Read Poumei Naga MATHIU 27 Bible Online

MATHIU 27 - Poumei Naga bible

MATHIU 27

¹Shohna hisü napao adu maitao ea tsümai taonou Jisu ye southeare donou chikhai loure.

²Alia puletao nou puhye baorai phuwua ea sü thai poa teideikhowo Pilat bah hi peire.

³Jisu ye shohdo souyu Judas nou Jisu ye southeare donou chi kukoure touyu hai sülouyu thaisü, puh lehai daloure ea pousha shirou taosü napao adu maitao ea tsümai taohi po khaive peire,

⁴alia haibüa paoe, “Mah hayu mailiye Enou southeare donou shohdo soupeiyu vanou E mahre!” Puletao nou chila peie, “Süna vanou Eh lenou dai bue? sünasü nelah ne vah baie!”

⁵Alia puhnou husha taosü rathoki hi polai thouwu a tare; süthaisü puh lah taho raidaotheare.

⁶Ana napao adumai taonou husha taosü kou poloua paoe, “Haitaohai zhe pousha baiyu donou rathoki vei pousha podzübuh hi pothou khaiyu razhai hae.”

⁷Südonou puletao nou chikhailoua shevai-shesü maitaoye povure donou pousha sütaonou lee souyumai fü nasü hrüloure.

⁸Südonou fü süna zhih hai “Zhefü!” tea zhodo koutea kua bue.

⁹Jeremiah rachi paolawo nanou paopayu, “Alia Israelmai kamai taonou puh muh paokhai touyu husha shirou nasü puletao nou poloure,

¹⁰alia Mapao nou Ahi chikha peiyu büa puletao nou sütaohai lee souyumai fü donou peire,” touyu nasü süki hinou vete loure.

¹¹Chuo Jisu nou Teideikhowona nghojühi kou laloure, alia Teideikhowo nou puh hinoue, “Ne Jihudimai Veowu?” Jisu nou chila peie, “Nenou süsü paopare.”

¹²Ana napao adumai taonou ea tsümai taonou puh hi mah dukhaiyu kisü puh nou chila lia peimoe.

¹³Südonou Pilat nou puh hi paoe, “Puletao nou ne pei hi chi haizhozhou dukhaiyu hai ne choumowu?”

¹⁴Ana Jisu nou puh pei hi dukhaiyu chi tali vanou chila ali koutea peimoe, Südonou teideikhowo nasü khupasho loure.

¹⁵Alia Tachonühsahi maisounou züpayu hukhahi bumai taliye teideikhowo nanou maisou donou phapeiyu zhai bue.

¹⁶Alia sükisü hukhahi buyu ashi hinou zhih tashoyu Jisu Barabbas tea kuyu maili bue.

¹⁷Südonou maisoutao nou vedzüa buyu phaki hinou Pilat nou puletao hi noue, “Neletao donou Eye panou thaohye phapeiyu züpawe, Barabbas tea kuyu Jisu ho, Khrista tea kuyu Jisue?”

¹⁸Daiolouzü puletao nou Jisu ye ngaoraiyu vanou puh bah hi thoupei baie touyu hai puh nou sütoua bue.

¹⁹Süpeinou, puhnou chikubuh hinou bubuki, puh chapfünou puh hi chi seive-a paoe. “Mah hayu mai süna pei hi halia souso, daiolouzü zhou kheikou me hinou E puh vanou veashore.”

²⁰Ana napao adumaitao ea tsümai taonou maisouhi Barabbas ye phapeire alia Jisu ye southeare donou khokhaio tea süpeire.

²¹Süthaisü Teideikhowo nanou puletao hi paoe, “Puhai hrohinou neletao donou Eye panou thaohye phapeiyu züpawe?” Alia puletao nou chila peie, “Barabbas ye züpae!”

²²Pilat nou puletao hi noue, “Sükulouzü Khrista tea kuyu Jisu ye Enou dai soulai?” Puletao hrülainou chila peie, “Puh ye kros vanou veatheawo!”

²³Ana Pilat nou noue, “Daidonoue, puh nou daishi soure?” Sükisü puletao nou pai kupusho loua paoe, “Puh ye kros vanou veatheawo!”

²⁴Südonou puh nou souyu hai maikhe maiye soubvüro shoyu likhei baideinou kukhe halia zhiyu hare touyu sü ngaoloua, Pilat nou dzü poloua ea maisou nghojünou bahdzü teiloua paoe, “Acheche mai haina vei athai vanou Apei hi mah hae! Haihai neletao vah baie!”

²⁵Alia maikhemai hrülainou chila peie, “Puh thaiyu donou tudee verenasü Eletao pei hi ea Eletao nahmai pei hi vetheo!”

²⁶Süthaisü puhnou Barabbas ye puletao donou phapeire, alia Jisu ye dapeiwua kros vanou veatheare donou puhye thoupeire.

²⁷Süthaisü Pilat reihmai taonou Jisu ye Teideikhowo vei fühao hi saloure alia reihmai me teitei puh nghojühi tavedzüloure.

²⁸Alia puletao nou puh va sabanütao daolaiwu-a horoyu zaocha alinou puh vahi zhaopeire,

²⁹alia shunou peirüli khiloua puletao nou puh pei hi sünasü porü peire, alia rü süpo ali puh bah zhoulo pothoupeie. Alia puh nghojünou kou khou khüloua puletao nou puhye konüa paoe, “O Jihudimai Veo, maisho khaio!”

³⁰Alia puletao nou puh hi taidzü süsho peie, alia rü süpo nasü poloua puh pei hi dapeie.

³¹Alia puletao nou puhye konüyu thaisü puletao nou puh hinou zaocha nasü daolaire, alia puh sahbanou puh vahi banoupeia puhye veatheare donou sapoa tare.

³²Alia puletao nou tapayu kisü Kurini teidei hinou veyu Simon tea kuyu mai sünaye puletao nou daoloure, alia mai sünaye Jisu vei kros pfükhare donou reihmai taonou kutai loure.

³³Alia puletao nou Golgotha (süolouzü, peirao buh toue) tea kuyu buh hi tave louyu kisü,

³⁴puletao nou southaidzü nou chokhai touyu darkha dzünou puh hi popeie; ana puhnou sünasü chiloua kükhai bare.

³⁵Alia puletao nou puhye kros vanou veakhaiyu thaisü, puh sahnü taosü puletao hrohinou rako avei zhua zhiloure.

³⁶Süthaisü puletao nou kou buloua sühinou puhye khoa bue.

³⁷Alia puletao nou puh pei hi dukhaiyu chipao, “Haihai Jihudimai Veo Jisue,” tea phouyu chahkhao nasü puh peikou hi dakhaire.

³⁸Sükisü maivei saotoumai ahaiye kros vanou Jisu ye koa aliye bahkha zhoulo ea liye bahkha nalo hinou veakhaire.

³⁹Alia ngheiki taveyu maitao nou puletao pei ngua puhye konüa paoe,

⁴⁰“Rathoki souha laiyu ea teithe asü levai hinou soupei khailaiyu ne, lah neye khailu louwo! Ne hai Ramai Nahpoutue toulouzü kros vanou takou louwo.”

⁴¹Süzhaibüa napao adumaitao, razhai dou-apeimaitao ea tsümai taonou-a puhye konüa paoe,

⁴²“Puhnou kukhe maiye khailupeiwe; ana puhwo lah puhye khailulou hoe! Puhwo Israelmai veo süe; puhye panou chuo kros vahinou takou loukhaio, alia sütoulouzü Ehnou puhye louchelai.

⁴³Puhwo Ramaiye louchewe südonou Ramai nou puhye züpa louzü, chunou Ramaiye panou puhye vupa peiyu soulou khaio; daiolouzü puhnou, ‘Ewo Ramainah Poutue’ tea paoe.”

⁴⁴Alia puhye koa kros vanou veakhaiyu maivei saotoumai-a sübüa puhye konüe.

⁴⁵Alia chuo heako teilecho kiahai hinou koukhe teilecho asü koute teidei teitei hisü maitei loure.

⁴⁶Alia teilecho asü tayu phakisü Jisu nou kushoyu painou raopare, “Eli, Eli, lama sabachthani?” süvei kowo louzü, “Aramai, Aramai, ne daidonou Eye thaowure?”

⁴⁷Alia ngheiki hinou la-a buyu kamainou süsü chouloua paoe, “Mai hainanou Elijah ye lae.”

⁴⁸Alia puletao hrohinou mai alinou sübü hinou tutaloua phako ali poloua sünasü khairouyu darkha dzü hinou sücha loure, alia sünahai süpo ali pei hi phu muloua panou küre donou puh hi peie.

⁴⁹Ana kukhemai taonou paoe, “Kholaio, puhye khaipeire donou Elijah vevelai mosa Eletao zhulaikhe!”

⁵⁰Alia Jisu nou pai kushoa raopuloua puh rakohai thoupeire.

⁵¹Alia zhukhaio, Rathoki hi hakhaiyu sah nasü ahai soua pei hinou teikou koute patare; alia deiphao hia nüsü loure ea chuhlea taoa kophobou tare;

⁵²khüh taosü houkhao pare, alia zhitayu sheeyumai pfüphao taolia hrishu loure,

⁵³alia puhnou hrishu louyu thaisü puletao nou khühtao hinou tashuloua sheeyu nuhdu hi taveloua maikhemai alao hi ngaoe.

⁵⁴Reihmai kaihpei chana ea puhye koa Jisu ye khoyu maitao nou nüsüyu ea kukhe payu teitei ngaolouyu kisü, puletaosü ngaopisho loure, alia haibüa paoe, “Chechenou mai haina hai Ramai Nahpoutue!”

⁵⁵Galilee hinou Jisu thaifüa taveyu puhvei kuvah souyu naotumai taolia sühinou kra-a zhia bue.

⁵⁶Puletao hrohisü Meri Magdalini, Jems ea Josef pfü Meri, alia Zebedee chapfü louwe.

⁵⁷Koukhe louyu kisü Arimathea hinou veyu Josef tea kuyu hanimai ali buh sühi tave-e, puh-a Jisu rozümai alie.

⁵⁸Puhnou Pilat hi taveloua Jisu vei pfüphao nasü peire donou khoe. Südonou Pilat nou sünasü puh hi thoupeire donou kharochi peire.

⁵⁹Alia Josef nou pfüphao nasü poloure, alia süsü sheetouyu jüyu sah ali hinou pozüloure,

⁶⁰alia puhnou chuhrao hinou vouthouloua soukhai touyu lah puhvei khüh ashu nahi sünahai pothou khaire; süthaisü puhnou khüh mühi chuh aduli phaokou khaiwu-a tare.

⁶¹Magdalini Meri ea kukhe Meri pai-a khüh sühi zhia chobua bue.

⁶²Thainaisho kisü, süolouzü Soteithe kisü, napao adumaitao ea Phariseemai taosü Pilat nghojünou tave dzüloure,

⁶³alia haibüa paoe, “Dou-apeio, amadamai honanou puhnou hribuki, ‘Teithe asü thaisü E hridashu khailai,’ tea paoyuhai Eh nou tsü-a buhie.

⁶⁴Südonou puh khüh hai teithe asüzhou koute panou soutaosoua khotou loure donou kharochi peikhaio, molouzü puh rozümai taonou taho puh pfüphao hai vaolou shulai, alia ‘puh hai athai hinou hrishu loure,’ tea maikhe mai hi paoshulai, alia akhai khailai hi dayu sünanou raiki dayu süna jünou shipu shulai.”

⁶⁵Pilat nou puletao hi paoe, “Khopeire reihmai taosü neletao nou salouwo ea takhaio, neletao nou soulou veisa khüh sünasü khotou louwo.”

⁶⁶Südonou puletao nou taho sünasü soutaosou chuhphao vanou paoshee soukhaire ea khore maiye sühi soutaosoua khaire.