Read Poumei Naga ZEKHARIAH 8 Bible Online

ZEKHARIAH 8 - Poumei Naga bible

ZEKHARIAH 8

¹Khoukhoulai MAPAO vei chipao hai ahi ve haibüa paoe:

²“E Jerusalem ye leshi shoyu vanou puhye soukha peinüshoe, südonou puletaoye ngaobayu mai hisü E rarouwe.

³Enou Zion hi dakhai velai, alia Jerusalem nuhdu touchü hinou ve hrülai, alia Jerusalem hai louche louveiyu nuhdu teanou kulai, alia Khoukhoulai MAPAO vei deichi nasü sheeyu deichi tea panou kulai.

⁴Chipaimai ae chipaomai taonou Jerusalem duva pe hinou chobulai, alia puletao nou tsüleyu donou süüpo poa talai.

⁵Alia nah naotu poutu maitao nou nuhdu vei kijüdu kinou kroa bulai.”

⁶Khoukhoulai MAPAO nou paoe, “Haihai shokhai toua buyu maitao donou soulou hoyu büa ngaolai, ana Eye donou haisü tatei laiwu?

⁷Enou amaitaoye sü teinghi palova buyu teideitao alia teinghi loulova buyu teideitao hinou khailupa peilai.

⁸Enou puletaoye sü Jerusalem hi save hrülai. Puletao hai amai soulai alia Enou puletao vei Ramai soulai, kaozü alia acheche hinou puletaoye sa-a hrülai.

⁹“Neletao khuveilo! Raichoki rachi paolayu maitao nou MAPAO vei Rathoki beikhei soushupu tayu phaki paoyu chipao taosü neletao nou chua kei-a bubaie.

¹⁰Rathoki soushupu tamojüo, mai moa kikhaorü ye zhosayu hai ngaolou moe, alia mai hrülai nou ngaoba maiye ngaopiyu donou tapa-talou loushie; daivanou toulouzü Enou mai hrülai hisü mai linou mailiye ngaobayu tsüle southou peiwure.

¹¹Ana chuo Enou shokhai toua buyu amaitao hisü raichoki souyu büa soulai more.

¹²Chuo puletao nou kaonayu sü vuthou loulai, darkhabe khenou rashithou sü shipeilai, dei nou shina-mara papei talai, alia raki vanou dzü sü rükou peilai; alia Enou shiha sütao teitei hai shokhai toua buyu maitao hisü peilai.

¹³Judah alia Israel maitaore! Raichoki louzü vakoumai nou haibüa mailinou mailiye chaawe: ‘Judah alia Israel mai hi chaa ashi veyu büa panou ne hi-a vetheo,’ teanou. Ana chuo Enou neletaoye sü khailu peire, alia vakoumai-a mailinou maili hi haibüa paolai, ‘Judah alia Israel mainou shiha ngaoyu büa ne-a panou shiha sü ngaolou theo.’ Südonou ngaopiso, khuveisho loua baio.”

¹⁴Khoukhoulai MAPAO nou paoe, “Neletao puopao nou A rarou-lekha daipa peiyu phaki, Enou puletao ye souhawulai tea cholouyu nasü, Enou ale damoa puletaoye sü souhawure.

¹⁵Ana chuo Enou Jerusalem alia Judah maiye haveih soupeilai tea choloure, südonou ngaopiso.

¹⁶Neletao nou vah haitao hai soulai: Maili nou maili hi acheche chi nou pao-a bailai, chikuyu phaki kaozü hinou chiku peilai, sübüa kaonayu sü panou neletao hi pove peire donou soulai.

¹⁷Neletao tsüle hi maiye soushire donou do ashi phouso, alia da-a nou chaachou souso, daiolouzü hai teitei hai Enou ngaorae.”

¹⁸Khoukobu MAPAO vei chipao ahi ve haibüa paoe,

¹⁹“Khouh adai navei lühyu, angou navei lühyu, anai navei lühyu alia kirou nava lühyu taosü panou Judah maitao ye khonü nüa savayu sü soulai, südonou acheche ae kaonayu sü jüpalo.”

²⁰Khoukhoulai MAPAO nou paoe, “Nuhdu kukhe hinou hrüyu mai alaoso Jerusalem hi veloulai.

²¹Nuhdu ali hinou hrüa buyu mainou taho nuhdu kukhe lihi hrüa buyu maitao hisü haibüa paolai: ‘Ewo Khoukhoulai MAPAO vei shiha ngaore donou taho veachi paotae, Etao ye koa talai she.’

²²Mai alaoso alia khouko veishoyu tyadeitao-a Jerusalem hi velou Khoukobu MAPAO ye tholai, alia puh shiha ngaoloure donou ve veachi paolai.

²³Süzhou teithe hisü vakoumai kirou nou Jihudimai ali hi ve haibüa paolai, ‘Etao-a neye sa-a talai, daiolouzü Ramai nou neletaoye koa salai peiwe touyu choue.’ ”