Read Poumei Naga MATHIU 8 Bible Online

MATHIU 8 - Poumei Naga bible

MATHIU 8

¹Jisu nou deichi peivanou takouyu kisü mai alaonou puhthai füloure.

²Süthaisü loukhaora soumai alinou puh hi taveloua puh nghojünou kou khoukhüloua paoe, “Mapao, nenou aetou peilouzü, nenou Eye soushee peilou süe.”

³Alia Jisu nou puh bahsü topaloua ea puhye kou deiloua paoe, “E aetouwe, sheelouwo!” Sübühinou mai sünavei loukhaora nasü veiloure.

⁴Süthaisü Jisu nou puh hi paoe, “Keikhaio! Maitalihi-a paoso, ana napao nahi taveloua puhye panou neye zhukhaio; süthaisü mai hrülaihi ne veiloure touyu zhopaoh souloure donou Moses nou kharochi peiyu thaifüa po sheelare na nasü sheela khaio.”

⁵Jisu nou Kapernahum hi talouyu kisü, Rom reihmai kaihpei chamai alinou puhye tave daoloua puh hinou thora-a khoe:

⁶“Mapao, Akilaiwo sü pothairanou soushishoa kihinou züa bure.”

⁷Jisu nou puh hi paoe, “Enou tave puhye souvei peilai.”

⁸Ana kaihpei chawonou puh hi chila peie, “Mapao, neye panou Akihi taveyu Eye donou khamoe. Kharochi likhei peikhaio ea Akilaiwo sü veiloulai.

⁹E koute-a reihmai peichamai khehi bumai baie ea Akhehi-a reihmai bue. Enou puletao alihi ‘Tawo!’ tea kharochi peikhaie puhnou tawe; alia Enou kukhe alihi, ‘Taveo!’ tea kharochi peikhaie puhnou tave baie; alia Enou Aqila hi, ‘Haina soukhaio!’ tea kharochi peikhaie puhnou sünasü soubaiwe.”

¹⁰Jisu nou haihai chouloukhaie khupare ea puhthaifüa laimaitaohi paoe, “Enou chechenou neletao hi paowe, Israel nahmaitao hrohinou haibüa lüyu mailia ngaokhai mohie.

¹¹Enou neletao hi chechenou paowe süolouzü mai alaosou teinghi palo ea teinghi loulonou taveloua raki Vedei nühbuh hi Abraham, Isak ea Jakobye koa ve buzholai.

¹²Ana Vedei vei nahmaitaoye sü vakou maiteiyu buh hi polaipa thouwulai, sühinou puletao sü kralai ea puletao huh sü vei kükülai.”

¹³Süthaisü Jisu nou kaihpei chanawo hi paoe, “Kihi khaiveo, alia neye donou nenou lüyu thaifüa souloutheo.” Alia pha sübü hinou puh kilai nasü veiloure.

¹⁴Alia Jisu nou Pitar kihi velouyu kisü, puhnou Pitar naisü rakee-a zühnou züa buyu sü ngaoloure.

¹⁵Alia Jisu nou puh bah sü kou deipeie, alia rakee nasü khaire ea puhnou shuloua Jisu kuvah soupeie.

¹⁶Alia koukhe loukhaie, maikhe mainou Jisu hi rashi loumai alaosou save. Jisu nou chipao alikhei paopeia rashitaoye sü hulai papeie ea lishia bumai hrülaiye sü souvei peie.

¹⁷Puhnou haibüa souyu hai Isaiah rachi paolawo nanou, “Puh lahnou Eletao vei lishiyu sü pfüpeire ea Eletao vei sounasü pota peiwure,” tea paoyu sü panou vetere donoue.

¹⁸Chuo maisounou tave puhye haopoa buyu sü Jisu nou ngaoloua puhnou puh rozümaitaohi zai polo dovahi taloure donou kharochi peire.

¹⁹Alia razhai dou-apeimai alinou puh hi taveloua paoe, “Dou-apeio, nenou tayu buh taki hisü E-a nethaifüa talai.”

²⁰Jisu nou puh hi chila peie, “Lakhaotao vei kulu bue, alia raohoutao-a phe bue, ana Mai Nahpoutuwo louzü puhpei khüyu buh koutea hae.”

²¹Rozümai hrohinou kukhe alinou puh hi paokhaie, “Mapao, Eye panou khaive Apuoye vulouraio.”

²²Ana Jisu nou puh hi paoe, “Athai fülo, alia thaimaitaoye panou lah puletao vei thaimaiye vuwo.”

²³Alia Jisu nou sakhaohi talou louyu kisü, puh rozümaitao nou puhthai füloure.

²⁴Alia zhukhaio, sükhaimoa zaipei hisü teikhai teirüshi veloua sakhao nasü leitayu laire. Ana Jisuwo zhi-a bue.

²⁵Rozümaitao nou puh hi takouloua puhye soukaishuloua paoe, “Mapao, Ehye khaipapeio! Eh hakayu laire!”

²⁶Jisu nou puletao hi chila peie, “Neletao daidonou piwe? Lü taishoyu maitaore!” Süthaisü puhnou shuloua teikhaitaoye ea zaiye soloure donou kharochi peie, alia sühisü kaonaphi loure.

²⁷Mai hrülainou khupaloua paoe, “Mai haina hai daimaitya-e? Daiolouzü teikhai teirüshi ea zai koutenou-a puhchi züwe!”

²⁸Alia Jisu nou zai polo dovahi buyu Gadara teideihi veloukhaie, puhye sü khüh hrohinou buyu mai ahai nou tapaloua sühinou ve daoe. Mai haina hai hisü rashitaonou louwe ea puhaisü khuleyu vanou ludu sühisü maitalinoua tahaolou shire.

²⁹Alia zhukhaio, puhai nou shusou rao-a paoe, “O Ramai Nahpoutu, nenou Ehye koa daivah soure bue? Teile vemo jühinou nenou Ehye tudee peire donou vewu?”

³⁰Buh sühinou doushomoa vokho alisü pouphoutoua bue.

³¹Südonou rashitaonou Jisu hinou khoa paoe, “Nenou Ehye huta bailai toulouzü, Ehye vokho sünahi seikou thoupeio.”

³²Jisu nou puletao hi paoe, “Tawo.” Südonou puletao nou taloua vo sütaohi koulou loure. Alia zhukhaio, vokho teiteisü saobeiyu leaphihi polouloua zaihi loure ea lou dzü hinou maothea khaire.

³³Vokho mainou tuho nuhduhi velouloua sühinou ve ko teitei ea rashinou louyu mai sühai hisü dai paresa touyu teitei sü paongao peire.

³⁴Südonou nuhdu sühi buyu mai hrülainou Jisu ye daore donou tapa loure; alia puletao nou puhye ngaolouyu kisü puhye nou puletao teidei sü thaowu-a tapei baio tea puh hinou khoe.