Read Poumei Naga ZEKHARIAH 12 Bible Online

ZEKHARIAH 12 - Poumei Naga bible

ZEKHARIAH 12

¹Israel maiye donou MAPAO vei chipao: Raki soushu loua nou deiphao sou-apeio ae mai rako thoupeiyu MAPAO nou haibüa paoe:

²“Zhukhaio, Enou Jerusalem ye sü zhaoh pai ali büa soupeiwulai, alia süpehao hinou buyu tyahrütao ye sü panou keloua zhilai. Sübüa puletao nou Jerusalem ye nülouyu phaki, Judah hi nuhdutao-a panou nüloua bailai.

³Ana haibüyu teile sü velai, Enou Jerusalem ye süshoyu chuh ali büa soupeilai, sünaye sü mai talinoua polaiwulai teanou poyu maisü lah puhye zhilou bailai. Süthai deiphao hi buyu tyahrü hrülai nou ve louzho loua puhye sü dulai.

⁴Süzhou teithe, Enou puletao rhei sü khumah soupa peilai alia rhei pfüyu mai hrülaiye sü souvo peiwulai. Enou Judah maiye sü zhupeilai, ana puletaoye ngaoba mai vei rhei khesü nghithou soucha peilai.

⁵Süthaisü Judah hi mainou lah puletao hi haibüa paolai, ‘Jerusalem hi hrüa buyu mai nou khouko buyu hai Khoukhoulai MAPAO, puletao vei Ramai vanou baie.’

⁶“Süzhou teithe Enou Judah maiye sü heiphao hi mei deiyu na büa moa rouvao deiyu büa panou puletao pehao hi hrüyu tyahrü khesü dei hawulai. Ana Jerusalem maiye sü panou nuhdu khevainou kaozhou aveih ngao-a hrü dakhai loulai.

⁷“MAPAO Enou Judah kihikhamai ye veilouyu nasü rai-a peilai, sübüa panou David kihikhamai ae Jerusalem hi hrüa buyu maitao vei kathe nasü panou Judah maivei kathe na jünou lalaimoe.

⁸Süzhou teithe MAPAO nou Jerusalem hi buyu lülouho kanaye panou David büa khouko bulai, alia David kihikhamai ye sü panou Ramai bülai, MAPAO vei rakivamai bülai.

⁹Süzhou teithe Jerusalem ye ve reih soulai tea veyu tyahrü hrülaiye sü Enou souha khaiwulai.

¹⁰“Enou David tyaonahtao hi alia Jerusalem hi hrüa buyu mai teitei hisü zhuveayu ae maiye leshiyu rako nasü thoupeilai, sübüa puletao ye panou puletao nou southa khaitouyu mai naye zhuloua lah puh nah ali khei buyu na thaiyu büa dopfülai, alia nah narai na thaiyu büa shusoua koulilia kralai.

¹¹Süzhou teithe, Jerusalem hi buyu maitao nou dopfüyu hai Megiddo deikho hinou Haddadrim donou dopfüyu bülai.

¹²Teidei sühisü süzhou lahkuku vei kihikhamai nou lahye donou dopfüa kralai: David vei kihikhamai, maipfü noupu loua nou; Nathan kihikhamai, maipfü pulinou loua nou;

¹³Levi kihikhamai, maipfü noupu loua nou; Shimei kihikhamai, maipfü noupu loua nou; alia shokhai toua buyu kihikhamai hrülai hai lahkuku donou dopfüa kralai,

¹⁴alia khü kukhe hrülai nou puletao vei chapfü noupu loua kralai.