea hrülai; daiolouzü E hai puletao vei Ramai MAPAO nae, alia puletao vei veachi sü Enou keipeilai.

⁷Israel mai hai soureih souyu maili büa khoulai, alia puletao hai zhaoh soziyu maili nou asayu büa asalai. Puletao vei tyaonahtao nou veilouyu haihai licholoua asalai, alia MAPAO nou haibüa soupeiyu vanou puletao hai sava-a hrülai.

⁸Enou Amaitaoye sü kuloulai alia save pojükhai loulai, daiolouzü Enou puletaoye sü vupa peiwure, alia puletao hai raichoki mai alao hrüyu büa panou hrüvepu loulai.

⁹Enou puletaoye tyahrü kukhe mai hi sourarou laikhai touyuma, puletao nou doushoyu buh kinou buyuma Eye licholai. Puletao nou hria ki hisü puletao vei nahmaitao ye sa-a dakhai vezho loulai.

¹⁰Enou puletaoye sü Ejipt ae Assaria hinou ki hi save peilai; alia Enou puletaoye sü Gilead ae Lebanon teidei hi save thoupeilai; mai hrülou süyu koute Enou sühisü save thoupeilai.

¹¹Puletao nou zaidu nahi takouyu phaki, Enou zaidzü khüyu nasü dapeiwua panou puletao ye kacho paloulai, alia thouyu Nail rei nasü southe peiwulai. Süthai Assaria maivei khaophu nasü natawulai, alia Ejipt maivei khouko sü hatalai.

¹²Enou Amaitao ye sü soukhou peilai, alia puletao hai Achi züa Eye thoa bailai.” Haibüa MAPAO nou paoe.