Read Poumei Naga MATHIU 14 Bible Online

MATHIU 14 - Poumei Naga bible

MATHIU 14

¹Teile süpha kisü Galilee hi Veo Herod nou Jisu zhih hai chouloure.

²Alia puhnou puh kilai taohi paoe, “Hainahai Johan Baptist vuzübaie, puh hai thaiyu shonou hrishu loure: süvanou puh hi haibüyu khupa vah souyu khouko hai bue.”

³Daiolouzü Herod nou raiki Johanye niloure donou kharochi peie, alia puhnou Johanye rainou phuloua hukhahi thoupeie. Puhnou haisü puh thaihou Philip chapfü Herodia donou soubaie.

⁴Daiolouzü teile lihi Johan Baptist nou Herod hi paoe, “Nenou Herodia ye nalouyu hai zhaimoe!”

⁵Herod nou puhye southealou nüwe, ana puh nou Jihudimaiye piwe daiolouzü puletao nou Johanye nou rachi paolamai alie tea paoe.

⁶Ana Herod vei nayu teithe veyu kisü Herodia nah naotupainou maime teitei nghojünou dao-a do soue, alia Herod ye le sousasho peie,

⁷südonou Herod nou loumaina paihi chi lüpei-a haibüa paoe, “Nenou khoyu talihai peilai tea Enou chi lüpeiwe!”

⁸Puh pfüvei rozüa puhnou puh hi paoe, “Chu buh haihinou Johan Baptist pei hai khaoh alihi thouloua Eye peio!”

⁹Veosü levea loure, ana puhnou puh shemaitao hrülai nghojünou chi lüpeiyu vanou, loumaina paivei züpa nasü peire donou puhnou kharochi peire.

¹⁰Südonou puhnou maiye hukhahi seiho panou Johan peisü dewure.

¹¹Alia puh peihai khaoh ali hinou poveloua loumaina paihi peire, alia puhnou süsü puh pfühi povepeie.

¹²Johan rozümainou taveloua puh pfüphaosü potare, alia süsü povure; süthaisü puletao nou taho Jisu hi paongaoe.

¹³Ko haisü chuo Jisu nou choulouyu kisü puhnou buh sühinou sakhao alihi louloua puh lahnou zheihzheihyu buh alihi tare. Ana maisounou ko süsü chouloukhaie, nuhdutao hinou phinou tapoa puhthai fütare.

¹⁴Jisu nou zaipehi tapayu kisü maisou alaoye ngaoloure; alia puhnou puletaoye zhuvea sholoua puletao vei sounou maitaoye souveipeie.

¹⁵Süzhou koukhesü puh rozümaitao nou puh hi taveloua paoe, “Chuo tei naloure, alia buh haisü zheih zheihyu buh-e. Maisouye nuhtaohi seitawu-a panou lah puletao tousosü hrütouwo.”

¹⁶Jisu nou chila peie, “Puletao tayu komoe; lah neletao nou puletao toure donou touso tali peio!”

¹⁷Puletao nou puh hi paoe, “Chu Eletao bah hi buyuwo louzü raokhao pho angou ea khah ahaithe baie.”

¹⁸Jisu nou paoe, “Sütaosü Ahi poveo.”

¹⁹Süthaisü puhnou maisouye poudai phaovahi kou bure donou kharochi peie; alia puhnou raokhao pho angou ea khah ahai taosü poloua rakihi zhuloua hapeie, alia soukholoua raotaosü rozümai taohi peie ea rozümai taonou sütao hai maisouhi peie.

²⁰Mai hrülainou touloua pou phoukhai loure. Süthaisü rozümaitao nou tashu kouhli taosü sülai kiahai phou kodzüloue.

²¹Alia toulouyu maitao hai naotumai ea nahmaitao chothoumoa mai thengou phae.

²²Süthaisü puhnou maisouye seita-a bubu kinou puh rozümai taoye panou sakhaohi louloua puh jünou raia panou zai polo dovahi tare.

²³Maisouye seitayu thaisü, puh lah veachi paore donou deichi alihi tapare. Koukhe louyu phakisü, Jisu likhei sühi bubaire;

²⁴ana süphaki sü sakhao sü zaipe hinou doushoa dzü-akhühnou pfüpoa bue, daiolouzü teikhainou sünaye hüsai poa buloure.

²⁵Shona teilecho asü ea arou kole phahinou Jisu nou dzüpeinou tapoa puh rozümai taohi tave-e.

²⁶Ana puhnou dzüpeinou tayusü rozümai taonou ngaolouyu kisü pisholoua haibüa paoe, “Haisü rashibaie! alia piyuleloua shusou raoloure.”

²⁷Ana Jisu nou thala-a puletao hi paoe, “Khuveilo! Ebaie; pikhaiso!”

²⁸Süthaisü Pitar nou puh hi paoe, “Mapao, haihai ne vuzüe toulouzü, Eye panou dzüpeinou nehi takou loure donou kharochi peio.”

²⁹Jisu nou chila peie, “Takouwo!” Südonou Pitar nou sakhao hinou tapaloua dzüpeinou tapoa Jisu hi takoue.

³⁰Ana puhnou chihshoyu teikhaiye ngaolouyu kisü, puh hai pisho loure ea dzükhehi leihore. Puhnou, “Mapao, Eye khaipeio!” tea shusoua paoe.

³¹Thalasou Jisu nou puh bahsü topaloua ea puhye thaikou keloua puh hi paoe, “Oh lü taishoyu mainare, ne daidonou lekiwe?”

³²Alia puhai nou sakhao nahi talou louyu kisü teikhai sü khaitare.

³³Alia sakhaohi buyu puletao nou puhye kou khurüloua paoe, “Chechenou newo Ramai Nahpoutue!”

³⁴Alia puletao nou zai nasü tacho paloua Gennesaret hi velouloure.

³⁵Alia sühi buyu maitao nou Jisu ye shilouyu kisü, puletao nou nuh süna ngheiki buyu nuhtaohi maiye seiho-a panou sounou maiye Jisu hi save-e.

³⁶Puletao nou puh hinou sounou maitaoye panou puhvei sah noukai deikhaio tea khoe; alia süna deilouyu puletao hrülaisü veiloure.