Read Poumei Naga MATHIU 25 Bible Online

MATHIU 25 - Poumei Naga bible

MATHIU 25

¹“Sükisü raki Vedei hai puletao vei meibvü poloua sheerepuye daore donou tapayu loumaina kiroutaoye pao nadalou veie.

²Puletao angouwo louzü vowe, alia angouwo louzü tsü veiwe.

³Daiolouzü voyu taonou puletao vei meibvü polouyu kisü meidzüa koa poloumoe,

⁴ana tsü veiyu taowo louzü puletao vei meibvüye koa meidzünou phouyu meidzü bvütao potae.

⁵Sheerepu nou phasho chaoyu vanou puletao hrülai sü nghi nüloua zhitare.

⁶“Ana khei tsüle hinou, ‘Zhukhaio, sheerepu sü laire! Puhye daoloure donou tapalo!’ tea shusoua shapare.

⁷Süthaisü loumainatao veishisü kaishu loure ea puletao vei meibvü sü taoloure.

⁸Alia voyu taonou tsü veiyu taohi paoe, ‘Neletao vei meidzü Eh hi daotu peio, daiolouzü Eh vei meibvütao hai ngheiloure.’

⁹Ana tsü veiyu taonou chila peie, ‘Eh donou ea neleye donoua khalouho-a malae; zhoa buyu mai hi taho lah neletao donou hrülouwo.’

¹⁰Alia puletao nou hrüloure donou tayu thainou, sheerepu sü vere, alia souda khaitouyu puletao nou puhye koa sheenghiyu nühbuh hi tare, alia kikhusü khure.

¹¹“Süthaisü kukhe loumainataoa taveloua shusoua paoe, ‘Mapao, Mapao, Ehye kikhu houpeio!’

¹²Ana sheerepu nou chila peie, ‘Chekhaoa Enou neletao hi paowe, Ewo neletaoye sümoe!’ ”

¹³Südonou, zhaihe-a kholo, daiolouzü neletao nou teithe süna moa pha sünasü sümoe.

¹⁴“Daiolouzü raki Vedei hai mai alinou teidei kukhe alihi veitare jübühi puh kilai maitaoye kuveloua puhvei kina taohai puletao bah hi thaothou peiwuyu büe.

¹⁵Puhnou puletao ali lihi lah lahnou soulou süyu thaifüa peie: puhnou alihi talent sha angou peie, kukhe ali nahi ahai, alia kukhe ali nahi ali peiwu-a puhsü vakouhi veitare.

¹⁶Talent sha angou ngaolouyu puhnou sübü hinou taloua sünasü poa husou loure, alia puhnou kukhe talent sha angou zhipu loure.

¹⁷Sübüa talent sha ahai ngaolouyu puhnou-a kukhe talent sha ahai zhipu loure.

¹⁸Ana talent sha ali ngaolouyu puhnou taho puhvei paopu vei pousha nasü deikhe hinou hepaowu-a kukhaire.

¹⁹“Chuo teile phasho thaisü kilai sütaovei paopu nasü khaiveloua puletaoye koa pa-loucho choshee tare.

²⁰Alia talent sha angou ngaolouyu puhnou nghojü hilo takouloua, kukhe talent sha angou nasü pokouloua paoe, ‘Paopu, nenou Ahi talent sha angou peie. Zhukhaio! Enou kukhe sha angou zhipulou khaire.’

²¹Puhvei paopunou puh hi paoe, ‘Veishore, avei ea checheyu kilai; nenou ha taili pei hi cheche louyu donou, Enou neye ha taoli pei hi panou chalai. Ne paopu vei va-sayu buh hi talou louwo.’

²²“Alia talent sha ahai ngaolouyu pu-a nghojü hilo takouloua paoe, ‘Paopu nenou Ahi talent sha ahai peie, zhukhaio! Enou kukhe talent sha ahai zhipulou khaire.’

²³Puh vei paopunou puh hi paoe, ‘Veishore, avei ea checheyu kilai; nenou ha taili pei hi cheche louyu donou, neye ha taoli pei hi panou chalai. Ne paopu vei va-sayu buh hi talou louwo.’

²⁴“Süthaisü talent sha ali ngaolouyu puh-a nghojü hilo takouloua paoe, ‘Paopu, ne hai le khouyu mai alie touyu Enou süe; newo nenou vuthou moyu buh hinou cha chilou baiwe, alia nenou porao khaimoyu buh hinou podzülou baiwe.

²⁵Südonou Enou ngaopiloua taho nevei talent sha nasü deikhehi pokure. Zhukhaio! Nevei sü haihi bue.’

²⁶“Ana puhvei paopunou puh hi chila peie, ‘Maishi ea hikeiyu kilai. Enou vuthou moyu buh hinou chilou baiwe ea poraokhai moyu buh hinou podzülou baiwe touyu hai nenou süwe.

²⁷Sükuyu thaisü nenou Avei pousha hai shaki hi pove khaipeiyu phae, alia Enou khaiveyu kisü Avei pousha hai veanou pu ngaolou laimou.

²⁸Südonou puh hinou talent sha nasü poloua talent sha kirou buyu puh hi peio.

²⁹Daiolouzü buyu mai tali hisü peipulai, alia puhnou alao buloulai; ana hayu puh hinou puhvei buyuna koute-a pota bailai.

³⁰Alia hakoyu kilai sünaye vakou teizhi buh hi polai pawo; sühinou puhsü kralai ea puh huh sü veikükülai.’

³¹“Mai Nahpoutu nou khouko ava hinou rakivamai taoye koa veyu kisü, puhsü puhvei dushoyu vebuh hinou ve bulai.

³²Alia tahrüh hrülaiye puh nghojühi pove dzükhailai, alia zhaokhowonou zhaotu taoye nghitu taohinou lukupayu büa puhnou puletao aliye ali hinou lukulai,

³³alia puhnou zhaotu taoye puh bahkha zhoulo hi, ana nghitu taoye bahkha nalohi khailai.

³⁴Sükisü Veonou puh bahkha zhoulohi buyu taohi paolai, ‘Tavelo, Apuonou hapeikhai touyu maitao, teideiphao soushu rainou neletao donou soudakhai touyu vedeina sü ve kaa thaolo;

³⁵daiolouzü Enou houbuki neletao nou Eye touso peie, Enou reibuki neletao nou Eye panou küe, Enou shevai-shesü soubuki neletao nou Eye shepeie.

³⁶Enou baitou buki neletao nou Eye sabanüh peie, Enou soubuki neletao nou Eye ve kipeie, Enou hukhahi bubuki neletao nou Eye ve zhupeie.’

³⁷“Süthaisü cheche maitao nou puh hi chila peilai, ‘Mapao, Ehnou duki neye houa ngaoe ea neye vaipeie, moa reia ngaoa neye panou küe?

³⁸Alia duki Ehnou neye shevai-shesü souyu ngaoa shepeie, moa baitoua neye sabanüh peie?

³⁹Alia duki Ehnou neye soua kipeie moa hukha hinou bua neye ve zhupeie?’

⁴⁰Alia Veonou puletao hi chila peilai, ‘Chekhaoa Enou neletao hi paoe, neletao nou tai-noukayu Athaihou jürai haitao hrohinou alihi soupeiyu hai neletao nou Ahi soupeiwe.’

⁴¹“Süthaisü puhnou puh bahkha nalo buyu taohi paolai, ‘Acha ngaolouyu neletao, Ahinou taloua rashi ea puhvei kilaitao donou soudakhai touyu teisa meibuh hi louwo.

⁴²Daiolouzü Enou houbuki neletao nou Eye touso peimoe, Enou reibuki, neletao nou Eye panou kümoe.

⁴³Enou shevai-shesü soubuki neletao nou Eye shepei moe, baitou buki neletao nou Eye sabanüh peimoe, sounou buki ea hukhahi bubuki neletao nou Eye ve zhupei moe.’

⁴⁴“Süthaisü puletao nou puh hi chila peilai, ‘Mapao, Ehnou duki neye houa moa reia, shevai-shesü soua moa baitoua, sounoua moa hukhahi bua neye kuvah soupei moe?’

⁴⁵Sükisü puhnou puletao hi chila peilai, ‘Chechenou Enou neletao hi paoe, neletao nou tai-noukayu haitao hinou alihi-a soukhapei moyu donou Eye soukhapei moe.’

⁴⁶Alia puletaosü teisa vei tudee buh hi talai, ana chechemai taosü teisa ahri buh hi talai.”