Read Poumei Naga MALAKAI 3 Bible Online

MALAKAI 3 - Poumei Naga bible

MALAKAI 3

¹“Zhukhaio, Aludu soudare donou rai-a ako pomai seipeilai, ae nenou phoubuyu MAPAO sü sükhaimoa puh vei ratho ki hi veloulai; Zhukhaio, neletao nou jüpayu Vo vei ko aveih pfülaimai nasü velai,” tea Khoukhoulai MAPAO nou paoe.

²Ana puhnou veyu teithesü thaonou healou süe alia puh nghoujü thaonou lalou süe? Daiolouzü puh hai sousheeyu mei ae saoshiyu maivei sabon kuwe.

³Puhnou shahu sousheeyu alia souveiyu mai ali büa chobulai, alia puhnou Levi nahpoutu khemai sü soushee peilai alia acheche sheelayu nasü MAPAO hi peimosa puletao sü sana ae shahu sousheeyu büa sousheelai.

⁴Süthaisü Judah ae Jerusalem vei posheelayu hai daoraiki teile hi büa MAPAO nou jüpalai.

⁵Süthaisü chikure donou E nekhemai hi nghikoulai; kheikhupado soumai, maichapfü sapamai, dayu-a chaachou soumai, maiye souveamai ae vah soumai zho peitou momai, meamai ae rounah ye souveayu mai, shetu maiye deima bumai alia Eye pimoyu mai pei hisü Enou chisho-a tudee peilai, tea Khoukhoulai MAPAO nou paoe.

⁶“MAPAO E hai data tumoe, südonou Oh Jakob tyaonah taore, neletao-a souha moe.

⁷Neletao vei puopao vei teile hinou poa zhou koute hai achikha hinou tarei tare, alia avei chikha hai zükhai more. Ahi dakhai velou-o, alia Enou neletao hisü dakhai velai,” teanou Hrülai pei hi MAPAO nou paoe. Ana neletao nou paoe, “Kakua Etao dakhaive khailaige?”

⁸Mainou Ramai vei saolou süwu? Ana neletaowo Avei saotouwe. Ana neletao nou noue, “Etao kabüa nevei sü saotouwe?” Neletao nou Ramai zha peiyu hinou alia posheela peiyu hinou saotouwe.

⁹Neletaoye sü chaa shinou chaa peiwure, daiolouzü neletao nou avei saotouwe; teidei haihi hrüa buyu mai hrülai nou avei vaotouwe.

¹⁰Ramai vei zhatao chekho-a pojü khaiyu ki hisü povekhaio, sükulouzü aki hi touso na bushulai, alia süthai Enou neletao donou tea raki kikhu sü houlai mosa ae shihra sü lakou peilai mosa touyu neletao nou ahi zhukhai-o, teanou hrülai pei hi MAPAO nou paoe.

¹¹Soushi laimai hisü Enou neletaoye donou dupeilai, sükulouzü neletao vei teidei hi shira khesü soushilai moe, alia neletao vei kipei hi darkha khesü thoushi moyu soulai moe, tea hrülai pei MAPAO nou paoe.

¹²Süthaisü tyahrü hrülai nou rako veiyu mai tea kulai, daiolouzü mainou jüpa shoyu teidei hai neletao vei-e, tea MAPAO nou paoe.

¹³Neletao nou achi hai shisho-a paore, tea MAPAO nou paoe. Sükuyuma neletao nou haibüa paoe, “Kakua Etao nou neye paoshiwe?”

¹⁴Neletao nou paoe, “Ramai vei kuvah souyuo hakobaie. Etao nou Puh chi züyu moa Khoukhoulai MAPAO nghoujünou Etao dopfüa laiyu mai ali kua tayu hai daie zhiyu bue?

¹⁵Khaophu souyu mainou asa baiwe tea neletao nou paoe, vah ashi souyu mainou dusho payu baimoa puletao nou Ramai vei tukhayu hinou turei palou-a baiwe.”

¹⁶Süthaisü MAPAO ye piyu mainou ali nou alihi paoyu MAPAO nou keiwe alia choue, alia MAPAO piyu mai ae puh zhih tsükhouyu maisü Puh nghoujü hinou licho louyu larübvü hi rüthou khaire.

¹⁷Puletao hai avei mai soulai, tea MAPAO nou paoe, Enou vah soutaki puletao hai avei matsüyu mai nasü soulai, alia puo nou puh vah soupeiyu puh nahye zhuvea-a vupa peiyu kua Enou puletaoye sü vupa peilai.

¹⁸Süthaisü checheyu mai ae maishimai, Ramai vah soumai ae Ramai vah soumoyu mai tyakuyu sü neletao nou süpu loulai.