Read Poumei Naga ZEKHARIAH 3 Bible Online

ZEKHARIAH 3 - Poumei Naga bible

ZEKHARIAH 3

¹Süthaisü Napao Peichana Joshua nou MAPAO vei rakivamai nghoujü nou la-a buyu Eye ngaoe, alia Saitan-a Joshua pehinou puh hi paodukare donou la-a bue.

²MAPAO vei rakivamai nanou Saitan hi paoe, “He Saitan! MAPAO ye panou neye chaa peitheo. Jerusalem ye leshi shoa dolouyu MAPAO ye panou neye züpei theo. Mai haina hai mei hinou popa khaitouyu süüda ne mowu?”

³Joshua hai rakivamai nghoujü nou sheemoyu sabanü banou-a bue.

⁴Rakivamai nanou puhye vah soukha peiyu na hisü paoe, “Sheemoyu sabanü taosü puhva hinou phapeio.” Süthaisü puhnou Joshua hi paoe, “Zhukhaio, ne nou soumah khaitouyu mahtao sü polai peiwure, südonou chuo Enou neye sü sheetouyu sabanü nou banou peilai.”

⁵Rakivamai nanou puhye vah soukha peiyu nahisü paoe, “Sheesha touyu peizüsa ali pokou Joshua pei hi züpeio.” Paoyu thaifüa, puletao nou sheesha touyu peizüsa nasü pokou Joshua pei hisü züpeie, alia MAPAO vei rakivamai nahai süpe hinou la-a bue.

⁶Süthaisü MAPAO vei rakivamai nanou Joshua hi paoe,

⁷“Khoukhoulai MAPAO nou haibüa paoe: Ne achi züa bulouzü alia Enou jüpayu hinou talouzü, neye panou aki kholai alia avei chiku-apei mai ali soulai, alia hai hinou la-a buyu rakivamai ali büa nevei veachi khesü Enou kei peilai.

⁸Keilo, Napao Peichana Joshua, alia neye koa vah souyu napao maitao, haisü keilo, daiolouzü neletao hai rako aveih mai soulaire: zhukhaio, Enou neletao hisü avei kilai Baokao tea kuyu nasü seive peilai.

⁹Enou Joshua nghoujü hisü chuh ali panou pah anai pfüa khaipeilai. Chuh süna hisü Enou larücha rüthoukhai peilai, alia teithe ali levainou teidei haina vei mah khesü polai peiwulai.

¹⁰Süzhou teithe, neletao hai mai alinou aliye kupove darkhabe alia doushibe phi hinou sava-a bulai,” tea Khoukobu MAPAO nou paoe.