Read Poumei Naga MATHIU 15 Bible Online

MATHIU 15 - Poumei Naga bible

MATHIU 15

¹Süthaisü Jerusalem hinou Phariseemai ea razhai dou-apeimai kamainou Jisu hi taveloua puh hinou noue,

²“Daidonou ne rozümaitao hai Eh puopaomai zhai zümoe? Daiolouzü puletao nou touyu kisü bahdzü teimoe!”

³Jisu nou puletao hi chila peie, “Neletao-a daidonou neletao puopao zhai donou Ramai chikha soukhowe?

⁴Daiolouzü Ramai nou chikha peie, ‘Nepfü nepuoye tsükhoulo,’ alia ‘Maitalinou puhpfü puhpuo chi paoshi louzü puhye sü southeawu vuzülai.’

⁵Ana neletao nou paoe, ‘Maitalinou puh pfü moa puh puo hi, nenou Ahi nou soukha ngaoloure nahai Ramai hi popeire, tea paowu louzü, puhnou puh puoye tsükhoure matsü hare.’

⁶Südonou, neletao vei puopao zhaina donou, neletao nou Ramai vei chikhahai sou poshu hako peiwure.

⁷Aveikho souyu maitaore! Isaiah nou neletao vanou rachi paopayuki daizhozhou züa paopa peisa:

⁸‘Mai haitaonou Eye puletao tai hinou tsü khoue, ana puletao lehai Ahinou doushoa bue.

⁹Hakonou puletao nou Eye thowe, daiolouzü puletao nou deiphao emai zhainou Azhai soua doupeiwe!’ ”

¹⁰Süthaisü Jisu nou maisouye puh hi kuveloua puletao hi paoe, “Keilo ea sülo!

¹¹Emai mühi louyu sünanou puhye souzhai peimoe, ana mü hinou payu sünanou puhye souzhai peiwe.”

¹²Süthaisü rozümai taonou puh hi taveloua paoe, “Nenou paoyu haina vanou Phariseemai taohai phi süloure touyu ne süsümoe?”

¹³Jisu nou chila peie, “Rakibu Apuonou shomoyu süübe tali sü maanoupu paipawulai.

¹⁴Puletaoye donou doso! Puletao hai nghichamai vei nghichayu süthai-apei maitaoe; alia nghichamai alinou nghichamai aliye süthai louzü, ahaikheinou raobvühi dulou bailai.”

¹⁵Ana Pitar nou puh hi paoe, “Eletao hi nada nasü paoshee ngaopeio.”

¹⁶Jisu nou puletao hi paoe, “Neletao-a chukoute-a sümohiwu?

¹⁷Neletao nou ngaomowu süolouzü mü hinou louyu talisü vuhi kouwe, alia sübüa pfüphao vakouhi tabaiwe.

¹⁸Ana mü hinou payu sünawo lekhe hinou pawe, alia hainanou maiye souzhai peiwe.

¹⁹Daiolouzü lekhe hinou tsü ashitao veloua sütaonou maiye southeayu, maipfü maipuoye sapayu, khulou souyu, vaoyu, amada zhopaoh souyu, alia maichi paoshiyu haitao povewe.

²⁰Maiye souzhaiyu nataosü haitaoe. Ana bahdzü teimoa touyu sünawo maiye souzhai moe.”

²¹Jisu nou buh sünasü thaowu-a Tair ea Sidon deizha hilo tare.

²²Alia zhukhaio, teidei sühi buyu Kannania tamai naotumai alinou Jisu hi taveloua shusoua paoe, “David Nahpoutu, Oh Mapao, Eye zhuvea peio, Anah naotupai hai rashinou louloua veashoa bure.”

²³Ana Jisu nou puh hi ha chila lia peimoe. Puh rozümai taonou puh hi veloua puh hinou khoa paoe, “Puhye seitawo! Daiolouzü puh nou shusou raoloua Eletao thaifüa laiwe!”

²⁴Süthaisü Jisu nou chila peie, “Eye hai Israel kikhavei hawuyu zhaokhemai taohi likhei seivebaie.”

²⁵Sühinou naotupainou takou puhphi hinou duloua paoe, “Mapao, Eye soukha peio!”

²⁶Jisu nou chila peie, “Nahmai vei raokhao hai poloua süsü seitaohi polai peiyu zümoe.”

²⁷Naotupainou chila peie, “Süsü chekhaoe, Mapao; ana seitao koutenou-a puletao paopumaitao vei arübuh hinou tourai kouyutao touwe.”

²⁸Süthaisü Jisu nou puh hi chila peie, “Oh naotupai, nehai lü dushoyu naotumai alie! Nenou züpayu thaifüa süsü nehi souloutheo.” Alia sübü hinou puhnah paisü veiloure.

²⁹Alia Jisu nou buh süsü thaowu-a Galilee zaipelo vanou tare. Alia puhnou deichi ali vahi tapaloua sühinou kou buloure.

³⁰Mai alaonou puh hi tave-e ea puletao nou phi chamai, shovaimai, nghichamai, la hamai ea kukhe sounoumai taoliye Jisu phihi save khaipeire, alia puhnou puletaoye souvei peire.

³¹Südonou la hamainou la phalouyu, shovai mainou veilouyu, phi chamainou talouyu, alia nghicha mainou ngaolouyu sütaohai maikhemai nou ngaolouyu kisü khupa loure; alia puletao nou Israelmai vei Ramaiye paoshore.

³²Süthaisü Jisu nou puh rozümaitaoye puh hi kuveloua paoe, “Enou maisou haitaoye zhuveasho loure, daiolouzü puletao nou Eye koa teithe asü bukoure ea chuo halia toure hare; alia Enou puletaoye pouzüa seitayu sü züpa moe, daiolouzü puletao hai du hinou houshulai.”

³³Rozümaitao nou puh hi noue, “Eletao nou radeikee haihinou daikinou ho maisou haitaoye vailou süyu raokhao ngaoloulai?”

³⁴Jisu nou puletao hi noue, “Neletao hi raokhao pho kizho buwe?” Puletao nou chila peie, “Raokhao pho anai ea khahtai daotu bue.”

³⁵Südonou Jisu nou maisouye deiphi hinou kou chobu loure donou kharochi peire.

³⁶Süthaisü puhnou raokhao pho anaitao ea khah taosü poloure ea Ramai hi kalo paowu-a sütaosü soukhore ea süthaisü rozümai taohi peire; alia rozümai taonou sütaosü maisouhi peire.

³⁷Puletao hrülainou touloua pou phouloure; alia toushoyu koulih taohai rozümaitao nou tashu sülai anai phou pokodzü loure.

³⁸Toulouyu puletao hrülai sü naotumai ea nahmaitaoye chothoumoa mai the adaie.

³⁹Süthaisü Jisu nou maisouye seitawu-a puh sü sakhao alihi louloua Magadan teidei hilo tare.