Read Poumei Naga MATHIU 5 Bible Online

MATHIU 5 - Poumei Naga bible

MATHIU 5

¹Jisu nou maisouye ngaoloua deichi vahi tapare, alia puhnou kou bulouyu kisü puh rozümai taonou puh hi tave loure.

²Alia puhnou puletao hi haibüa doupeishu tare:

³“Rako hinou lülouhoe tea süa bumaisü rakoveie; daiolouzü raki Vedeisü puletao veie!

⁴Dopfüa bumaisü rakoveie; daiolouzü puletaoye souva peilai!

⁵Nasha-a bumaisü rakoveie; daiolouzü deiphaohai puletao vei soulai!

⁶Achechena donou rei-züyu maisü rakoveie; daiolouzü puletao sü reikha ngaoloulai!

⁷Zhuvea peilousü maisü rakoveie; daiolouzü puletao nou zhuvea ngaoloulai!

⁸Le sheeyu maisü rakoveie; daiolouzü puletao nou Ramaiye ngaolai!

⁹Kaonayu pove peimai sü rakoveie; daiolouzü puletaoye sü Ramai nahtao tea kulai!

¹⁰Achechena vanou mainou souvea-souhoyu puletaosü rakoveie; daiolouzü raki Vedeisü puletao veie!

¹¹“Neletao nou Athaifümai souyu donou mainou neletaoye sou ahraopei, souvea-souhopei ea mada-a chishi tyalinou paopeiyu kisü rakoveie.

¹²Va-salo, daiolouzü neletao vei buusü raki hinou dusho-a bue, daiolouzü süzhai bütoua neletao jünou rai-a hrüyu rachi paolamai taoye maikhe mainou souvea-souho peie.

¹³“Neletao hai deiphao vei taie. Ana tainou puhkhü nahai hawu louzü, kazhaibüa puhye soukhülou khailai? Süsü polaiwu-a emai phinou taitou baiyuwo deinou hatali donoua koyu hare.

¹⁴“Neletao hai deiphao vei avae. Deichinou soukhai touyu nuhdu nasü poku louhoe.

¹⁵Maita linoua meibvü taokhaitoua sülai khehi pothou bengi-a khaitamoe, ana meibvü khaiyu buh hi khaibaiwe, alia sünanou kikhahi buyu mai hrülaiye vapeie.

¹⁶Süzhaibüa neletao vei ava sü maikhemai nghojühi vangao peikhaio, sübü louzü neletao vei vahvei taosü puletao nou ngaoloua rakibu neletao Puoye paosholai.

¹⁷“Enou Moses vei razhai ea rachi paolamaitao nou doupeiyu taosü souhare donou vewe tea chowuso. Sütao souhare donou E vemoe, ana sütao panou vetere donou ve.

¹⁸Cheche vuzünou Enou neletao hi paowe, raki ea deiphao hatamosa koute razhai hinou chahko taili moa chahko daopouyu li koutea sütao teitei vetemo koutesü halaimoe.

¹⁹Südonou maita linou chikhatao hrohinou taikayu ali zümo louzü ea mai kukhehi-a sübüa doupei louzü, puhye sü raki Vedei hinou taikhana tea kulai. Ana maitalinou razhai nasü züloua sübüa souloure donou kukhehi-a doupei louzü puhye sü raki Vedei hinou aduna tea kulai.

²⁰Südonou Enou neletao hi paowe, süolouzü neletao vei achechena nou razhai dou-apeimaitao ea Phariseemaitao vei jünou koulou molouzü neletao hai hakia raki Vedeihi velou louhoe.

²¹“Neletao nou maiye southea laimoe; alia maita linou maiye southea louzü puhye chi kure donou savelai tea dao raimai taohi paoyu sü neletao nou chouloure.

²²Ana chuo Enou neletao hi paowe: puh thaihou jüraiye rarouyu maitaliye sü chi kure donou savelai, maitalinou puh thaihou jüraiye ‘Hakonawo!’ tea kulouzü puhye sü tsümehi save lalai, alia maita linou puh thaihou jüraiye, ‘Avowo!’ tea paolouzü puh hai meizhai hi loure rakoshi nasü daolai.

²³Südonou nenou sheela buh hi nevei sapeina poveyuki ne thaihou jürainou ne pei hi motouyu sü sühinou chove daolouzü,

²⁴nevei sapeina nasü sheelayu buh nghojühi thaowuwo ea thala-a tave ne thaihou jüraiye raia chaveilou khaio, alia süshonou khaive Ramai hi nevei sapeina nasü posheela khaio.

²⁵“Maitalinou nepei hi chikure donou neye chikuki hi savelouzü, chikuki hi veloumo jünou ea teile bubukinou saova-a buyu nasü sousheelo. Molouzü buh sühi velouyu thaisü puhnou neye chiku-apeiona bah hi thoupeiwu shulai ea puhnou neye kharovamai bah hi thoupeiwu-a hukhahi thoushulai.

²⁶Enou nehi chechenou paowe, nenou nevei zho pousha akhaina khapeimo koute sü ne sü sühinou bulai.

²⁷“Nenou khulou vah soulaimoe tea paoyu hai neletao nou chouloure.

²⁸Ana chuo Enou neletao hi paowe süolouzü maitalinou naotumai aliye vasou züpa hilonou zhutei louzü puhnou puh lekhe hinou naotu süpaiye koa khulou soure.

²⁹Südonou ne nghithou zhoulonou neye mah hi süthou peilouzü, süsü reilapawu-a polaiwo! Neye donou pfüphao teiteinou meizaihi polai thouwuyu jüwo pfüphao zhali hayu nou veikou shohie.

³⁰Nebah zhoulonou neye mah hi süthou peilouzü, süsü daodewu-a khilaiwo! Neye donou pfüphao teiteinou meizaihi louyu jüwo pfüphao zhali hayu nou veikou shohie.

³¹“Haikuyu-a paoe, ‘Puh chapfüye rayu maitalinou puh hisü rayu vei ae-aopei larüli peilai.’

³²Ana chuo Enou neletao hi paowe: maitalinou puh chapfü hrümai sheemoyu vanou moanou rawu louzü, süthaisü naotupai nou nghida khailouzü, puhnou puhye sü panou khulou vah soure; alia naotupai sünaye nayu puh-a khulou vah soure.

³³“Daoraimai taohi haibüa paoyu sü neletao nou chouloure, ‘Nenou mada-a chaachou soulai moe, ana nenou chaachou soulouyu nasü Mapaowo hi soupeilai.’

³⁴Ana chuo Enou neletao hi paowe: Hatakia chaachou soukhaiso; raki-a sathou-a chouso, daiolouzü haisü Ramai Vebuh-e;

³⁵moa deiphao-a sathouso, daiolouzü haisü puh phitaibuh-e; moa Jerusalem-a sathouso, daiolouzü haisü dushoyu Veo nuhdue.

³⁶Nepei-a sathou-a chaachou souso, daiolouzü nenou peishu poli-a soukaa moa soutei louhoe.

³⁷Ana nenou paoyu taosü laboua ‘Ae’ moa ‘Moe’ tea paobaiwo; süpeinou paopuyu taosü Ashina hinou vebaie.

³⁸“Haibüa paoyu sü neletao nou chouloure, ‘Nghithou ali süh nghithou ali, alia huh ali süh huh ali.’

³⁹Ana chuo Enou neletao hi paowe; Ashinaye sü nuso. Ana maitalinou neye bai zhoulo vanou phapei louzü kukhelova na-a puh hi pfürei peio.

⁴⁰Alia neye chikuki hi save-a nezao saolou nüyu puh hisü nevei zaoduna-a panou polo.

⁴¹Alia maitalinou neye kaacholi tapeire donou nutai louzü, puhye koa kaacho ahai takhaio.

⁴²Maitalinou nehi hatali kholouzü, süsü puh hi peikhaio; alia maitalinou ne hinou hatali pounü louzü, süsü puh hi poupeikhaio.

⁴³“ ‘Ne kinapaye leshilo ea ne ngaobamai ye ngaoralo’ tea paoyu sü neletao nou chouloure.

⁴⁴Ana chuo Enou neletao hi paowe: neletao ngaobamaiye leshilo ea neletaoye souvea-souhomaiye donou veachi paopeio,

⁴⁵sübüa neletao nou rakibu neletao Puo vei nahpoutumaitao souloulai. Daiolouzü puhnou puh teinghi sü maishimai ea maiveimai pei hi panou kheihao-a vapeiwe, alia teirü sü avei souyutao ea ashi souyutao hi seivepeiwe.

⁴⁶Daiolouzü neletao nou neletaoye leshimai likheiye leshi bailouzü, daidonou Ramai nou neletaoye buu peilai? Süsü kikha khamai koutenou-a souwe!

⁴⁷Alia neletao nou neletao thaihou jüraiye likhei khurü bailouzü, neletao nou kukhemai jünou dai koua souloure? Tahrüh kukhemai-a sübü-a soulou mowu?

⁴⁸Südonou rakibu neletao Puonou licheyu büa, neletao-a liche vuzülai!