Read Poumei Naga MALAKAI 2 Bible Online

MALAKAI 2 - Poumei Naga bible

MALAKAI 2

¹Oh napao maitaore, kharochi haire neletaoye donoue.

²Neletao nou achi kei basho-o, alia azhih veih souloure donou achi hai neletao hi khailoumo louzü, Enou neletao hisü chaa seive peilai alia neletao nou haveih ngaolouyu teitei nou chaawulai; cheche vuzünou na teitei hai Enou chaawure, daisounou tiyuo haihai neletao lekhe hi khailou moe, tea MAPAO nou paoe.

³Zhukhaio, Enou neletao tyaonahtaoye souvealai alia neletao pah hisü choba nou nyapeilai ae anghoujünou neletaoye sü hulaiwu bailai.

⁴Süthai, Enou Levi mai hi Vo soukhai touyu nahai pemore donou Enou kharochi haina seivewe tiyu neletao nou süloulai, tea MAPAO nou paoe.

⁵Enou puh hi Vo soukhai touyu nasü hriyu ae kaonayu vo-e, alia Enou süsü puletao hi Eye pishulai alia azhih ngaopi-a tsükhou shulai touyu vanou puh hi soupeie.

⁶Acheche chikha sü puh mü hinou bue, alia puh mütai hisü mahyu alikhei-a hae. Puhnou kaona hinou alia acheche hinou Eye koa ta-e, alia mah hinou puhnou maitaolia souzü peie.

⁷Daiolouzü napao maitao mütai hisü tsüdo aveih chipao paore phae, alia maikhe maiye panou puh hinou chikha phoure phae, daiolouzü puh hai Hrülai pei hi MAPAO vei ko aveih pfüve peiyu na-e.

⁸Ana ne hai sünavei acheche ludu hinou tarei tare; nenou doupeiyu hinou maitaoli phi süloure; Levi maivei Vo nasü nenou souzhaiwure, teanou Hrülaipei MAPAO nou paoe.

⁹Südonou ne sü maikhemai nghoujü hinou hraongu soupeilai, daisounou touyuo, nenou avei ludu nasü tamoe, ana nenou maikhe maiye soukua chikha sü doupeiwe.

¹⁰Neletao puo alikhei bubai mowu? Neletaoye soupeiyu Ramai alikhei baimowu? Sükulouzü daisounou neletao alinou aliye louche moa neletao puopao nou soukhai touyu vo sü souzhaiwe?

¹¹Judah hai lü hazhi tea bue, alia puletao nou Jerusalem hinou ae Israel teidei teitei hinou ngaorayu vah sü soure, daiolouzü MAPAO nou leshiyu puh vei Rathoki sü Judah mainou souzhaiwure, alia rah kukheye thoyu nahnaotu sü naloure.

¹²Mai talia sübüa souyu maisü Hrülai pei hi MAPAO ye panou Israel maihro hinou polaio, alia puhye sü pa Khoukhoulai MAPAO ye sheelayu buh hisü loupuso.

¹³Alia neletao nou haihai soupua baire. Neletao nou kra-a alia koulilia MAPAO vei rathoyu buh sü nghidzünou kouh holoue, daisounou touyu-o, nenou sheela peiyu sü puhnou tsükhou pumore alia ne bahnou peiyu nasü puhnou jüpa-a popei khaimore.

¹⁴Neletao nou nouwe, “Puh daisounou süsü popei moe?” Daiolouzü MAPAO hai ne alia ne nahle-a buki ne khapfü hi nou vo soukhai touyu nahi shaki nasüe, honapai nou neye koa hrüa bulikhu ae ne khapfü soua buma nenou puhye loucheyu hazhi toure.

¹⁵Alikhei baiyu Ramai nou Etaoye soupei mowu ae ahri rako sü thoupei mowu? Alia puhnou dai jüpawe? Ramai ye süyu tyaonah khemaiye jüpae. Südonou ne eitya tekhaio ae neletao maita linoua nahle buki khapfü hi louche mosou-o.

¹⁶“Daiolouzü tunaoyu hai Enou ngaorae, tea Ramai MAPAO nou paoe, alia neletao nou taidayu ae ashi souyu sabanü nou banou louyu hai ngaorae, tea Hrülai pei hi MAPAO nou paoe. Südonou ne eitya tekhaio, alia lü hazhiwusouo.”

¹⁷Nevei chipao sünou MAPAO ye souveare. Sütouyuma nenou paoe, “Kakunou Eletao nou puhye souveawe?” Haibüa paoyu nou, “Ashi souyu hai MAPAO nghoujü hi-o veih-e, alia puh khemai hisü MAPAO nou jüpae.” Moa haibüa nou-e, “Acheche Ramai sü daiki bue?”