Read Poumei Naga MATHIU 11 Bible Online

MATHIU 11 - Poumei Naga bible

MATHIU 11

¹Alia Jisu nou puh rozümai kiahai taohi chi haitao paocheyu kisü, puhnou buh süsü thaowu-a tare ea buh süna ngheiki buyu nuhdutaohi taho doupei tare ea ko paodou tare.

²Chuo Khrista nou souyu vahtao vanou Johan Baptist nou hukha hinou choulouyu kisü, puhnou puh rozümai kamaiye Jisu hi seive.

³Puletao nou Jisu hi noue, “Ne hai Johan nou maili velai tea paoyu nawu, molouzü Ehnou kukheliye zhipulaiwu? Eh hi paongao khaio.”

⁴Jisu nou puletao hi chila peie, “Khaitawo, alia neletao nou chouyu ea ngaoyutao sü Johan hi paongaokhaio:

⁵nghichamaitao nou ngaoloure, phishomainou taloure, loukhaora soumaiye sü soushee peire, noupe mainou chouloure, thaimaiye souhri peire, alia toure hamai hisü ko avei paodou peire.

⁶Alia Eye letsü moyu puhsü rakoveie!”

⁷Johan rozümaitao nou khaitayu phaki, Jisu nou Johan vanou maisouhi paoe: “Neletao nou rekou Johan hi tahoyu kisü, neletao nou dai ngaore zhiwe? Teikhainou hülüyu poube sünawu?

⁸Molouzü neletao dai zhure donou tahowe? Sahnü avei banouyu mai sünaye zhure donouwu? Sübüa banouyu mai taosü veofühao hinou hrüa bue!

⁹Sükulouzü neletao daidonou tahowe? Rachi paolamai aliye zhure donouwu? Ovai, chekhaoe, ana neletao nou rachi paolamai ali jünou koushoa ngaoloure.

¹⁰Daiolouzü Johan hai sheeyu larübvü hinou: ‘Zhukhaio, Enou Akopaomainaye sü neye donou ludu souda peiloure ne jünou rai-a seive peilai’ tea paokhai touyu mainasüe.

¹¹Enou neletao hi cheche vuzünou paowe, naotumainou nakouyu maikhemai hrohisü Johan Baptist jünou dukouyu maili-a pakhaimohie. Ana raki Vedei hinou taikayu puhnou Johan jünou duhie.

¹²Johan Baptist nou ko paodou tayu hinou shua chu koute sü raki Vedeiye chihshoa souvea peiyu sü daore, alia khushoyu maitao nou süsü poloure donou tea bue.

¹³Johan teile koute hai rachi paolamai hrülai ea Moses vei razhai nou Vedei vanou paopeire;

¹⁴alia neletao nou puletao vei chipaohai louche nülouzü, Johan hai raia velai tea paopeiyu Elijah baie.

¹⁵Südonou keiloure nou pfüyu puhnou keiloukhaio!

¹⁶“Chuo Enou maikha hainaye daiye nou paonadalai? Puletao hai hupobuh hinou chobua buyu nahmaitaoye kheihaoe. Me alinou alihi haibüa paikua paoe,

¹⁷‘Eh nou neleye donou shaa houa lousoue, ana neletao nou do soubae! Ehnou kouli lipeie, ana neletao nou krabae!’

¹⁸Daiolouzü Johan nou toumo-shomo-a ve, alia mai hrülai nou paoe, ‘Puh hi rashi ali bue!’

¹⁹Mai Nahpoutu nou tou-shoa veyu kisü mai hrülainou paoe, ‘Mai hainaye zhukhaio! Puhwo touzhi-shozhiyu mai alie, alia puhwo kikha khamaitao ea kukhe mahmaitao vei samai baie!’ Sütoukhaia, ratsünawo louzü puhvei shithounou puh hai chekhaoe touyu sü ngaopeibaiwe.”

²⁰Jisu nou puhvei khupa vah souyu buh nuhdutaohi maikhemai nou leda moyu donou nuh sütaoye züa paoe:

²¹“Oh Korazin, neye donou daizhozhou ngaopisa! Oh Bethsaida, neye donou-a daizhozhou ngaopisa! Daiolouzü neletao hinou soukhai touyu khupa vah taosü Tair ea Sidon hinou soure toulouzü, sühi maikhemai taosü dao raikinou puletao le daloure touyu shee soungaore donou lousah ba-a lah puletao pei hi vounai bokhai bulaire!

²²Enou neletao hi cheche nou paowe, süolouzü Chikuyu Teithekisü neletaoye jünou louzü Tair ea Sidon hi maitaoye nou Ramai nou zhuvea koupeilai!

²³Alia Kapernahum, newo raki khete kukhe laiwu? Neye akhai hayu kaobvühi polai thouwulai! Daiolouzü nehi soupeiyu khupa vah taohai Sodom hinou soure toulouzü süsü zhou koutea bukouwu laihie!

²⁴Ana Enou nehi paoe süolouzü Chikuyu Teithekisü neye jünou Sodom teideiye nou Ramai nou zhuvea koupeilai!”

²⁵Teile süpha hinou Jisu nou paoe, “Oh Apuo, raki ea deiphao Mapao! Enou neye kalo paowe daiolouzü nenou tsü veimai ea hasümai nghojünou pokukhai touyu sü nahtumai taohi pongao peire.

²⁶Ovai, Apuo, haibüyu hai ne züpa nasüe.

²⁷“Apuonou Ahi ha teitei thoupeiwure. Puo deinou maitalinoua Nahpoutuye sümoe, alia Nahpoutu ea Nahpoutu nou Puoye pongao nüa dolouyu puletao deinou maitalinoua puhye sümoe.

²⁸“Vah vea-a soulaimai ea kou sü-a pfülaimai hrülai Ahi tavelo, Enou neletaoye panou soloulai.

²⁹Aphaodao hai neletao phaohi pokhailo, alia Ahinou doulouwo; daiolouzü Ewo nashawe ea le nawe; alia neletao nou neletao vei rako donou soyu ngaoloulai.

³⁰Daiolouzü Aphaodaowo lawe, alia Akouwo theawe.”