Read Poumei Naga MATHIU 21 Bible Online

MATHIU 21 - Poumei Naga bible

MATHIU 21

¹Alia Jisu ea puh rozümai taonou Jerusalem hi takou ngheiyu kisü Oliv deichi hi buyu Bethphage nuhduhi tave loure. Sühinou Jisu nou rai-a rozümai ahaiye seitare,

²alia puhaihi haibüa paopeie, “Nehai nghojühi buyu nuh nahi takouwo, alia thala-a nehainou rheisüh küliye puh toutuye koa khikhai touyu sü ngaolai; sühaiye rai pheipa loua Ahi süthai vepeio.

³Alia maitalinou nehaihi hatali chi paolouzü puh hi, ‘Mapaowo nou haihaisü moshi laiyu bue;’ tea paokhaio; alia sübühinou puhnou sühaisü seive peilai.”

⁴Haihai rachi paolawo nanou paopayu nasü panou vetere donou haibüa paloure, süolouzü:

⁵“Zion nah naotupai hi paokhaio, zhukhaio, nevei veo sü nehi tavewe! Puhwo nataiwe ea rheisüh ali pfüwe alia rheisüh süsü toutoue.”

⁶Südonou rozümai sühainou taho Jisu nou puhaihi paopeiyu büa soure.

⁷Puhainou rheisüh kü ea toutunaye süveloua sühai phao vahi puletao vei sahbanou khupeire, alia Jisu nou pa buloure.

⁸Maikhemai poulonou puletao vei sahbanou luduhi khupeie ea kukhetaonou süübe vanou süübotao saoloua sütaonou ludu hi khupeie.

⁹Alia Jisu thai-jü hinou ta-a buyu maisou taonou shusoua raoe, “David Nahpoutu hisü Hosana! Mapaowo zhih hinou velouyu puh hai rakoveie. Aku kulaiwo hisü Hosana!”

¹⁰Alia Jisu nou Jerusalem hi talouyu kisü, nuhdu hi buyu mai hrülaisü bvüroloua haibüa noue, “Puh hai thaoh-e?”

¹¹Maisoutao nou chila peie, “Puh hai Galilee hi Nazareth hinou veyu rachi paolawo Jisu süe.”

¹²Alia Jisu nou Rathoki hi talouloua sühinou na zho-a ea hrüa bumai hrülaiye hutare. Puhnou shano leayumai taovei arübuh tao ea rahou zhoyu maitao vei buhnaa taosü popeishou laire,

¹³alia puhnou puletao hi paoe, “Haibüa rükhaitoue, ‘Akihai veachipao ki tea kulai.’ Ana neletao nou haihai maivei shaotoumai tutsübuh souloure!”

¹⁴Nghichamai ea shovai maitao nou puh hi taveloua rathoki hinou puhnou puletaoye souvei peie.

¹⁵Ana napao adumaitao ea razhai dou-apeimai taonou puhnou khupa vahtao souyu ngaoloua ea nahmaitao nou rathoki hinou, “Hosana David Nahpoutu hisü!” tea shayu pai chouloua rarousho loure.

¹⁶Südonou puletao nou Jisu hi noue, “Puletao nou paoa buyu ne chouchoumoe?” Jisu nou puletao hi chila peie, “Ovai, choue; neletao nou haibüa phoukhai mohiwu, ‘Nenou nahmaitao ea nahpumaitao mü hinou paoshoyu hai southou liche peiwure.’”

¹⁷Alia Jisu nou puletaoye thaowu-a tare ea nuhduna hinou tapaloua Bethani hi tare ea süzhou kheisü sühinou ve naie.

¹⁸Thainaisho shonahi puhnou nuhduhi dakhai kouyu kisü, puh sü houloure.

¹⁹Alia puhnou dupe hinou doushi beli ngaoloua sühi takoue, ana süva hisü sünghou baideinou halia ngaolou moe. Südonou puhnou süübe nahi paoe, “Nehinou shi lia shipu khaiso!” Alia sübü hinou doushi be nasü kirüh tare.

²⁰Rozümai taonou süsü ngaolouyu kisü khupa loua paoe, “Kabüa doushi be nasü thala-a kirüh taresa?”

²¹Jisu nou puletao hi chila peie, “Chekhaoa Enou neletao hi paoe, süolouzü neletao nou lüloua lekikhai molouzü, neletao nou Enou doushi bevahi soukhai touyu süna likheithe soubaimoa, deichi haina hai, ‘Mipoa zaihi zhaolouwo,’ tea paolouzü süsü souloulai.

²²Alia neletao nou louche-a bulouzü, neletao nou veachi pao-a khoyu talihai ngaoloulai.”

²³Alia puhnou rathokihi tave louyu kisü, napao adumaitao ea tsükhemai taonou puhnou doupeia bubukinou puh hi taveloua noue, “Vah haitao souyu nevei zü daibue? Thaohnou nehi zü haina hai peie?”

²⁴Jisu nou puletao hi chila peie, “E-a neletao hi chili noulai, alia neletao nou Ahi chila peilouzü, E-a neletao hi vah haitao souyu Azü dai bue touyu paongaolai.

²⁵Johan vei dzükhao dayuhai daikinou ve-e? Sünahai rakinou veho, mai hinou ve-e?” Alia lah puletao hronou veiva-a paoe, “Eletao nou ‘Rakinou ve’ tea chila peilouzü, puhnou ‘Sükulouzü neletao daidonou puhye louche moe?’ tea Eletao hi paokhailai.

²⁶Ana Eletao nou, ‘Mai hinou ve’ tea paokhai louzü, Eletao sü maisouye ngaopeie; daiolouzü mai hrülainou Johanye nou rachi paolamai alie tea powe.”

²⁷Südonou puletao nou Jisu hi chila peie, “Eletaowo sümoe.” Alia puhnou puletao hi paoe, “Sükulouzü E-a neletao hi vah haitaohai dai zü bua Enou sousa touyu hai paongao laimoe.

²⁸“Chuo neletao nou dai chowe? Teile lihi mai alivei nahpoutumai ahai bue; alia puhnou tsünahi taveloua paoe, ‘Anahpoutu, zhou darkha kipei hi taho vah souwo!’

²⁹Alia puhnou chila peie, ‘E talaimoe,’ ana thaikhai hinou puhnou ledaloua tare.

³⁰Süthaisü puonou napuhi taveloua sükheihao-a paokhaie; alia puhnou chila peie, ‘Puo, E talai,’ ana puhsü tamoe.

³¹Puhai hi kananou puh puo vei leli soue?” Puletao nou chila peie, “Tsüna noue.” Südonou Jisu nou puletao hi paoe, “Chechenou Enou neletao hi paowe, neletaojü rai-a kikha khamai ea khakhamai taonou Ramai Vedeihi vetare,

³²daiolouzü Johan Baptist nou neletaoye acheche ludu ngaopeia neletao hi tave, alia neletao nou puhye louche peibae; ana kikha khamaitao ea khakha maitao nou puhye loucheloue; alia neletao nou süsü ngaoyuma neletaosü thaikhai hi-a le daloua puhye louche peimoe.

³³“Nada kukheli keikhaio. Teile alihi darkha kipei ali koyu ki paopumai ali bue, alia süna pehao hisü bokhanou khahaore, alia sühisü darkha dzü sühre donou deibvüli raokhaire, alia reihkhaobuh ali soukhaire, alia sünasü panou kipei khomaitaoye souloua teidei akuhi vetare.

³⁴Darkha rashi haiyu teile veyu kisü, puhnou puh kilaimai taoye puhvei zha poloure donou kipei khomai taohi seive.

³⁵Kipei khomai taonou puhvei kilai taoye niloua aliye dapeire, kukhe aliye southeare, alia kukhe aliye chuhnou deipeire.

³⁶Süthai-a raikivei jünou koua puhnou kukhe kilaimaitaoye seive; alia kipei khomai taonou puletao hi-a raiki vei büa soupeire.

³⁷Akhai khailai hinou puhnou puh nahpoutuye puletao hi haibüa paoa seive, ‘Puletao nou Ana poutuye tsükhou peishulai.’

³⁸Ana kipei khomai taonou nahpoutu sünaye ngaolouyu kisü, lah puletao hronou haibüa paoe, ‘Haihai paopuwo nahpoutue; tavelo, Eletao nou puhye southeawu laikhe, alia puhvei kinitao hai Eletao nou ngaoloulai!’

³⁹Südonou puletao nou puhye sü niloure, alia puhye darkha kipei vakouhi süthaipaloua southeawure.

⁴⁰“Chuo, darkha kipei paopuwo nou veyu kisü, puhnou kipei khomai taohi dai soulai?”

⁴¹Puletao nou puh hi chila peie, “Puhnou veimosoua maishi sütaoye southealai, alia darkha kipei nasü darkha cha chiyuki puhvei zha peilaiyu kukhe kipei khomai taohi souwulai.”

⁴²Jisu nou puletao hi paoe, “Neletao nou sheeyu larübvütao hinou haibüa paoyu hai phoukhai mohiwu? ‘Ki souyu mainou lulaiyu chuh nasü kukhe veishi jünou matsüyu ki kainghouvei chuhna souloure. Haisü Mapaowo vei bahsha baie; ea haihai Eletao nghojünou khupa shoe.’

⁴³“Südonou Enou neletao hi paowe, Ramai Vedeihai neletao hinou potawulai ea sünavei rashi panou shilaiyu tahrüh kukhe lihi peiwulai.

⁴⁴(Alia maita linou chuh haina phaonou dulouzü puhsü zhusasawulai; ana chuh sünanou maitali pei hi dekou louzü, sünanou puhye reisasawulai.”)

⁴⁵Napao adumaitao ea Pharisee maitao nou Jisu vei nadatao choulouyu kisü, puhnou puletao vanou paobaie touyu hai süloure,

⁴⁶südonou puletao nou puhye niloure donou te-e. Ana puletao nou maisouye piloure, daiolouzü maikhe mainou puhye hai rachi paolamai alie tea powe.