Read Poumei Naga MATHIU 23 Bible Online

MATHIU 23 - Poumei Naga bible

MATHIU 23

¹Süthaisü Jisu nou maisou ea puh rozümai taohi paoe,

²“Razhai dou-apeimai ea Phariseemai taonou Moses vei buh hi bue.

³Südonou puletao nou neletao hi paoyu pfüphou louzü soulo ea reihlo, anou puletao nou souyu dowo souso, daiolouzü puletao nou paodoue ana soumoe.

⁴Puletao nou süshoyu ea pfülou hoyu kou souloua maikhemai phaohi pokapeiwe; ana lah puletaowo louzü bahtouli koutea sütaoye dei-a deilaimoe.

⁵Puletao nou puletao vah taohai maiye panou ngaoloure donou soubaiwe. Puletao puhi ea baohi lichopfübvü khiyupfüa tayu zhukhaio, alia süloukhaio, sütaohai daizhozhou dusa! Alia puletao vei sahzha taohai daizhozhou shosa, süloukhaio.

⁶Puletao nou nühbuh hi mainou tsükhouyu buh ea rathobuh hi buh avei tao hai züpae,

⁷alia maikhe maiye panou puletaoye hupobuh khonou khurüyu ea ‘Dou-apeio’ tea kuyu puletao nou züpae.

⁸Ana neletaowo louzü panou ‘Dou-apeio’ tea kuwuso, daiolouzü neletao vei ‘Dou-apeio’ alikhei bubaie, alia neletao hrülai hai thaihou jürai baie.

⁹Alia deiphao hinou maitaliye nou neletao ‘Puo’ tea kuso, daiolouzü neletao Puo hai rakihi buyu puh likhei baie.

¹⁰Moa neletaoye panou ‘Paopu’ tea kuwuso, daiolouzü neletao vei paopu hai Khrista likhei baie.

¹¹Neletao hrohinou dudulai nanou neletao kilai soulai.

¹²Maita linou lahye lidua bulouzü puhye sü soutaiwulai, alia maita linou lahye litaia bulouzü puhye sü soudu peilai.

¹³“Ana aveikho souyu razhai dou-apeimai ea Phariseemai, neletao donou daizhozhou ngaopisa! Daiolouzü neletao nou raki Vedei kikhu nasü maikhemai nghojünou khunure; alia lah neletao koutea taloumoe, moa taloulai tea tayu maitaoye-a panou neletao nou loubae.

¹⁴(Aveikho souyu razhai dou-apeimai ea Pharisee maitao, neletao donou daizhozhou ngaopisa! Neletao nou meamaipfü taovei ki-lu saoloua sünasü kukhai loure donou mai nghojünou veachi paosho showe! Südonou neletao nou shishilai tudee nasü ngaolai!)

¹⁵“Aveikho souyu razhai dou-apeimai ea Phariseemaitao, neletao donou daizhozhou ngaopisa! Daiolouzü neletao nou maitaliye le souda loure donou zaipeinou ea teideitao hinou tawe; alia mai alinou le dalouyu kisü, neletao nou puhye lah neletao kua panou meizai hi loulouvei zha ahai soukou peiwe.

¹⁶“Nghichayu süthai-apeimaitao, neletao donou daizhozhou ngaopisa! Neletao nou haibüa douwe, ‘Maita linou rathoki sathoua chouyuma, süsü halia moe; ana puhnou rathoki vei sana sathoua choulouzü puhye sü phuwure.’

¹⁷Nghichayu vomaitao! Sana nanou dukou hiho, sanaye soushee peiyu rathoki nou dukoue?

¹⁸Alia neletao nou paoe, ‘Maita linou sheelabuh sathoua chouyuma halia moe; ana puhnou sheelabuh hi buyu posheela na nasü sathoua choulouzü puhye sü phuwure!’

¹⁹Nghichayu maitao! Posheelayu na nanou dukouho posheelayu na naye soushee peiyu sheela buh nanou dukoue?

²⁰Südonou sheelabuh sathoua chouyu puhnou sünaye ea sühi buyu na teitei-a loua chouthoure;

²¹alia rathoki sathoua chouyu puhnou sünaye ea sühi buyu Ramaiye-a koa chouthoure;

²²alia raki sathoua chouyu puhnou Ramai Vebuh ea sühi buyu puhye-a koa chouthoure.

²³“Aveikho souyu razhai dou-apeimai ea Phariseemaitao, neletaoye donou daizhozhou ngaopisa! Daiolouzü neletao nou Ramai hi kainü veiyu vupoutao süolouzü, naipou, kiko ea naipyawo louzü zha kirou hinou zhali posheelae, ana neletao nou razhai hinou matsü shoyu natao süolouzü checheyu, zhuvea peiyu ea loucheyu sütaohai ngaophoukhai more. Kukhetao-a ngaophou moyu soumoa neletao nou haitaohai soulouyu phae.

²⁴Nghichayu süthai-apei maitao! Neletao nou khaomaipütou louzü neletao pai hinou houngpawu-a rachowo louzü kai-a zaoloure!

²⁵“Aveikho souyu razhai dou-apeimai ea Phariseemai, neletao donou daizhozhou ngaopisa! Daiolouzü neletao nou pai-khao phaovahi louzü sousheewe, ana sütao levaihi louzü maivei pitouyu ea loküshoyu nou phoukha-a bue.

²⁶Nghichayu Phariseemai! Paikhao phaovatao panou sheeloure donou raia levai taohai sousheelo.

²⁷“Aveikho souyu razhai dou-apeimai ea Phariseemaitao, neletao donou daizhozhou ngaopisa! Daiolouzü neletao hai vakouhi louzü zhaivei shoyu ana lekhehi louzü thaimai raonou ea ta-ngiyu nou phoupeia buyu kaadzü noukhai touyu khühtao kheihaoe.

²⁸Süzhaibütoua neletaoa vakouhiwo louzü maikhemai hi acheche zhai tangaoe, ana neletao lekhehiwo louzü aveikho souyu ea mahnou phoupeia bue.

²⁹“Aveikho souyu razhai dou-apeimai ea Phariseemaitao, neletao donou daizhozhou ngaopisa! Daiolouzü neletao nou rachi paolamai taovei khüh souwe, alia achechemai taovei khüh kitao maitou peiwe;

³⁰alia neletao nou paoe, ‘Eletao hai Eletao puopaomai teile phahinou hrüa buyukowo, puletao nou rachi paolamai taoye southeayu hi koa lou zhangaozho paimoe.’

³¹Südonou neletao nou neletao hai rachi paolamai taoye southeayu maitao vei nahmaitaoe touyu hai lah neletao-a aetouwe.

³²Sükulouzü, neletao puopaomai taonou soushuyu mahvah nasü souchewo!

³³Nghoutao ea nghouvo tyaonah taore, neletao nou daikinou meizai vei tudee ngaore hinou tupalou khailai?

³⁴Südonou Enou neletao hi rachi paolamaitao, tsüvei maitao ea razhai dou-apeimaitao seivelai; neletao nou puletao kamaiye southealai, kamaiye veathealai, alia kamaiye neletao vei rathobuh khonou dapeilai ea nuhdu lih kinou hukou-hukhelai.

³⁵Sükuyu vanou mah hayu Abelye southeayu hinou shua neletao nou Rathoki ea posheelabuh kole hinou southeawuyu Berakia nahpoutu Zakaria vei zhe koute mah hazheia deiphao hi zhe kükouyu mai hrülaivei tudee hai neletao pei hi velai.

³⁶Chechenou Enou neletao hi paoe: sütaoye southeawuyu vei tudee pfüphou hai maikha haina pei hi velai!

³⁷“Rachi paolamai taoye southeayu ea nehi seiveyu taoye chuhnou deitheayu, Oh Jerusalem, Jerusalem! Houkünou toutu taoye puh soukhenou bvüpeiyu kua Enou ne nahmaitaoye pha kasho koute tobai soumoa bvüpei nüsa, ana nenou bae!

³⁸Zhukhaio, neletao kisü thaowulai ea vuwulai.

³⁹Daiolouzü Enou neletao hi paoe, ‘Mapao zhih hinou taveyu puhsü rako veie,’ tea neletao nou paomo koutesü neletao nou Eye ngaopukhai laimoe.”