Read Poumei Naga MATHIU 19 Bible Online

MATHIU 19 - Poumei Naga bible

MATHIU 19

¹Chuo Jisu nou chi haitaosü paocheyu kisü, puhnou Galilee hinou taloua Jordan rei polo dova Judea teidei hilo loutare.

²Alia mai alaonou puhthai füloure ea sühinou puhnou puletao sou souveipeie.

³Phariseemai kamainou puh hi taveloua puh mah phoupa loure donou puh hi noue, “Qo tali vanou mai linou puh chapfüye ralou veiyu razhai buwu?”

⁴Jisu nou chila peie, “Neletao nou sheeyu larübvü hinou phoumowu süolouzü shurai hinou emaiye soupeiyu Sou-apeio puhnou poutu ea naotuye soupeie.

⁵Alia Ramai nou paoe, ‘Qo haina vanou poutuna nou puh puo ea pfüye thaowu-a puh chapfü koa lou zholoulai, alia puhai sü vasouli soubailai.’

⁶Südonou puh haisü ahai khaimore ana vasou ali baire. Südonou Ramai nou podzüpei khaitouyu nasü maiye panou soukhowu laimoe.”

⁷Phariseemai taonou puh hi noue, “Sütoulouzü daidonou Moses nou rayu vei aepei larüli puh chapfühi peiwu-a puhye vakouhi seita-a bailai tea chikha peiwe?”

⁸Jisu nou puletao hi chila peie, “Neletao le khouleyu vanou Moses nou neletao hi neletao chapfümaiye rayu hai aetou peibaie, ana shurai hiwo louzü sübümoe.

⁹Alia Enou neletao hi paowe, süolouzü maita linou puh chapfüye khulou souyu likhei vanou deinou kukheli vanou rawu louzü ea naotu kukhe aliye nalouzü mai chapfüye sapare.”

¹⁰Puh rozümai taonou puh hi paoe, “Sükuyu hai chaa ea puh chapfü kolehi buyu thaiwo sheemoyu nou veikou baire.”

¹¹Ana Jisu nou puletao hi chila peie, “Doupeiyu haina hai mai hrülainou polou hoe, ana Ramai nou haina peikhai touyu puletao likhei bailai.

¹²Daiolouzü kamaihai puletao pfü pou hinou sübüa nakouyu vasou-damai bue, alia kamainou emainou souda peiyu vasou-damai bue, alia kamainou Raki Vedei donou lah paomainou vasou-damai soulouyu-a bue. Doupeiyu haina polou süyu puhye panou haina hai poloukhaio.”

¹³Süthaisü mai kamainou nahmaitaoye saloua Jisu ye panou puh bahnou puletao pei hi deiloua puletaoye veachi paopeire donou puh hi save, ana rozümaitao nou maikhe maiye züpeie.

¹⁴Ana Jisu nou paoe, “Nahmai taoye panou Ahi kouwo, alia puletaoye nuso, daiolouzü raki Vedeihai haibüyu maitao veie.”

¹⁵Alia puhnou puh bahnou puletao peiva deipeie ea süthaisü puh sü tare.

¹⁶Alia zhukhaio, mailinou Jisu hi taveloua puh hinou noue, “Dou-apeio, teisa ahri ngaoloure donou Enou dai avei vah souvu zülai?”

¹⁷Alia Jisu nou puh hi chila peie, “Nenou daidonou Ahinou veiyu vanou nouwe? Veiyuhai mailikhei bubaie. Nenou ahri buh hi lounü louzü chikha taosü zülo.”

¹⁸Puhnou noue, “Chikha kataoe?” Jisu nou chila peie, “Maiye southeaso, khulou souso, vaoso, mada-a chi lapeiso,

¹⁹nepuo nepfüye tsükhoulo, alia nelah neye leshiyu büa kinapaye leshilo.”

²⁰Nahlemai pounanou puh hi chila peie, “Chikha haitao teitei Enou züloure; chu E dai chemoyu bue?”

²¹Jisu nou puh hi paoe, “Nenou liche nülouzü, tawo, alia nevei buyu veishi zholaiwu-a pousha nasü toure haimai hi peio, alia rakihi nevei kini buloulai; süthaisü taveloua Athai fülo.”

²²Nahlepouna nou haisü chouloukhaie, puh sü leveasholoua tare; daiolouzü puh hai hani shoe.

²³Süthaisü Jisu nou puh rozümai taohi paoe, “Enou neletao hi chekhaoa paoe, hanimaili donou raki Vedeihi velouyu hai tatei sholai.

²⁴Enou neletao hi paopue, hanimai alinou Ramai Vedeihi veloure jüwo racho alinou pei kulu hi tailouyu sünanou tala hie.”

²⁵Rozümai taonou chi haisü choulouyu kisü puletao sü khupa shouloua noue, “Sükuyu thaisü thaohmainou khailulou sülai?”

²⁶Ana Jisu nou puletao hi zhuteiloua paoe, “Maiye donou haisü soulouhoe, ana Ramaiye donou louzü ha teitei hai soulou süe.”

²⁷Süthaisü Pitar nou paoe, “Zhukhaio, Ehnou ha teitei thaowu-a nethai füloure. Süthaisü Ehnou dai ngaolai?”

²⁸Jisu nou puletao hi paoe, “Enou neletao hi chechenou paoe, deiphao ashu nahi Mai Nahpoutu nou puh vei khouko ava vebuh hi bulouyu kisü, Athai fülouyu neletao-a Israel nahmai khü kiahaiye chiku-a vebuh kiahai hinou bulai.

²⁹Alia Eye donou ki-lu moa tu-poumaitao moa pfüpuomai moa nahmaitao moa teidei thaoyu mai hrülainou zha kaihli kou-a ngaolai, alia teisa ahri ngaoloulai.

³⁰Ana chu raikaiyu mai alaosou nakaita bailai, alia chu nakaiyu taonou raikai talai.