Read Poumei Naga MATHIU 13 Bible Online

MATHIU 13 - Poumei Naga bible

MATHIU 13

¹Jisu nou teithe süzhounou ki sünasü thaowu-a zaipehi tahore ea sühinou doupeire donou kou butare.

²Puhye sühao-a buyu maikhemaisü pouleyu donou puhnou sakhao alihi talouloua buloure; alia maisouwo louzü zaipenou la-a bue.

³Alia puhnou puletao hi nada hinou chi alaosou doupeia haibüa paoe: “Teile lihi mailinou thoutai vure donou tapae.

⁴Puhnou thoutai süsü douhi vuthouyu phakisü, kamaisü luduhi dekoure, alia raohoutao nou zhaoveloua kotou loure.

⁵Kamai sü deivei moyu chuhrao sayu buh hi dekou loure, alia deivei moyu vanou thoutaitao sü thala-a paopare.

⁶Ana teinghinou payu kisü, sütaoye sü teinainou deire; alia sütaosü maa thoua chüloumoyu vanou thala-a thaitare.

⁷Thoutai kamaisü raishu hrohi deloure, alia raishu taonou dupaloua sütaoye boutheare.

⁸Ana thoutai kamaiwo louzü dei avei buh hi deloure, alia sütaosü shi shiloua kamainou shi kaih, kamainou rairou ea kukhenou shirou shiloure.”

⁹Alia Jisu nou akhai soua paoe, “Südonou neletao hai nou pfülouzü keilo.”

¹⁰Süthaisü rozümaitao nou Jisu hi tave loua puh hinou noue, “Daidonou nenou puletao hi nadanou paowe?”

¹¹Alia puhnou puletao hi chila peie, “Raki Vedei vei kheitsü hai neletao hiwo peiwure, ana puletao hiwo peimoe.

¹²Daiolouzü buyu puh hisü peipulai, sübüa puhnou alaosou buloulai; ana hazheiyu puh hinou puh hi daotu buyu koute-a pota bailai.

¹³Enou puletao hi chi paoyu ki nada seiyu sünavei qowo louzü puletao nou zhu-a ngaomoe, alia keikhai-a choumoe moa sümoe.

¹⁴Südonou Isaiah vei rachi hinou haibüa paoyu sü puletao hi vetere: ‘Mai haitaonou keikhai keikhailai, ana sükhai laimoe; puletao nou zhukhai zhukhailai, ana ngaolaimoe,

¹⁵daiolouzü puletao lehai kaorou tare, alia puletao nou sü vaongiwure, ea puletao nghisü mailoure. Molouzü puletao nghinou ngaolou shulai, puletao nounou choulou shulai, puletao lenou sülou shulai alia puletao nou Ahi dakhai veloua Enou puletaoye souveipei shulai, tea Ramai nou paoe.’

¹⁶“Ana neletaowo daizhozhou rako veisa! Neletao nghithounou ngaoloure ea neletao nounou chouloure.

¹⁷Enou neletao hi chekhao-a paowe, rachi paolamai taoli ea achechemai taolinou neletao nou ngaoyu sü ngaonüshoa zhie, ana süsü ngaolou more, alia neletao nou chouyu sü chounüshoa zhie, ana süsü choulou more.

¹⁸“Sükuyu thaisü keikhaio, alia thoutai vuyuvei kosü süloukhaio.

¹⁹Vedei vei chipao chouloua süsü sülou moyu puletao sü luduhi dekouyu thoutaitao büe. Puletao lethouhi vuthoukhai touyu taosü Ashinanou taveloua shaopoa tare.

²⁰Chuhraohi dekou louyu thoutaitao nou chipao nasü choulou bükhaie sasa-a polouyu mai sütao kue.

²¹Ana sünanou lekhehi maa chülou moyu vanou phaso bukhai more. Alia chipao süna vanou souvea-souchoyu moa souvea-souhoyu daoyu kisü puletao nou thala-a süsü thaowure.

²²Raishu hrohi dekou louyu thoutai taonou chipao süna choulouyu maitao kue; ana deiphao hrü haina donou leki-ledayu ea kiniye leshiyu sünanou chipao sünaye boutheare, alia puletao sü shi shikhai more.

²³Alia deivei buh hi vuthou khaitouyu thoutai taonou chipao süna chouloua sülouyu maitao kue: puletao nou shi shiloue, kamainou kaih koute, kukhenou rairou, alia kukhetaonou shirou shiloue.”

²⁴Jisu nou kukhe nadali hinou puletao hi paoe: “Raki Vedei hai puh douhi thoutai avei vuthouyu mai sünaye pao nadalou veie.

²⁵Ana naili kheisü, mai hrülainou zhitakhaiyu kisü, puh vei ngaobamai sünanou taveloua southou hrohisü kha vuthou peiwu-a tare.

²⁶Roube taonou dupaloua shi shiyu kisü khatao-a zhu shipare.

²⁷Alia paopu sünavei kilaitaonou puh hi taveloua paoe, ‘Dou-apeio, nenou ne dou hi thou tai aveinou vuthou mowu? Sükulouzü kabüa kha taosü veloue?’

²⁸Puhnou puletao hi chila peie, ‘Haisü ngaobamai kamainou soue!’ Kilaitaonou puh hi paoe, ‘Sükulouzü Eletaoye panou taho khataoye paipayu ne züpawu?’

²⁹Ana puhnou paoe, ‘Moe; daiolouzü neletao nou khataoye podzüyu kisü sütaoye koa southou kamai paipawu shulai.

³⁰Cha chimo koutesü panou southou ea khataoye koa paoa buwo; alia cha chiyu phakinou Enou cha chiyumai taohi rai-a khataoye paipawuwo ea sütaosü khu khunou khuloua meihi pothou deiwo, ana southouwo louzü podzüloua Avei thoupaohi pove khaiwuwo; tea paolai.’”

³¹Jisu nou puletao hi kukhe nadali paoe: “Raki Vedeihai mai alinou javu thouli poloua puh douhi vuthouwuyu sünaye kheihaoe.

³²Thoutai sünahai thoutai kukhe veishi jünou taikayu nasüe, ana sünanou paopa louyu kisü, poube veishi jünou duloure ea sünanou süübeli daloua teihi raohoutao nou zhaoveloua sünavei botao hinou puletao vei phe mealoure.”

³³Süthai-a Jisu nou nada kukheli puletao hi paopeie: “Raki Vedeihai naotumai alinou sou hai phou asühi thouloua souke teitei lapamosa pothou hükhai touyu kheih büe.”

³⁴Chi haitao pfüphouhai Jisu nou nada sei-a maisouhi paopeie; chechenou puhnou nada seimoa puletao hi hatalia paomoe.

³⁵Haisü Isaiah rachi paolawo nanou paokhai touyu sü panou vetere donoue: “Enou puletao hi chi paoyu kisü nada seilai; Enou puletao hi deiphao soushu rainou sümoyu chitaosü paongaolai.”

³⁶Jisu nou maisouye thaowu-a kikhahi talouyu kisü, puh rozümaitao nou puh hi taveloua paoe, “Ehye douhi khataovei nada navei kosü paosheengao peio.”

³⁷Jisu nou chila peie, “Avei thoutai vuthouyu mai nasü Mai Nahpoutue;

³⁸dou nasü deiphaoe; avei thoutai nasü Vedei vei maikhe maitaoe; khataosü Ashina vei mai khemaitaoe;

³⁹alia khatao vuthou peiyu ngaobamai nasü Rashi nasüe. Cha chiyu sünasü deiphao vei akhai teile sünasüe, alia cha chiyumai taosü rakivamaitaoe.

⁴⁰Khataoye podzüloua meihi pothou deiwuyu büa akhai teithe kia sübüa palai:

⁴¹Mai Nahpoutu nou puh vei Vedei hinou maikhe maiye mah southou peiyu maitao ea kukhe vahshi souyumai hrülaiye podzü loure donou puh vei rakivamaiye seitalai,

⁴²alia puletao nou mai sütaoye meifühi polai thouwu-a sühinou puletaosü kralai ea puletao huh sü veikükülai.

⁴³Süthaisü acheche maitaosü puletao Puo Vedei hinou teinghi büa valai. Südonou neletao hai nou bulouzü keiloukhaio!

⁴⁴“Raki Vedeihai douhinou kukhai touyu kiniye kheihaoe ea süsü mai alinou ngaoloua popaowure; süthaisü puhnou le sasholoua taho puhvei buyu veishi sü zhowu-a dakhaive dou sünasü hrüloue.

⁴⁵“Süthaia, Raki Vedeihai veishoyu muhtei sana phoutayu husoumai aliye kheihaoe,

⁴⁶alia puhnou muhtei shoyu sana ali ngaolouyu kisü, taho puhvei buyu teitei zholoua sana sünasü hrüloue.

⁴⁷“Süthaia, Raki Vedei hai zaihi laithouyu ea khah tyatyali sülouyu khahbe aliye kheihaoe.

⁴⁸Khahbe nasü lou phoupei louyu kisü, khahphou mainou süsü zaipehi süpa loure ea kou buloua khah avei taosü khahbohi luthoure ana ashi taosü polaiwure.

⁴⁹Südonou akhai teitheki-a sübülai; rakivamaitao nou tapaloua maishitaoye acheche maitao hinou lupawulai,

⁵⁰alia puletaoye sü meifühi polai thouwulai; sühinou puletaosü kralai ea puletao huh sü veikükülai.”

⁵¹Jisu nou puletao hi noue, “Haikhemai teiteihai neletao sükhai louremoe?” Puletao nou chila peie, “Ovai, süloure.”

⁵²Alia puhnou puletao hi paoe, “Südonou, raki Vedei vei rozümai soulouyu razhai dou-apeimai talihai puhvei ki hinou ashu ea aku natao popayu ki paopumai aliye kheihaoe.”

⁵³Alia Jisu nou nadataohai paochewuyu kisü, buh sühinou tare,

⁵⁴alia lah puh vei nuhduhi khaiveloua puhnou puletaoye puletao vei rathobuh hinou doupeie, alia puh chi choulouyu maitao nou khupaloua paoe, “Daikinou mai hainanou haibüyu ratsü ea khupavah haitaosü ngaolousa?

⁵⁵Puh hai süüshasüwona nahpoutu mowu? Puh pfühai Meri mowu, alia puh thaihoumai taosü Jems, Josef, Simon ea Judas mowu?

⁵⁶Alia puh tumaitao hrülai-a puhye koa bumowu? Sükulouzü daikinou mai hainanou haitao teitei hai ngaolouwe?”

⁵⁷Alia sübüa puletao nou puhye popei bare. Ana Jisu nou puletao hi paoe, “Rachi paolamai aliye hai lah puh nuh ea puh kikhamai likheihi deinou buh kukhe talihiwo louzü tsükhou moyu hae.”

⁵⁸Alia puletao nou louche moyu vanou puhnou sühisü khupa vah alaosou soukhai more.