Read Poumei Naga MATHIU 3 Bible Online

MATHIU 3 - Poumei Naga bible

MATHIU 3

¹Süphakisü Johan Baptist nou Judea rekouhi velouloua ko paodoushu tare.

²Puhnou paoe, “Neletao mah hinou le dalouwo, daiolouzü raki Vedeihai ngheire!”

³Johan hai Isaiah rachi paolawona nou pao-a buyu mai sünasüe, süolouzü: “Rekounou mai kamai linou shawe, ‘Mapao vei ludu nasü soudalo; puh ludu taosü souzülo!’ ”

⁴Johan sahnü hai racho mainou soukhai toue; souhee khyakho alinou puh khyahi khokhaitoue, alia khahzü ea rekouhi laivoudzü hai puh tousoe.

⁵Maikhe mainou Jerusalem hinou, Judea teidei teitei hinou ea Jordan rei ngheiki buyu nuh teitei hinou tapaloua puh hi tave loure.

⁶Puletao nou puletao mah paopa-a Jordan hinou puhnou puletaoye dzükhao dapeie.

⁷Ana Johan nou Phariseemai ea Sadukimai taolinou dzükhao daloure donou puh hi taveyu ngaoloua puletao hi paoe, “Oh houng tyaonahkhemai! Neletaoye thaohnou vere Ramai rarouna hinou tutalouwo tea tukhapeie?

⁸Neletao hai neletao vei mah hinou le daloure touyu pongaoyu vah taonou souloukhaio.

⁹Alia Abraham hai neletao puopaoe tea pao-a Ramai rarouna hinou tutalou süe tea neletao nou chowuso. Enou neletao hi paoe, süolouzü Ramai nou chuh toutu haitao poloua panou Abraham vei tyaonahmaitao palousüe!

¹⁰Chukoute-a süübetao mahi mareisü daothou khaitoua bue; südonou rashi avei shimoyu süübetaoye sü vikaowu-a meihi polaithouwu baiwe.

¹¹Neletao le daloure touyu pongaore donou Enou neletaoye dzünou dzükhao dapeie, ana Athainou vere puhwo neletaoye Rako Mashinou ea meinou dzükhao dapeilai. Puhwo Ajünou dukou shohie; alia Ewo puh phikha potayu koutea khamoe.

¹²Thaihi thoutaosü soushee loure donou puh bah hi thouhü bue. Puhnou puhvei southou taosü puhvei thoupaohi pove dzülai, ana thouba taosü puhnou ngheikhailai moyu meihi pothou deiwulai.”

¹³Süpha kisü Jisu nou Galilee hinou Jordan hi Johanye panou dzükhao dapeire donou tave louloure.

¹⁴Ana Johan nou puhye nu-a puh hi paoe, “Nenou Eye dzükhao dapeizüe, ana newo Ahi tavewu?”

¹⁵Ana Jisu nou puh hi chila peie, “Chuo louzü sübütheo. Daiolouzü haibüyu zhai hinou Eletao nou Ramai hinou moshilaiyu teitei sü souloulai.” Südonou Johan nou aetou peire.

¹⁶Alia Jisu nou dzükhao dalou büyu thaisü dzü hinou tapa loure. Alia zhukhaio, raki sü puh hi houpa peire ea Ramai Rakonou khao büa kou puh pei hi taoyu sü puh nou ngaoe.

¹⁷Sükisü pai alinou rakinou haibüa paoe, “Haisü Enou leshiyu Anah Poutue, Enou puhye rukhare.”