Read Poumei Naga MATHIU 2 Bible Online

MATHIU 2 - Poumei Naga bible

MATHIU 2

¹Jisu ye sü Herod nou veo soua bubuki Judea teidei hi buyu Bethlehem nuhdu hinou naloue. Süthaisü thashoa teinghi palova tsüsü mainou Jerusalem hi tave loure ea haibüa noue,

²“Jihudimai veo soure donou nakhai touyu nahtu sü daiki bue? Daiolouzü Eletao nou teinghi palonou puh vuh payu ngaoe, ea puhye thore donou Eletao sü tavewe.”

³Herod Veo nou ko süsü chouloukhaie, puh ea Jerusalem hi bumai hrülaisü leveasho loure.

⁴Puhnou napao adumaitao ea razhaidou-apeimai taoye kuve dzüloua puletao hinou, “Khrista hai daikinou nalai?” tea noue.

⁵Puletao nou chila peie, “Judea hi Bethlehem hinoue, daiolouzü rachi paolawo nanou haibüa rüre:

⁶‘Juda teideihi buyu O Bethlehem, newo Juda teidei hi buyu nuhdutao hinou taikhana moe; daiolouzü nehinou veomai ali velai ea puhnou Amai Israelmai taoye khopeilai.’ ”

⁷Südonou Herod nou teinghi palova tsüsü maitaoye kuloua kheia daoloure ea puletao hinou kapha hinou vuh nasü pangaolai touyu sü sütou loure.

⁸Süthaisü puhnou haibüa puletao hi paopuwu-a puletaoye Bethlehem hi seitare: “Tawo ea nah sünaye sü soutaosoua phoulo ea neletao nou puhye ngaolouyu kisü Eye-a panou sülo, daiolouzü E-a taho puhye tholai.”

⁹Alia puletao nou Veonou paoyu keiloua puletao veih duhi tare; alia zhukhaio, teinghi palovanou puletao nou ngaoyu teivuh nanou nah sünanou buyu buh sühi ve chaomo koutesü puletao jünou rai-a tapeie.

¹⁰Puletao nou teivuh sünasü ngaolouyu kisü, puletao sü alaosou sa-valoure.

¹¹Puletao nou ki sünahi tave louloure ea nah sünaye puh pfü Meri nou koa buyu sü puletao nou ngaoloua kikou khoukhü loure ea puhye kou khurü loure. Puletao nou puletao vei kinitao sü hapaloua puh hisü sana, kaivei theadzü ea kaivei pounou posheelae.

¹²Süthaisü puletao nou ludu kukheli hilonou puletao teidei hilo tare, daiolouzü Ramai nou puletaoye mekounou Herod hi dakhai veso tea tukhapeie.

¹³Puletao nou talouyu thaisü Mapao vei rakivamai alinou Josef mekouhi veloua puh hi paoe, “Herodnou nah sünaye southeare donou phoulaire. Südonou kaishulouwo ea nah sünaye puh pfüye koa saloua Ejipt hi tutawo ea Enou khaitawo tea paopeimo koutesü sühinou buwo.”

¹⁴Josef nou kaishuloua nah sünaye puh pfüye koa saloua khei hinou Ejipt hi tare,

¹⁵alia sühinou puh nou Herod thaimosa koutesü bue. Haisü Mapao nou rachi paolawonaye panou paopayu, “Ejipt hinou Enou Anah Poutuye kuloue” touyu sü vetere donoue.

¹⁶Herod nou puhye hai teinghi palova tsüsümai taonou lawure touyu sülouyu kisü puhsü rarousho loure. Puhnou Bethlehem hi ea süna ngheiki hi buyu nuhtao hi nahpoutumai po ahai payu ea sü khehi buyu hrülaiye southeare donou kharochi peire, haihai puhnou tsüsümaitao hinou teivuh sünanou payu phateile sülouyu thaifüa soue.

¹⁷Haibüa rachi paolawo Jeremiah nou paoyu sü vete loure:

¹⁸“Ramah hinou paili choue, süsü kouli liyu ea dopfüa krayu paie. Rachel nou puh nahmaitao donou krawe; puhye le sousa peiyu hai bae, daiolouzü puletao sü thaikhaire.”

¹⁹Herod nou thaiyu thaisü, Ejipt hinou Mapao vei rakivamai alinou Josef mekou hinou vengaopeia paoe,

²⁰“Kaishulo, nah süna ea puh pfüye saloua Israel teidei hi dakhai vewo, daiolouzü nah sünaye southeare donou phouyu maitao sü thaikhaire.”

²¹Südonou Josef nou kaishuloua nah süna ea puh pfüye saloua Israel teidei hi dakhai vere.

²²Ana Josef nou Herod nah Arkelia nou puh puo süh Judea hi veo soua bue touyu ko chouloua, sühi tavekhai pire. Alia puhye mekou hinou ve doupu peiyu vanou puh hai Galilee teidei hi tare

²³ea Nazareth tea kuyu nuhdu hinou ve hrüloure. Alia haibüa rachi paolamaitao nou paoyu sü veteloure: “Puhye sü Nazareth hi mai tea kulai.”