Read Poumei Naga ZEKHARIAH 4 Bible Online

ZEKHARIAH 4 - Poumei Naga bible

ZEKHARIAH 4

¹Eye cha-a buyu rakivamai nanou dakhaive zhiyu mailiye kaishuyu büa Eye kaishu haibüa chae,

²“Ne dai ngaoe?” Enou chila peie, “Sana nou soukhai touyu meivabvü khaiyu buh ali ngaoe, alia sünavei pe hinou meidzü bvü ali bue; sühisü meivabvü anai bue, alia meivabvü ali hinou meitaoyu mü anai bue.

³Alia meivabvü khaiyu pe hinou Oliv süübe ahai bue, alinou bakha zhoulo ae ali nanou bakha nalo nou bue.”

⁴Süthaisü Eye cha-a buyu rakivamai nahisü “A paopuwo, haihai daie,” tea Enou noue.

⁵“Ne haitao hai daie touyu sümowu?” teanou rakivamai nanou Eye cha-e. “A paopuwo, E haitao hai sümoe” tea Enou chila peie.

¹⁰“Meivabvü anaitao hai deiphao teitei ngaoyu MAPAO vei nghithou-e,” tea Rakivamai nanou Ahi paoe.

¹¹Süthaisü Enou puh hi noue, “Meivabvü khaiyu buh nalova ae zhoulova nou buyu oliv süübe ahai hai daivanoue?

¹²Alia meidzü pa kükoure donou sana nou soukhai touyu dzüpaip ahai pe hinou oliv baokao ahai buyu hai daivanoue?”

¹³Puhnou ahi paoe, “Haitao hai daie touyu ne sümowu?” “Sümoe, A paopuwo” tea Enou chila peie.

¹⁴Süthai puhnou paoe. “Mai haina ahai hai deiphao teitei hi panou MAPAO vei vah soure donou theadzü napei khaitouyu nahai-e.” Zerubbabel hi Ramai nou Paohpeiyu Rakivamai nanou ahi paoe, “MAPAO vei chipao haitao hai Zerubbabel ye donoue: Nevei pfüchi alia khouko vanou veilou laimoe, ana Avei Rako vanou veilou bailai. Kaozhou ashi nou ne hi deichi büa neye ve khuyuma, ne nghoujü nou hata bailai. Neye panou Rathoki nasü soushu loulai, nenou akhai chuh na pokou khothou louyu phaki, maisou nou ‘Daizhou koute veisa! Daizhou koute veisa’ teanou shalai.” Süthai-a MAPAO vei chipao ali hai ahi ve haibüa paoe. “Zerubbabel nou Rathoki vei beikhei sü khopeie; alia puh ye panou haina hai souche loulai. Süthaisü Khoukhoulai MAPAO Enou puhye seivewe touyu neletao nou süloulai. Daotu souta-a ngaoyu maitao nou chathai talai, ana Zerubbabel nou Rathoki nasü thaokhai timoa soua buyu ngaoloua puletao nou le asalai.”