Read Poumei Naga ZEKHARIAH 7 Bible Online

ZEKHARIAH 7 - Poumei Naga bible

ZEKHARIAH 7

¹Darius veo nou vekou louyu po adai vei khouh aküe (süolouzü Kislev teanou kuyu khouh) khoukha adai zhou Zekhariah hi MAPAO vei chipao haibüa ve-e.

²Bethel hi nuh mainou Sharezer, Regemmelek alia puletao maiye MAPAO vei shiha panou khore donou seive-e.

³Alia Khoukhoulai MAPAO vei ki hi buyu napao maitao ae rachipaola maitao hisü haibüa noue: “Raichoki soukouyu zhai na thaifüa soushi khaitouyu Rathoki na vanou, chua Etao nou khouh angou nava hi dopfüa lühlai hiwu?”

⁴Süthaisü Khoukhoulai MAPAO vei chipao sü ahi haibüa ve-e.

⁵Teidei haihi hrüa buyu mai hrülai alia napao maitao hisü haibüa paopeio: “Neletao nou khouh angou nava alia khouh anai nava dopfüa ae lüh-a po rainai koute souyu hai Eye tsükhouyu donouwu?

⁶Alia neletao nou touyu ae soyu hai, lah neletao donou touso baimowu?”

⁷Jerusalem alia süpehao hinou buyu nuhdu khemai nou vashoa hrüa buki, alia khelo deichi phihi nou mai alaosou hrüa bukinou MAPAO nou daonou puhvei rachipaola maitao hinou haisü paopei mowu?

⁸MAPAO vei chipao hai Zekhariah hi haibüa ve-e,

⁹“Khoukobu MAPAO nou haibüa paoe: ‘Kaozü hinou chiku peio, alinou aliye leshilo alia zhuvea peio.

¹⁰Meamaipfü, pfüpuo hamai, shevai-shesü alia touha soha maiye souveaso; alia alinou aliye soushire donou do-ashi phouso.’

¹¹“Ana avei maitao nou süsü keipei bare, alia puletao nou rochisho loua nouqulu khaloua baire.

¹²Khoukhoulai MAPAO vei chipao alia chikha khesü puhvei Rakoye panou rachi paolayu maitao hinou seive-e, ana puletao nou sütao hai-a keimore donou puletao lethou sü chuh büa soukhou sholoua baire. Südonou Khoukhoulai MAPAO vei dushoyu lekha-rarou nasü puletao hi vere.

¹³Enou kuyu phaki, puletao nou keipei bare, südonou chuo puletao nou Eye kuyuma, E-a keipei laimoe, teanou Khoukhoulai MAPAO nou paoe.

¹⁴Teikhei nou hüpoa tayu büa Enou puletaoye sü tyadei kukhe hi soupo rarou laiwure. Südonou veishoa buyu puletao vei teidei hisü mai takou-takhe more, alia teidei sühisü mai hrümoyu buh ali soutare.”