Read Poumei Naga MATHIU 24 Bible Online

MATHIU 24 - Poumei Naga bible

MATHIU 24

¹Jisu nou rathoki nasü thaowu-a tayu phakisü puh rozümai taonou puh hi takouloua rathoki vei kitaosü tengaoe.

²Ana puhnou puletao hi chila peie, “Neletao nou sütao teitei hai ngaokhaire. Chechenou Enou neletao hi paoe, haihi khaopho kou moanou alinou ali pei hi shoa buyu chuh alia khailaimoe.”

³Alia Jisu nou Oliv deichi hi pa bulouyu kisü rozümai taonou kheia puh hi taveloua paoe, “Haitaohai duki palai, alia ne velaiyu shee ea akhai vei shee dainoulai? Eletao hi paopeio.”

⁴Alia Jisu nou puletao hi chila peie, “Maitaliye panou neletaoye lawu more donou leikeilo.

⁵Daiolouzü ‘E hai Khristae!’ tea paoa mai alaonou Azhih hinou velai ea mai alaoye puletao nou süthai mahwulai.

⁶Alia neletao nou ngheiki hinou reih pai ea adou kounou reihvei bvüroyu ko choulai; ana ngaopiso; daiolouzü sükuyu hai pavuzülai, ana sütaonou akhai mohie.

⁷Daiolouzü teidei alinou teidei ali pei hi, alia vedei alinou vedei ali pei hi reih soulai, alia buh lihkinou tokaalai ea nüsülai.

⁸Ana haitao teitei hai veahore shurai nasüe.

⁹“Süthaisü puletao nou neletaoye souvea souhore donou thoupeilai, alia neletaoye southealai; alia Azhih donou neletaoye tahrüh veishinou ngaoralai.

¹⁰Süthaisü mai alaonou kaodu talai, alia alinou liye shoh soulai ea ngaoralai.

¹¹Alia dayu rachi paolamai alaosou palai ea maitaoliye süthai malai.

¹²Alia ashinou pusho tayu vanou, mai alaovei leshahai kaorou talai.

¹³Ana khai koute shamea louyu puhye sü khaipeilai.

¹⁴Alia Vedei vei ko avei haina hai tahrüh pfüphouhi zhopaoh soure donou deiphao teiteihi paodou talai; alia süthainou akhai nasü velai.

¹⁵“Südonou neletao nou Daniel rachi paolawo nou paokhai touyu ha-kare souzhaiyu ngaora sünanou sheeyu buh hinou la-a buyu ngaoyu kisü (phoua buyu puhnou süloukhaio!)

¹⁶Judea hi buyu maitaosü deichi taohi tuvelo.

¹⁷Ki phaohi buyu nanou kikha hinou puh natao poloure donou takouso.

¹⁸Alia douhi buyu nanou puh sahba pore donou khaivewuso.

¹⁹Alia teithe sütaohi nah hrüpfüa buyu ea nahpu-a buyu pfümaitao donou daizhozhou ngaopisa!

²⁰Neletao nou tare teile sü panou saiki moa Soteithezhou daomore donou veachi paolo.

²¹Daiolouzü teideiphao soushu rainou chu koute pakhai moyu moa thaikhai koutea pakhailai moyu adudulai pihiyu nasü ve daolai.

²²Alia teithe sütaohai soujü peimo louzü, maili koutea khailulou hoe; ana dopa louyu puletaoye donou teithe sütaosü soujüwulai.

²³“Süthaisü maitalinou neletao hi, ‘Zhukhaio, haihi Khrista bue!’ moa ‘Puh sühi bue!’ tea paokhaia puhye loucheso.

²⁴Daiolouzü dayu Khrista ea madayu rachi paolamaitao palai, alia puletao nou dushoyu shee ea khupa vahtao soungaolai, sübüa soulou veilouzü dopa louyu maitaoye-a süthaimalai.

²⁵Zhukhaio, Enou neletao hi raia paokhai peire.

²⁶“Südonou, puletao nou neletao hi, ‘Zhukhaio, puh hai rekouhi bue,’ tea paokhaia, tahoso; moa puletao nou, ‘Zhukhaio puh hai kikhahi bue,’ tea paokhaia süsü loucheso.

²⁷Daiolouzü teinghi palonou teipeiyu hai teinghi loulo koute va veyu kua, Mai Nahpoutu veyua sükulai.

²⁸“Athai pfüphao buyu buh hisü, rasho peikitao-a vedzüa bulai.

²⁹“Veahoyu teithe sütao thaibü hisü teinghi-a zhitalai, khou-a vakhai laimoe, alia teivuh tao-a ratei hinou dekoulai, alia rateihi buyu khouko teitei-a puletao vei buh hinou huta bailai.

³⁰Süthaisü ratei hinou Mai Nahpoutu vere shee nasü ngaolai, alia süthaisü deiphao hi Tahrüh khemai hrülainou khao khoulai, alia puletao nou Mai Nahpoutu nou khouko ea dushoyu khouko-ava nou pu raki teihao peinou taveyu sü ngaolai.

³¹Alia puhnou puhvei rakivamai taoye paiku shoa houyu be khonou pua seivelai, alia puletao nou puhnou dopa louyu maitaoye rateiva akhai polo dova hinou akhai polo koute, deiphao kaihoung dai hinou pove dzülai.

³²“Doushibe hinou puhvei nada nasü doulouwo. Puhvei botaonou ngupaloua sünghoutao lapayu kisü neletao nou hou ngheire touyu sülouwe.

³³Süzhaibüa, neletao nou shee haitao teitei ngaolouyu kisü puh hai romühi kou ngheiteire touyu neletao nou sülo.

³⁴Chechenou Enou neletao hi paowe, haitao veishi pamo koutesü maikha haina hai hata laimoe.

³⁵Raki ea deiphao hatalai, ana Achipaotao louzü halaimoe.

³⁶“Ana teithe süna ea pha sünasü Puo likheiwo deinou rakihi rakivamai moa Nahpoutu koutenoua sümoe.

³⁷Noha teileki payu büa Mai Nahpoutu nou veyu-a sübülai.

³⁸Daiolouzü dzüdu vemojü teithetao hi, Noha nou dzüpei luki nahi talou loumo teithe koutesü puletaosü toua, shoa ea sheenghia bubaie;

³⁹alia dzüdu sünanou veloua puletao hrülaiye dupoa tamosa sü puletao nou süloumoyu büa Mai Nahpoutu nou veyua sübülai.

⁴⁰Sükisü dou hinou mai ahai bulai: aliye poloulai ea aliye thaowulai.

⁴¹Naotumai ahai thoupa hinou thou shaolai: aliye poloulai ea aliye thaowulai.

⁴²“Südonou, zhaihe-a kholo, daiolouzü neletao nou neletao Mapao hai duki velaisa touyu sümoe.

⁴³Ana haihai sülo, süolouzü ki paopu nanou khei kapha hinou vaoyumai nasü velai touyu hai süyukowo, puhnou kholoua puh kihai panou hrakhaolou laimoe.

⁴⁴Südonou neletao souda vuzülai, daiolouzü neletao nou halia chomoyu phahinou Mai Nahpoutu sü velai.

⁴⁵“Sükuyu thaisü, teile kao avei hinou puletao hi puletao vei touso peire donou puh vei paopu nou puhye panou puh kikhamai hrülai pei hi khoyu louchelou veiyu ea tsü veishoyu kilaihai thaohwe?

⁴⁶Puhvei paopuwo nou khaiveyu ki sübüa soua ngaolouyu kilai sünasü rakoveie.

⁴⁷Chechenou Enou neletao hi paowe, puhnou puhye panou puhvei buyu kina teitei pei hi kholai.

⁴⁸Ana puhnou kilai shili soua lahnou, ‘Apaopu hai velai mohie,’ tea paoa

⁴⁹alia puh sa kilaimaitaoye tai-dashuloua ea zhaohsho zhiyu maitaoye koa toushoa bulouzü,

⁵⁰kilai sünanou zhimoyu teithe ea puhnou sümoyu pha hinou puhvei paopuwo nasü velai.

⁵¹Alia puhye tudee peilai ea aveikho soumai taoye koa pokhaiwulai; sühinou puhsü kralai ea puh huhsü veikükülai.