Read Poumei Naga MATHIU 26 Bible Online

MATHIU 26 - Poumei Naga bible

MATHIU 26

¹Jisu nou chi haitao paocheyu kisü, puhnou puh rozümai taohi paoe,

²“Teithe ahai thaisü Tachonüh hai velaire touyu sü neletao nou süe, alia Mai Nahpoutuye kros vanou veatheare donou thoupeiwulai.”

³Süthaisü napao adumaitao ea tsümai taonou Kaipha tea kuyu napao peichana vei veofühao hinou ve dzüloure,

⁴alia Jisu ye kheia niloua southea loure donou chikhai loure.

⁵Ana puletao nou paoe, “Haihai Eletao nou nühki hinou souwu laimoe, sükumo louzü maisou hrohinou bvüro shulai.”

⁶Chuo Jisu nou Bethani hi loukhaora souyu Simon kihinou bubu kinou,

⁷naotumai alinou muh teishoyu kainüvei theadzü nou phoupeiyu chuhkaa nou souyu khouli poloua puh hi tave, alia Jisu nou arübuh phaonou toua bubu kinou naotupai sünanou sünahai puh pei hi lakhai peire.

⁸Ana süsü rozümai taonou ngaolouyu kisü, puletao nou rarouloua paoe, “Daidonou haihai hakonou souhasa?

⁹Daiolouzü theadzü haihai pousha alao muh zholou süe, alia süsü toure hamai hi peilou veie.”

¹⁰Ana Jisu nou süsü süloua puletao hi paoe, “Daidonou neletao nou naotu haipaiye souveawe? Daiolouzü puhnou Ahi haveili soupeire.

¹¹Daiolouzü neletaowo toure hamaiye teisa koa bulai, ana neletaowo Eye koa teisa bulai moe.

¹²Kaivei theadzü haina hai Apfüphaohi lakhai peiyu hinou puhnou süsü Eye vure donou souda peire.

¹³Chekhaoa Enou neletao hi paoe, deiphao teiteihi ko avei haina paotayu buh likihi, puh nou soukhaitouyu nasü puhye li-choloure donou paongaolai.”

¹⁴Süthaisü kiahai hrohinou ali soua buyu Judas Iskariot tea kuyu nanou napao adumai taohi taho loua

¹⁵noue, “Enou puhye neletao bahhi thoupei louzü, neletao nou Eye daipeilai?” Alia puletao nou puh hi husha shirou chothou peire.

¹⁶Alia teile sühinou shua puhnou Jisu ye shohdo soure teile zhou avei phoutare.

¹⁷Chuo raoko nühvei teithe raikai kisü rozümai taonou Jisu hi taveloua paoe, “Nenou Eletaoye panou daikinou taho neye donou Tachonüh vai soudayu züpae?”

¹⁸Puhnou paoe, “Nuhdu nahi talouloua mai alihi paokhaio, ‘Dou-apeio nou paoe, Avei teile ngheire; Enou neki hinou rozümai taoye koa Tachonüh nülai.’ ”

¹⁹Alia rozümai taonou puletao hi Jisu nou paopeiyu kua souloure, alia puletao nou Tachonüh vai nahai soudare.

²⁰Koukhe louyu kisü, puhnou rozümai kiahai taoye koa toure donou kou butare;

²¹alia puletao nou toua buyu hinou, Jisu nou paoe, “Chechenou Enou neletao hi paoe, neletao hrohinou alinou Eye shohdo soupeilai.”

²²Alia puletaosü le veasho loure, alia puh hi shoshonou noue, “Mapao, Ewu?”

²³Jisu nou chila peie, “Eye koa khaoh hi puh bah thaithou zhoyu nanou Eye thoupeilai.

²⁴Mai Nahpoutu louzü puh vanou sheeyu larübvü hinou rükhai touyu kua tabaie; ana Mai Nahpoutuye shoh soupeiyu mai süna donou daizhozhou ngaopisa! Puhye donou nakoukhai moyu nanou veikou shohie.”

²⁵Puhye shoh soupeiyu Judas nou paoe, “Dou-apeio, haihai Ewu?” Jisu nou chila peie, “Nenou paopawure.”

²⁶Alia puletao nou toua bubu kinou, Jisu nou raokhao poloua hapeire, alia sünasü soukho loua rozümai taohi peia paoe, “Poloua toukhaio; haihai Apfüphaoe.”

²⁷Süthaisü puhnou paili poloure ea puhnou kalo paocheyu thaisü süsü puhnou puletao hi pola peia paoe, “Neletao hrülai haihinou pokülo;

²⁸daiolouzü haihai mah khaipeire mai alao donou küpa peiyu vo soukhaiyu Azhe nasüe.

²⁹Enou neletao hi paoe, Apuo Vedei hinou Enou neletaoye koa darkha zhaoh ashu küzho laiyu teithe süna vemo koutesü Enou chuthainou darkha zhaoh haina hai küpukhai khailaimoe.”

³⁰Alia puletao nou lou ali soulouyu thaisü Oliv deichi hi tapare.

³¹Süthaisü Jisu nou puletao hi paoe, “Neletao hrülai Avanou zhoukhei kaota khailai, daiolouzü haibüa rükhaire, ‘Enou zhao-akhowoye southealai, alia zhaokhohi zhao taosü rata khailai.’

³²Ana hrishu louyu thaisü, Enou neletao jünou raia Galilee hi talai.”

³³Pitar nou chila peia puh hi paoe, “Puletao hrülainou ne vanou kaotayuma, Ewo hakia kaotakhai laimoe.”

³⁴Jisu nou puh hi paoe, “Chechenou Enou nehi paowe, zhoukhei vuzü hinou, houjünou khaomo jühinou nenou Eye lüh asü balai.”

³⁵Pitar nou puh hi paoe, “Ewo neye koa thai vuzü laiyu koutea Enou neye hakia motoulai moe!” Alia kukhe rozümai hrülai taoa sübüa paoe.

³⁶Süthaisü Jisu nou puletaoye koa Gethsemane tea kuyu buh hi tare, alia puhnou puh rozümai taohi paoe, “Holo vanou taho Enou veachi paobuki haihinou buwo.”

³⁷Alia puhnou puhye koa Pitar ea Zebedee nahpoutu ahaiye satare ea puhsü le veasho loure ea le choro loure.

³⁸Sükisü puhnou puletao hi paoe, “Ale hai veathou thaire soua bure; haihinou bua Eye koa zhai helo.”

³⁹Alia tadouphou kouloua puhnou deiphinou kou khüa kaoloua veachi paoe, “Apuo, soulou veilouzü veayu pai haina hai Ahinou potapeio; sütou khaia, Enou liyu bümoa nenou liyu büa soupeio.”

⁴⁰Süthaisü puhnou rozümai asütaohi khaikoue ea puletaoye zhia bua ngaoloure; alia puhnou Pitar hi paoe, “Neletao Eye koa teilecho ali koutea zhai helou howu?

⁴¹Neletao athao hi kaolou more donou zhai helo ea veachi paolo; chechenou rakowo louzü züpae, ana vasou louzü lelou hoe.”

⁴²Süthaia puhnou tapulou khaia veachi paoe, “Apuo, veare pai haina hai Eye panou kümoa nou po talalou hoe toulouzü, nedo soulouwo.”

⁴³Alia puhnou khaikou puyu kisü puletaoye zhia buyu ngaoloue, daiolouzü puletao nghithouhai süübeia bure.

⁴⁴Süthaisü puletaoye thaowua puhnou lüh asüna hia taloukhaia kheihaoyu chipaotaonou veachi paoe.

⁴⁵Süthaisü puhnou rozümai taohi tave loua puletao hi paoe, “Neletao chukoutea zhi vashoa ea soa buwu? Zhukhaio, Mai Nahpoutuye mahmai bah hi thoupeire phasü veloure.

⁴⁶Shulouwo, Eletao talaire khe; zhukhaio, Eye shoh soupeire mainasü haihi bure!”

⁴⁷Puhnou sübüa chi paobebu kinou, kiahai hrohinou ali soua buyu Judas hai tavere, alia napao adu maitao ea tsümaitao hinou seiveyu khoche ea süda poyu maikhemai alaosou puhye koa laiwe.

⁴⁸Chuo Jisu ye shoh soupeire mai sünanou maisouhi shee ali peia haibüa paoe, “Enou münou mure mai sünasü neletao nou züpayu nae, Puhye nilo.”

⁴⁹Alia puhnou Jisu hi thalasou takouloua paoe, “Khurüwe, Dou-apeio,” alia sübüa puhye kou münou mue.

⁵⁰Jisu nou puh hi paoe, “Asana! Ne daidonou haihi bue?” Süthaisü puletao nou takouloua Jisu vahi bahkha khakhaia puhye niloure.

⁵¹Alia zhukhaio, Jisu ye koa buyu maitao hrohinou alinou puh bah sü topaloua puh khoche nasü paizhou loure, alia napao peichana kilai naye podaoe ea puh nousü jadere.

⁵²Sükisü Jisu nou puh hi paoe, “Ne khochehai pokhailou süna buh hi khaio; daiolouzü khoche poyumai veishi sü khochenou souhalai.

⁵³Rakivamai reihmaime adu kiahai jünou koua Ahi chubü hinou seive peire donou Enou Apuo hinou kholou hoe tea nenou chowu?

⁵⁴Ana sübülouzü kabüa sheeyu larübvü hinou sübüa pavu zülai tea paopeiyu nasü vetelai?”

⁵⁵Teile süpha hinou Jisu nou maisou taohi paoe, “Maivei saotoumai aliye nilaiyu kua khoche ea süda poa Eye niloure donou neletao tavewu? Teithe tsünou Esü rathoki hinou doupeia bue, alia neletao nou Eye nilou moe.

⁵⁶Ana rachi paolamai taonou sheeyu larübvü hinou rükhai touyu nasü panou vete loure donou sütao veishi hai pakhaire.” Süthaisü rozümaitao hrülaisü puhye thaowu-a tutare.

⁵⁷Süthaisü Jisu ye nilouyu taonou puhye sü razhai dou-apei maitao ea tsümai taonou vedzüa buyu Kaiapha napao peichana buh hi savere.

⁵⁸Ana Pitar nou napao peichana kijühi talouyu koute puhthai füpoa tae, alia kikhahi talouyu kisü akhai koute zhure donou puhnou kikhoyu maitaoye koa kou chobua bue.

⁵⁹Chuo napao adumai taonou alia tsüme teiteinou Jisu ye southeare donou da-a chi lapeiyu phoue,

⁶⁰ana puletao mai taolinou nghojülo takouloua puh vanou da-a chi lapeikhaia puletao nou halia ngaolou moe. Akhai khailai hinou mai ahai nou nghojülo takouloua

⁶¹paoe, “Mai hainanou, ‘E nou rathoki haina hai hakhaokou loua teithe asü levai hinou soupei khailou süe,’ tea paoe.”

⁶²Alia napao peicha nanou lashu loua paoe, “Ne chila peire hawu? Mai haitaonou nepei hi paodu khaiyu hai daie?”

⁶³Ana Jisu nou hachi lia paokhai moe. Alia napao peicha nanou puh hi paoe, “Hriyu Ramai zhih hinou Enou neye kharochi peia paowe, nehai Ramai Nahpoutu Khristae toulouzü Eletao hi paokhaio.”

⁶⁴Jisu nou puh hi chila peie, “Nenou sünasü paopare. Ana Enou neletao hrülaihi paowe, chu thainou Mai Nahpoutu nou Khoukhoulai Ramai bah zhoulo hinou bua raki teihao pei vanou taveyu neletao nou ngaolai!”

⁶⁵Sübü hinou napao peicha nanou puh sah daopha loua paoe, “Puh nou Ramaiye paoshire. Eletao nou haipeinou zhopaoh kukhe phoupuyu daizhiyu bue? Neletao nou chuo puhnou Ramaiye paoshiyu chouloure!

⁶⁶Neletaowo daitea chowe?” Puletao nou chila peie, “Puh hai thaizüe.”

⁶⁷Süpha hinou puletao nou puh pah hi taidzünou süsho peia puhye dapeie; alia kamainou puhye bahnou phapeia

⁶⁸paoe, “O Khrista! Neye dayu nasü thaowe, Eletao hi paopa ngaokhaio!”

⁶⁹Chuo Pitar nou kijü vavai hinou bubuki, kilai naotumai alinou puh hi taveloua paoe, “Ne-a Galileemai Jisu ye koa laiwe.”

⁷⁰Ana puh nou sünasü ba-a puletao hrülai nghojünou paoe, “Nenou daichi paosa touyu Ewo sümoe.”

⁷¹Alia puh nou kijü bomühi tapayu kisü kukhe kilai loumaina alinou puhye ngaolou khaire, alia puhnou ngheiki la-a bumai taohi paoe, “Mai haina hai Nazareth Jisu ye koa laiwe.”

⁷²Süthaia puhnou chou-a, “Ewo mai sünaye sükhai moe!” tea bakhaire.

⁷³Phajü buyu thaisü, ngheikihi layu maitao nou Pitar hi takoulou khaia puh hi paoe, “Veimosoua ne-a puletao hrohinou alie, daiolouzü nevei khao-zhai hinou neye shiwe.”

⁷⁴Süpha hinou Pitar nou paoe, “Enou chouwe, süolouzü Enou chekhaoa paoe! Sükumo louzü Ramai nou Apei hi tudee peitheo! Ewo mai sünaye sükhai moe!” Sübü hinou houjü alinou khaopare,

⁷⁵alia Pitar nou puh hi Jisu nou, “Houjünou khaomo jühinou nenou Eye lüh asü koute balai,” tea paopeiyu nasü chüloure. Alia puhnou vakouhi tapa loua sochesoua krare.