Read Poumei Naga MATHIU 22 Bible Online

MATHIU 22 - Poumei Naga bible

MATHIU 22

¹Süthaia Jisu nou nada nou pao-a maikhemai hi haibüa paoe,

²“Raki Vedeihai vemai alinou puh nahpoutu sheeyuki tovai peiyu sünaye pao nadalou veie.

³Puhnou rai-a sheenghiyu vaibuh hi kukhai touyu shemaitaoye kuloure donou puh kilaitaoye seitae, ana puletao nou venükhai more.

⁴Süthaia puhnou shemaitaoye donou kilai kukhetaoye haibüa paoa seitae, ‘Raia kukhai touyu puletao hisü paokhaio, zhukhaio, Avei tovai nasü souda chewure, Achodetao ea hrü veiyu chotou taosü datheare, alia ha teitei souda chekhaire; sheenghiyu nühbuh hisü taveo!’

⁵Ana raia kukhaitouyu shemaitao nou li lapa loure ea lah kuku vah hi tare; alinou puh douhi tare, kukhe alinou puh vei hubuh hi tare,

⁶kukhemai taonou puh kilaitaoye niloua dapeire ea southeare.

⁷Veosü lekhasho loure, alia südonou puhnou puh reihmai taoye seiho maiye southeayu taoye southeare ea puletao vei nuhdu nasü meinou deilaire.

⁸Süthaisü puhnou puh kilaimaitaoye kuloua puletao hi paoe, ‘Avei sheenghiyu tovai sü souda chere, ana raia kukhai touyu maitao hai sühi vezü more,

⁹südonou chuo neletao nou luducho liki taho maingaodao veishiye sheenghiyu vaibuh hi kuvekhaio.’

¹⁰Südonou kilai maitao nou duvahi taholoua puletao nou ngaodao mai hrülai süolouzü maivei maishi pfüphou kheihaoa kusave dzüloure; alia sheenghiyu buh sü shemainou tave phoupei loure.

¹¹“Ana Veonou tave loua shemaitaoye zhuyu phakisü, mai alisü sheenghiyu sabanüh banoumoa sühinou buyu ngaoloure;

¹²Südonou puhnou puh hi paoe, ‘Asana, ne sheenghiyu sabanüh banoumoa kabüa haihi velouloue?’ Alia mai sünasü chilia paomore.

¹³Süthaisü Veonou kilaimai taohi paoe, ‘Puh phibah phulo, alia puhye vakou maiyu buh hi polai pawo. Sühinou puh sü kralai ea puh hu veikükülai.’”

¹⁴Alia Jisu nou khaisoua paoe, “Mai alaoye kue, ana mai daotua doloubaie.”

¹⁵Süthaisü Phariseemai taonou taho kabüa Jisu vei chipao hinou puh mah phoupalou laisa tea khailoure,

¹⁶süthaisü puletao nou puletao vei rozümai kamai ea Herod mai kamaiye koa puh hi seive, alia puletao nou paoe, “Dou-apeio, nehai chechechi paowe ea nenou Ramai ludu hai cheche hinou doupeiwe touyu ea nenou maitali donou domoe touyu hai Ehnou süwe; daiolouzü newo maipah zhumoe.

¹⁷Südonou nenou choyu nasü Eh hi paongaokhaio. Kaisar hi kikha peiyu hai razhai thaifüa ae touho mo touwe?”

¹⁸Ana Jisu nou puletao vei do ashi nasü süloua paoe, “Aveikho soumaitao! Daisoua Azhai zhuwe?

¹⁹Kikha peire husha nasü Ahi pongaokhaio!” Südonou puletao nou puh hi husha nasü pove,

²⁰alia puhnou puletao hi noue, “Haihai thaohvei zhue ea thaohzhih rüthou khaitoue?”

²¹Puletao nou chila peie, “Kaisar veie.” Südonou Jisu nou puletao hi paoe, “Sükulouzü veire, Kaisar vei taosü Kaisar hi peio, alia Ramai vei taosü Ramai hi peio.”

²²Puletao nou süsü choulouyu kisü, khupa loure alia puletao nou puhye thaowu-a tare.

²³Teithe süzhou hrishuyu hae tea paoyu Sadukimai taonou puh hi tave; alia puh hinou chili noue,

²⁴“Dou-apeio, Moses nou paoe, ‘Maita linou tou-nah ha-a thaita louzü puh thaihounou maisüna chapfüye nayu chie, alia sübüa nahmai panou hrüloua puhye sü thaitayu mai sünavei tou-nah tea polai.’

²⁵Chuo buh haihinou hrüa buyu chinamai anai bue, tsükhana sü nashee loure ea nahmai ali-a ha-a thaire, südonou puh chapfüye sü puh thaihou hi thaodai peire.

²⁶Sübüa ahai chena hia, asü chena hia ea anai chenahi koute sü kheihao loure.

²⁷Puletao hrülai akhai hisü, naotupai-a thaire.

²⁸Chuo hrishuyu teithe kisü naotupai sünasü thao chapfü soulai? Daiolouzü puletao hrülainou puhye nakhaitoue.”

²⁹Ana Jisu nou puletao hi chila pei, “Neletao hai mahshore, daiolouzü neletao nou sheeyu larübvütao moa Ramai vei khouko alia sümoe.

³⁰Daiolouzü hrishuyu kisü puletaosü sheenghi laimoe, ana rakivamai bübailai.

³¹Alia thaimainou hrishuyu vanou Ramai nou haibüa paokhai touyu neletao nou phoukhai mohiwu?

³²‘E hai Abraham, Isak ea Jakob vei Ramaie,’ Puh sü thaimai Ramai moe, ana ahrimai veie.”

³³Maisounou chipao süsü choulouyu kisü, puhvei doupeiyu hinou puletao sü khupasho loure.

³⁴Ana Jisu nou Sadukimai taoye paoposhu chila souhare touyu sü Phariseemai taonou choulouyu kisü puletao sü tave dzüloure.

³⁵Alia puletao hrohinou Razhai dou-apeimai alinou Jisu zhai zhure donou puh hi chili noue.

³⁶“Dou-apeio, Razhai hrohinou chikha kananou dukae?”

³⁷Jisu nou puh hi chila peie, “‘Nenou Mapao ne Ramaiye nele teiteinou, ne rako teiteinou, alia netsü teiteinou leshilai,’

³⁸Hainanou dudulai ea raikaiyu chikhae.

³⁹Alia matsü kayu chikha ahai chenasü haikue: ‘Nenou ne kinapaye lah neye leshiyu büa leshilai.’

⁴⁰Chikha haina hai hinou Moses vei Razhai teitei ea rachi paolamaitao vei doupeiyu teitei vüa bue.”

⁴¹Chuo Pharisee maitao nou vedzüa buyu phakisü, Jisu nou puletao hi chili noue,

⁴²“Khrista vanou neletao dai chowe? Puh hai thaohnahpoutue?” Puletao nou puh hi paoe, “David Nahpoutue.”

⁴³Jisu nou puletao hi paoe, “Sükulouzü kabüa Rakonou süpeia David nou puhye ‘Mapao’ tea kuwe? Süolouzü,

⁴⁴‘Mapao nou A Mapao hi paoe: Enou ne ngaoba maitaoye sü pove ne phihea soupeimo sasü, Abahkha zhoulo hinou bulo.’

⁴⁵Sübüa David nou puhye sü ‘Mapao’ tea kukhai louzü, kabüa puhsü David Nahpoutu khailai?”

⁴⁶Alia mailinoua Jisu hi chila ali koutea peilou hore, alia teithe süzhou thainou maili koutea khuveia puh hi chilia noupukhai more.