Read Poumei Naga MATHIU 10 Bible Online

MATHIU 10 - Poumei Naga bible

MATHIU 10

¹Jisu nou puh rozümai kiahaitaoye kuve dzüloua puletao hi rashitaoye hupa loure, sou tyali ea lishi maiye souvei loure khouko peire.

²Sei-atamai kiahaitao zhihsü haire: raikaia Pitar tea kuyu Simon ea puh thaihou Andrew: Zebedee nahpoutuhai Jems ea puh thaihou Johan;

³Philip ea Bartholomew; Thomas ea kikha khawo Mathiu; Alphia nahpoutu Jems, alia Thaddias;

⁴Kana himai Simon, alia Jisu ye ngaobamai bah hi thoupeiyu Iskariot Judas.

⁵Jisu nou mai kiahai haitaoye khekouhi chitaohai paopeia vakouhi seitare: “Tahrüh kukhemai teidei talihi-a taso moa Samaritan tamai nuhdutao talihi-a talouso.

⁶Ana süjüwo neletao nou hayu zhaotu, Israel maitaohi tahokhaio.

⁷Alia neletao nou taho haibüa, ‘Raki Vedeisü ngheire’ tea paodoukhaio.

⁸Sounou maiye souveipeio, thaimaiye souhri peio, loukhaora soumaiye soushee peio, rashitaoye hupapeio. Neletao nou sa-a ngaoloubaie, südonou sa-a peikhaio.

⁹Neletao vei shavühi sana, husha moa shanou talia pfüso;

¹⁰neletao veihdu donou lekha, zao ahai, phikha moa süpo talia pfütaso; daiolouzü vah souyumai alihai puh touso ngaotou züe.

¹¹“Neletao nou nuhdu moa nuh talihi talouyu kisü neletaoye sasa-a shepeiremai kamaiye phoulouwo, alia neletao nou buh süsü thao-a tamo koutesü puhye koa buwo.

¹²Neletao nou ki sühi talouyu kisü, ‘Nehi kaonayu buloutheo’ tea paokhaio.

¹³Ki sühi buyu maitao nou neleye sasa-a shepei louzü, neletao vei kaonayu sü sühi panou bukhaio, ana puletao nou neletaoye sasa-a shepei molouzü, süthaisü neletao vei kaonayu nasü neletao hi lukhailo.

¹⁴Alia maita linou neletaoye shepei balouzü moa neletao chi keipei molouzü, neletao nou ki süna moa nuhdu süna thaowu-a tayu kisü neletao phi hinou naisü sülaiwuwo.

¹⁵Enou neletao hi chechenou paowe süolouzü Chikuyu Teithe zhousü nuhdu sünavei maitao jünou Sodom ea Gomorrah maitaoye nou Ramai nou koua zhuvea peilai!

¹⁶“Keikhaio! Enou neletaoye zhaotu büa nüseitao hrohi seitawe. Südonou neletao nghoutao büa kailo ea khaotao büa nashalo.

¹⁷Maikhe maiye zhutoulo; daiolouzü puletao nou neletaoye niloua chikuki hi savelai, alia neletaoye rathobuhtao hinou dapeilai.

¹⁸Alia Avanou neletaoye puletao ea Tahrüh kukhemai nghojünou zhopaoh soure donou teidei khomai ea Vemaitao nghojühi savelai.

¹⁹Puletao nou neletaoye chikure donou saveyu kisü, neletao nou daichi paolaisa moa kabüa paolaisa tea dowuso; daiolouzü neletao nou paore nasü teilecho sühinou neletao hi peilai.

²⁰Daiolouzü neletao nou paore chitaosü neletao vei laimoe; ana sütaohai neletao Puovei Rakonou neletao lekhe hinou paopa peilai.

²¹“Thaihou jürainou lah thaihou jüraiye southeare donou thoupeilai, alia puokhemaitao-a sübüa puletao nahmai taohi soulai; nahmaitao-a puletao pfüpuomai pei hi motouloua puletaoye southealai.

²²Alia Azhih vanou mai hrülainou neletaoye ngaoralai. Ana akhai koute healouyu puhye sü khaipeilai.

²³Puletao nou neletaoye nuhdu ali hinou souveayu kisü, kukhe alihi tuvelo; daiolouzü cheche vuzü Enou neletao hi paowe, neletao nou Mai Nahpoutu nou vemo jühisü Israel nahmaitao vei nuhdu taohi taveche louhoe.

²⁴“Doumai li-a puhvei dou-apeio jünou dumoe; moa kilai alihai puhvei paopu jünou dumoe.

²⁵Südonou doumai alihai puhvei dou-apeio bülouzü khabaie, alia kilai alihai puhvei paopu bülouzü khabaie. Ki paopuye puletao nou Beelzebul tea kulouzü, daizhozhou koua puletao nou puh kikha maitaoye shishoyu zhihnou kulaisa!

²⁶“Südonou puletaoye piso; daiolouzü popangaolai moyu hokhaikhai touyu halia hae, moa kukhaitoua sülai moyu alia hae.

²⁷Enou neletao hi teizhi hinou paopeiyu nasü neletao nou teiva hinou paovuzükhaio, alia neletao nou kheia choulouyu nahai kipei hinou pa shakhaio.

²⁸Alia pfüphaoye southealou khaia rakoye southealou hoyu puletaoye piso; ana pfüphao ea rako ahaiye koa meizaihi pothou souhalou süyu Ramaiye pilo.

²⁹Khaitou ahaiye pousha alinou zholoubai mowu? Sütoukhaia neletao Puo leli hinou moa khaitou ali koutea deiphihi dekoumoe.

³⁰Ana neletaoye donou louzü, neletao pei hi peishu teitei-a chochewu-a bue.

³¹Südonou neletaowo louzü khaitou taoli jünou muh kousho hie.

³²“Südonou Eye maikhemai nghojünou aetou peiyu mai taliye sü Enoua, puhye sü rakibu Apuo nghojünou aetou peilai.

³³Ana Eye maikhemai nghojünou motouyu mai taliye sü E-a rakibu Apuo nghojünou puhye sü motoulai.

³⁴“Deiphaohi kaonayu povere donou Ehai vewe tea chowuso. Moe, kaonayu povere donou E vemoe, ana khoche povebaie.

³⁵Daiolouzü Enou nahpoutuye panou puhpuo pei hi, nah naotupaiye panou puhpfü pei hi, alia mouye panou puhnai pei hi motoure donou vebaie;

³⁶alia mai alivei ngaobamai hai lah puh kihikha maitao bailai.

³⁷“Ajünou puhpuo moa puhpfüye leshi kouyu maitali sü Arozümai souzü moe; alia Ajünou puh nahpoutu moa puh nah naotupai ye leshi kouyu puhsü Arozümai souzü moe.

³⁸Alia puhvei kros pfüloua Athai fülou moyu maitalisü Arozümai souzümoe.

³⁹Lah hrümai khailu paloure te-a buyu maitali nou süsü ha-kabailai, ana Eye donou puh hrümai ha-kayu puhnou süsü ngaoloulai.

⁴⁰“Neletaoye shepeiyu maitalinou Eye shepeiwe; alia Eye shepeiyu maitalinou Eye seiveyu puhye shepeiwe.

⁴¹Rachi paolamai aliye shepeiyu maitalinou puh hai rachi paolamai aliyu donou, rachi paolamai alivei buusü ngaolai, alia achechemai aliye shepeiyu maitalinou puh hai achechemai aliyu donou, achechemai alivei buusü ngaolai.

⁴²Alia maitalinou Arozümaitao hronou tainou kayu aliye dzükao paili koute peilouzü, puh hai Arozümailiyu donou, chechevuzü Enou neletao hi paowe, puh buusü hatakia hakhai laimoe.”