Read Poumei Naga MARK 11 Bible Online

MARK 11 - Poumei Naga bible

MARK 11

¹Alia puletao nou Jerusalem ngheiki Oliv deichi hi buyu Bethphage ea Bethani hi velouyu kisü, Jisu nou rozümai ahaiye raia seitare,

²alia puhaihi haibüa paopeie; “Nehai nghojühi buyu nuh nahi tawo. Nehainou sühi velou büyu kisü mailinoua raiki seikhai moyu rheisüh toutu ali rainou khikhai touyu ngaolai. Süsü pheipaloua haihi süveo.

³Alia maitalinou nehaihi, ‘Daidonou haibüa soue,’ tea noulouzü, ‘Haihai Dou-apeionou moshilaiyu bue ea buh haihi thalasou seikhaive peilai,’ tea puh hi paokhaio.”

⁴Südonou puhai nou taloua rheisüh toutu aliye dupehi buyu ki ali kikhu hinou khikhai touyu sü ve ngaoloure. Alia puhai nou sünaye rai pheipa-a buyu hinou,

⁵pehinou la-a buyu kamainou puhaihi noue, “Nehai rheisüh toutunaye rai pheipa-a daisoulai?”

⁶Jisu nou paopeiyu büa puhai nou chila peie ea mai sütaonou puhaiye panou tare.

⁷Puhainou rheisüh nasü Jisu hi süve-e ea puletao sabasü süna phaohi khupeiwu-a Jisu ye panou pabuloure.

⁸Maikhemai taolinou puletao sah hai luduhi khupeie ea kukhe mainou rekounou taho sübotao jüdeloua pove duhi raokhaipeie.

⁹Puh nghojülonou tayu ea thailonou puhthaifüa laiyu maitao nou haibüa shusoua raoe, “Hosanna! Mapao zhih hinou taveyu puh hai rakoveie!

¹⁰Veloua buyu Eletao puo David Veo vei Vedeisü rako veie! Akukulai hisü Hosanna!”

¹¹Jisu nou Jerusalem hi talouloua rathoki hi tave-e, alia sühi buyu ha teiteiye zhusühaoe. Ana teinou naleyu vanou puhnou puh rozümai kiahaitaoye koa Bethani hi tare.

¹²Thainaisho sü puletao nou Bethani hinou dakhai kouyu phakisü Jisu hai houloure.

¹³Puhnou doukonou doushibeli sünghou nou bonoupoa buyu sü zhingaoloua sühinou doushilia ngaolaihi mosa tea taho zhue. Ana puhnou sühi takouyu phakisü sünghou khaikho ngaolou baire, daiolouzü sükihai doushi shiyu khouteile mohie.

¹⁴Jisu nou doushibe nahi paoe, “Maitalinoua ne hinou doushi toupukhai khailaimoe!” Alia puh rozümaitao nou süsü choue.

¹⁵Puletao nou Jerusalem hi velou louyu kisü, Jisu nou rathokihi talouloua sühinou na zhoa ea hrüa buyu mai hrülaiye hushu tare. Puhnou sühinou shanou lea-a bumaitao vei arübuh ea rahou zhoyu maitao vei buhnaatao sü popeishou laire,

¹⁶alia puhnou maitaliye panou rathoki kijühi hatalia poloukhai bare.

¹⁷Süthaisü puhnou maikhe maiye doupei tare: “‘Tahrüh hrülai donou Akihai veachi paoyuki tea kulai’ tea rüthouwure mowu? Ana neletao nou haisü vaoyumai tutsübuh souwure!”

¹⁸Napao adumaitao ea razhai dou-apeimainou süsü chouloure, südonou puletao nou Jisu ye southeare donou do phoushure. Puletao sü puhye piwe, daiolouzü maisou hrülainou puhnou doupeiyu hisü khupa loure.

¹⁹Koukhe loukhaie Jisu ea puh rozümai taosü nuhdu süsü thaowu-a tare.

²⁰Thainaisho shohna hisü puletao nou ludu süna hinou ta-a buyu hinou doushibe sünaye ngaoloure. Doushibe süsü manou pu kirüh tare.

²¹Alia Pitar nou raia payu nasü licholoua Jisu hi paoe, “Zhukhaio, Dou-apeio, nenou chapeiyu doushibe nasü thaire!”

²²Jisu nou puletao hi chila peie, “Ramaiye lülo.

²³Achechenou Enou neletao hi paowe, maitalinou deichi haina hai, ‘Nelah miposhu zaihi zhaolouwo,’ tea paolouzü, alia puhle hinou lekikhai molouzü, ana puh nou paoyu sü vetelai tea louche louzü, süsü puhye donou soupeilai.

²⁴Qo haina vanou Enou neletao hi paowe: Neletao nou veachi pao-a hatali kholouzü, süsü neletao nou ngaoloure tea louchelo, alia neletao nou khoyu talisü neletao hi peilai.

²⁵Alia neletao nou veachi pao-a layu sasü, neletao nou maitali pei hi motouyu bulouzü khaipeio; sübülouzü rakibu neletao Puonoua neletao nou soukhai touyu mah taosü khaipeilai.”

²⁶(Ana neletao nou kukhe maiye khaipei molouzü, rakibu neletao Puonou-a neletao nou soukhai touyu mah taosü khaipei laimoe.)

²⁷Alia puletaohai Jerusalem hi veloupu khaire. Alia Jisu nou rathoki hinou tasühao-a buyu hinou, napao adumaitao, razhai dou-apeimaitao ea tsümai taonou puh hi taveloua,

²⁸puh hinou noue, “Vah haitao souyu nevei soulousü zü dai bue? Zü haina hai thaohnou nehi peie?”

²⁹Jisu nou puletao hi chilapeie, “Enou neletao hi chi alikhei noulai, alia neletao nou Ahi chila peilouzü, Enou neletao hi vah haitao souyu Ahi daizü bue touyu paongao peilai.

³⁰Johan vei dzükhao dayu zühai daikinou ve: Ramai hinouho, mai hinoue?”

³¹Alia lah puletao hrohinou veiva-a paoe, “Eletao daichi paolai? Eletao nou, ‘Ramai hinoue,’ tea chila peilouzü, puh nou, ‘Sükulouzü daidonou neletao Johan ye louche moe?’ tea paolai.

³²Ana Eletao nou, ‘Mai hinoue,’ tea paolouzü...” (Puletao sü maikhe maiye ngaopiwe, daiolouzü maikhemai hrülainou Johan hai rachi paolamai alie tea powe.)

³³Südonou puletao nou Jisu hi “Eletaowo sümoe,” tea chila peie. Jisu nou puletao hi chila peie, “Sükulouzü E-a neletao hi Enou vah haitaohai dai zünou sousa touyu hai paongao laimoe.”