Read Poumei Naga MARK 10 Bible Online

MARK 10 - Poumei Naga bible

MARK 10

¹Süthaisü Jisu nou buh süsü thaowu-a Judea teidei hilo taloua Jordan rei kachopare. Sühisü maikhemai alaosou puh hi tave dzüloure ea puh nou raichoki büa puletaoye doupeie.

²Phariseemai kamainou puh hi taveloua puh mah phoupa loure donou puh hi noue, “Mai aliye donou puh chapfüye rayu razhai buwu?”

³Jisu nou chi nouyupu chila peie, “Moses nou neletao hi dai chikha peie?”

⁴Puletao nou chila peie, “Mai alinou rayuvei aepei larüli rüwu-a puh chapfüye phawuyu hai Moses nou aetouwe.”

⁵Ana Jisu nou puletao hi paoe, “Neletao le khouleyu vanou Moses nou chikha hainasü rübaie.

⁶Ana teideiphao soushurai hinou, ‘Ramai nou poutu ea naotuye soupeie.’

⁷‘Alia qo haina vanou poutuna nou puh puo ea puh pfüye thaowu-a puh chapfüye koa lou zholoulai,

⁸alia puhaisü vasou ali soubailai.’ Südonou puhai sü ahai khaimore, ana vasou ali baire.

⁹Südonou Ramai nou podzüpei khaitouyu nasü maiye panou soukhowu laimoe.”

¹⁰Puletao nou kikhahi khailouyu kisü, rozümaitao nou Jisu hi chi süna vanou noupu khaire.

¹¹Puhnou puletao hi paoe, “Maitalinou puh chapfüye rawu-a naotu kukheliye nalouzü puh chapfü pei hi maipfü-maipuo sapayu mah soure.

¹²Süzhaibüa puh chaaye rawu-a poutu kukhe aliki velouzü naotu süpaisü maipfü-maipuo sapayu mah soure.”

¹³Süthaisü mai kamainou nahmaitaoye saloua Jisu ye panou puh bahnou puletao pei hi deipeire donou puh hi save-e, ana rozümaitao nou maikhe maitaoye züpeie.

¹⁴Ana Jisu nou süsü ngaoloukhaie puh hai lekhaloua puh rozümaitao hi paoe, “Nahtumai taoye panou Ahi kouwo, alia puletaoye nuso, daiolouzü Ramai Vedeihai haibüyu maitao veie.

¹⁵Chechenou Enou neletao hi paowe, nahmai ali büa Ramai Vedei polou moyu maitalinou sühi hakia velou hoe.”

¹⁶Süthaisü puh bahnou nahmaitaoye kholoua ea puletao alili pei hi puh bah pokhaipeia puletaoye hapeie.

¹⁷Alia Jisu nou veihduhi tapua buyu hinou, mai alinou taveloua ea puh nghojünou kou khou khüloua puh hi noue, “Dou-apei Aveio, teisa ahri ngaoloure donou Enou dai soulai?”

¹⁸Jisu nou puh hi paoe, “Ne daidonou Eye nou ‘Aveio’ tea kuwe? Ramai likhei baideinou mailia veimoe.

¹⁹Nenou chikha taosü süwe: ‘Maiye southeaso; maipfü-maipuo ye sapaso; vaoso; mada-a chi lapeiso; maiye laso; nepuo ea nepfüye tsükhoulo.’ ”

²⁰Mai sünanou Jisu hi paoe, “Dou-apeio, Enou nalebu kinou chikha haitao pfüphou hai züloure.”

²¹Jisu nou puh hi leshinoupu zhuteiloua paoe, “Nehi chemoyu alikhei bubaire. Tawo ea nevei buyu teitei zhowu-a toure hamai hi peio, alia neye donou rakinou kini bulai; alia taveloua Athai fülo.”

²²Mai sünanou chi haisü chouloukhaie puh zhusü hazhei tare, alia puh sü le veashoa tare; daiolouzü puh hai hanishoe.

²³Jisu nou puh rozümaitaoye zhusühaoloua puletao hi paoe, “Hanimai donou Ramai vedeihi velouyuhai daizhozhou tateilaisa!”

²⁴Puh chipao hinou rozümai taosü khupa loure. Ana Jisu nou puletao hi paopue, “Anahkhemai, Ramai Vedeihi velouyu hai daizhozhou tateisa!

²⁵Hanimai alinou Ramai Vedeihi velouyu jüwo rachonou peimihi tailouyu nanou talahie.”

²⁶Sühinou rozümaitao sü lejünou khupapuloua alinou lihi paoe, “Sükulouzü thaohnou khailu lousüe?”

²⁷Jisu nou puletaoye pheteiloua paoe, “Maiye donou haisü soulou hoe, ana Ramai hiwo sübümoe; ha teitei hai Ramaiye donou soulou süe.”

²⁸Süthaisü Pitar nou paoe, “Zhukhaio, Ehnou ha teitei thaowu-a nethai füloure.”

²⁹Jisu nou puletao hi paoe, “Enou neletao hi cheche chi paowe süolouzü Eye donou ea ko aveina donou puh ki, thaihou jüraimai, tumai, pfü-puo, nahmai, moa teidei thaowuyu maitalisü,

³⁰maihrü haina hinou alaosou koua ngaolai. Puhnou zha kaihli koua ki, thaihou jüraimai, tumai, pfümai, nahmai ea teidei alia souvea souhoyu-a koa ngaolai; alia vere maihrü nahisü puhnou teisa ahri ngaolai.

³¹Ana chu raiyu mai alaonou nalai, alia chu nayu mai alaonou railai.”

³²Chuo Jisu ea puh rozümaitao sü Jerusalem hi tapare ludu hinou ta-a bue. Jisu hai rozümaitao jünou raia tawe ea rozümaitao sü khupasho loure, alia thailonou laiyu maitaosü ngaopisho loure. Alia Jisu nou puh rozümai kiahaitaoye sakupaloukhaia puh hi paretao vanou paongao tare.

³³Puhnou puletao hi paoe, “Zhukhaio, Eletao Jerusalem hi tapawe; alia sühinou Mai Nahpoutuye sü napao adumaitao ea razhai dou-apei maitao bah hi thoupeiwulai, alia puletao nou puhye thaizüe tea mah dukhaiwu-a tahrüh kukhemai bah hi thoupeiwulai;

³⁴alia puletao nou puhye konülai, puh vahi taidzünou süsholai, puhye dapeilai ea southeawulai; ana teithe asü thaisü puh hai hrishulai.”

³⁵Süthaisü Zebedee nahpoutu Jems ea Johan nou Jisu nghojühi takouloua puh hi paoe, “Dou-apeio, Ahaiye donou neye panou hali soupei nüwe.”

³⁶Jisu nou puhai hi noue, “Süsü daie?”

³⁷Puhai nou chila peie, “Nenou nevei khouko ava vedei vei vebuh hi ve buyuki, Ehye panou neye koa alinou ne bahkha zhoulo ea aliye ne bahkha nalohi buyu züpae.”

³⁸Jisu nou puhaihi paoe, “Nelenou dai khowe touyu nelenou sümoe. Enou kü vuzülaiyu veare pai nasü nele-a pokülou süwu? Molouzü Eye dzükhao davuzü laiyu zhai hinou nele-a dzükhao dalou süwu?”

³⁹Puhainou puh hi chila peie, “Ehnou soulousüe.” Alia Jisu nou puhaihi paoe, “Chechenou Enou kü vuzülaiyu pai nasü nele-a külai ea Eye dzükhao dalaiyu zhai hinou nele-a dzükhao dalai.

⁴⁰Ana Abahkha zhoulo ea nalohi bulaiyu maiye doyu züwo Ahi hae. Haisü Ramai puhnou peilai tea soudakhai touyu puletaoye donou bailai.”

⁴¹Alia süsü kukhe rozümai kirou taonou choulouyu kisü puletao nou Jems ea Johan pei hi lekha loure.

⁴²Südonou Jisu nou puletao hrülaiye puh hi kuve dzüloua puletao hi paoe, “Neletao nou süwe süolouzü Tahrüh kukhemai pei hi khoyu mainou puletao pei hi paopu souwe, alia puletaopei adumainou puletaoye tukha-a bue.

⁴³Ana neletao hrohiwo sübüwu laimoe. Neletao hronou maitalinou dunü louzü, puhnou kukhetao vei kilai souvu zülai;

⁴⁴alia neletao hronou maitalinou peichana sounü louzü puhnou mai hrülai vei qila soulai.

⁴⁵Daiolouzü Mai Nahpoutu koutea maiye panou puh kuvah soure donou vemoe ana mai kuvah soure donou ea puh vei hrirai hai mai alao vei phapeimuh peire donou vebaie.”

⁴⁶Alia puletao sü Jerikohi velou loure, alia Jisu nou puh rozümaitao ea maisou aduliye koa Jeriko thaowu-a tayu phakisü Timas nahpoutu nghicha-a tosü touyu Bartimas hai dupe hinou chobua bue.

⁴⁷Puhnou süsü Nazareth hi Jisue tea choulouyu kisü paikushoa raopare, “David Nahpoutu Jisu! Eye zhuvea peio!”

⁴⁸Mai alaonou puhye züpeia nasha-a buwo tea paopeie. Ana puhnou pai kupuloukhaia paoe, “David Nahpoutu, Eye zhuvea peio!”

⁴⁹Jisu nou chaoloua paoe, “Puhye kulo.” Südonou puletao nou nghichayu mainaye kuloua puh hi paoe, “Lesalo ea lashulo, puh nou neye kua bue.”

⁵⁰Sühinou puhnou puhsah polaiwu-a lashuhaloua Jisu hi takoure.

⁵¹Jisu nou puh hi noue, “Eye panou neye donou dai soupei nüwe?” Nghicha pounanou puh hi chila peie, “Dou-apeio, Eye panou Anghi ngaoloukhaio.”

⁵²Jisu nou puh hi paoe, “Tawo, ne lünou neye souvei peire.” Alia sübühinou puh nghisü ngaoloure ea ludu hinou Jisu thaifüpoa tare.