Read Poumei Naga MARK 14 Bible Online

MARK 14 - Poumei Naga bible

MARK 14

¹Chuo Tachonüh ea Raokonüh koumojü teithe ahai bubaire. Alia napao adumaitao ea razhai dou-apeimaitao nou khei-a Jisu ye niloure ea southeare donou do phoutare.

²Daiolouzü puletao nou paoe, “Haihai Eletao nou nüh teile hinou souwu laimoe, molouzü maisou hronou bvüro shulai.”

³Alia Jisu nou Bethani hinou bua loukhaora souyu Simon kihinou vaia bubukinou naotumai alinou kai nüvei shoyu ea muhtei shoyu sheetouyu nard theadzünou phoupeiyu chuh kaanou souyu khouli poloua tave. Puhnou khou nasü dakhao paloua kainüvei theadzü nasü Jisu pei hi lakhai peire.

⁴Ana sühi buyu mai kamainou rarouloua alinou lihi haibüa paoe, “Daidonou theadzü nahai haibüa souhawe?

⁵Daiolouzü haihai husha kaihsü muh jü koua zholou süe, alia pousha nasü toure hamai hi peilou veie!” Alia puletao nou puhye sü raochichi peire.

⁶Ana Jisu nou paoe, “Puhye panou lah buwo; daidonou neletao nou puhye souchowe? Puhnou Ahi ha veili soupeire.

⁷Daiolouzü neletaowo toure hamaiye teisanou koa bue ea neletao nou züpayu teile tali hinou puletaoye soukha peilou süe; ana neletao nou Eye koa teisanou bulai moe.

⁸Puhnou soulousü nasü puhnou souloure; puhnou Apfüphao hai vure donou raia kaivei theadzünou noupeire.

⁹Alia cheche nou Enou neletao hi paoe, deiphao teiteihi ko avei paodou tayu buh takihi puhnou soukhai touyu nasü puhye li-choloure donou paotalai.”

¹⁰Süthaisü kiahai hrohinou ali soua buyu Judas Iskariot nou Jisu ye napao adumaitao bah hi shohdo southou peire donou puletao hi tare.

¹¹Alia puletao nou puh chipaosü chouloua le sasho loure, alia puhye sha peire donou apaopeire. Südonou Judas nou Jisu ye puletao bah hi thoupeire donou zhou avei phoushu tare.

¹²Alia Raoko nüh vei teithe raikai kisü, Tachonüh tovai vei zhaotu datheayu teithehi Jisu rozümai taonou puh hi noue, “Nenou Ehye panou daikinou neye donou taho Tachonüh vai soudayu züpawe?”

¹³Süthaisü Jisu nou puh rozümai ahaiye seita-a puhaihi haibüa paopeie: “Nuhdu nahi taloulo, alia dzükhouli pfütayu mai alinou nehaiye daolai; puhthai fülo,

¹⁴alia puhnou talouyu ki talivei paopuna hisü haibüa paokhaio: ‘Dou-apeionou paoe, Enou houre buh kahi bue. Enou Arozümaitaoye koa daikinou Tachonüh vai toulai?’

¹⁵Süthaisü puhnou nehaihi buh-züh souda chekhouwuyu ea dushoyu kishorei kide ali ngaopeilai, sühinou nehainou Eletaoye donou ha teitei soudalai.”

¹⁶Alia rozümai sühainou taloua nuhdu sühi veloure ea ha teitei sü Jisu nou puhaihi paopeiyu büa ve ngaoloure; alia puhai nou Tachonüh vaisü soudare.

¹⁷Alia koukhe loukhaie, Jisu nou rozümai kiahaitaoye koa tave-e.

¹⁸Alia puletao nou arübuh vanou toua bubu kinou, Jisu nou paoe, “Enou chekhaoa neletao hi paoe, neletao hrohinou alinou süolouzü Eye koa touyu nanou Eye shoh soupeilai.”

¹⁹Rozümaitao sü leveasho loure ea shoshonou puh hi noushu tare, “Süsü Ewu?”

²⁰Jisu nou chila peie, “Süsü neletao kiahai hrohinou Eye khaoh ali hinou koa raokhao sücha zhoyu nasüe.

²¹Mai Nahpoutu louzü sheeyu larübvü nou puh vanou paopeiyu kua tarabaie; ana Mai Nahpoutuye shoh soupeiyu mai süna donou daizhozhou ngaopisa! Mai süna donou nakoukhai moyu nanou veikou shohie!”

²²Alia puletao nou toua bubu kinou, Jisu nou raokhaoli poloua hapeire, alia süsü soukhowu-a puh rozümaitao hi polapeia paoe, “Haihai Apfüphaoe, polouwo.”

²³Süthaisü puhnou paili poloure, alia puhnou Ramai hi kalo paoyu kisü, süsü puhnou puletao hi peie; alia puletao hrülainou sühinou poa küloure.

²⁴Alia puhnou puletao hi paoe, “Haihai mai alao donou küpa peiyu Vo soukhaiyu Azhe nasüe.

²⁵Chechenou Enou neletao hi paoe, Ramai Vedei hinou Enou sünahai sheetoua külaiyu teithe vemo koutesü, Enou darkha shi haina hinou küpukhai laimoe.”

²⁶Süthaisü puletao nou lou ali souloua Oliv deichi vahi tapare.

²⁷Jisu nou puletao hi paoe, “Neletao hrülai Eye thaowu-a tuta bailai, daiolouzü sheeyu larübvü nou paoe, ‘Enou zhaokhowoye southeawulai, alia zhaotu sü ratakhailai.’

²⁸Ana Enou hrishu louyu thaisü, Enou neletao jünou raia Galileehi talai.”

²⁹Pitar nou chila peie, “Kukhemai hrülainou neye thaotayuma, Ewo neye hakia thaokhai laimoe!”

³⁰Jisu nou Pitar hi paoe, “Enou nehi paowe, süolouzü zhoukhei houjünou khao ahaikho mojünou nenou Eye lüh asü laiwulai.”

³¹Ana Pitar nou chihpushoa paoe, “Enou neye koa thaire koute hia, E neye laikhai laimoe!” Alia rozümai kukhe hrülai-a sübüa paoe.

³²Puletao nou Gethsemane tea kuyu buh alihi taveloure, alia Jisu nou puh rozümaitao hi paoe, “Enou veachi paobuki haihinou kou buwo.”

³³Alia Jisu nou puhye koa Pitar, Jems ea Johanye satare, alia puh hisü levea shoyu ea le choroyu vedaore.

³⁴Alia puhnou puletao hi paoe, “Arako hai veathou thairesoua bure; haihi chaokhaio, alia zhaihe toulo.”

³⁵Alia puhnou nghojülo tadouphou kouloua deiphinou kou kaoloure ea soulou veilouzü veahoyu teile nasü puh hinou polata peire donou veachi paotare.

³⁶Alia puhnou paoe, “Abba, Apuo! Neye donou hatali soulou süe. Veayu pai haina hai Ahinou povai peio. Ana Aleli moa neleli soulouwo.”

³⁷Alia puhnou khaikouyu kisü, rozümai asütaosü zhia bu-a ngaoloure. Sükisü Jisu nou Pitar hi paoe, “Simon, ne zhia buwu? Ne teilecho ali koutea zhaihe-a bulouhorewu?”

³⁸Alia puhnou puletao hi paoe, “Neletao athaohi loulou more donou zhaihelo ea veachi paolo; rakowo louzü chechenou züpawe, ana vasouwo louzü lelouhoe.”

³⁹Alia puhnou tapuloukhaia leh chipao büa veachi paoe.

⁴⁰Süthaisü puhnou rozümaitaohi khaikoupue ea puletaoye zhia ngaoloure, daiolouzü puletao nghisü süübeire; alia puletao nou puh hi dai chila peilaisa touyu sükhai more.

⁴¹Puhnou lüh asü chena khaikouyu kisü, puhnou puletao hi paoe, “Neletao chu koute-a zhia ea soa buwu? Tai süre! Phasü vere! Zhukhaio, chuo Mai Nahpoutuye sü mahmaitao bah hi thoupeire.

⁴²Shulouwo, Eletao talairekhe. Zhukhaio, Eye shoh soupeiyu nasü haihi bure!”

⁴³Alia Jisu nou chi paobebu kinou thalasoua rozümaitao kiahai hrohinou alisoua buyu Judas sü tavere. Puhye koa napao adumaitao, razhai dou-apeimaitao ea tsümaitao hinou seiveyu khoche ea süda poyu mai alaosou tavere.

⁴⁴Chuo shoh soupeiyu mainanou puletao hi shee ali pei-a paoe. “Enou münou murenasü neletao nou züpayu mainae; puhye nilo ea khotouloua puhye sapoa tawo.”

⁴⁵Judas nou veloulou bükhaie, puhnou Jisu hi takouhaloua paoe, “Dou-apeio!” alia puhye münou mue.

⁴⁶Südonou puletao nou puh pei hi bakha khakhaia puhye niloure.

⁴⁷Ana ngheikinou la-a buyu mai alinou puhvei khoche paizhouloua napao peichana kilai naye sü podao-a puh nousü jadere.

⁴⁸Süthaisü Jisu nou puletao hi paoe, “Maivei saotoumai aliye nilaiyu büa khoche ea südatao poa Eye niloure donou neletao tavewu?

⁴⁹Teithetsü Enou rathoki hinou doupeia neletaoye koa bue, alia neletao nou Eye nimoe. Ana sheeyu larübvü chihai veteloutheo.”

⁵⁰Sükisü rozümaitao hrülainou puhye thaowu-a tutakhaire.

⁵¹Alia jüyu sah likheithe babaiyu nahlemai alinou Jisu thaifüa takoue; puletao nou puh ye niloure,

⁵²ana puhnou puh sahbasü thaowu-a baitoua tutare.

⁵³Süthaisü puletao nou Jisu ye napao peichana kihi satare; alia sühinou napao adumaitao, tsümaitao ea razhai dou-apeimaitao hrülaisü vedzüa bue.

⁵⁴Alia Pitar nou adoukounou puhthai füpoa napao peichana kijühi tave. Sühinou puhnou kou chobuloua reihkhaomai taoye sa-a meipenou meivoua bue.

⁵⁵Chuo napao adumaitao ea tsüme teiteinou Jisu ye southeare donou Jisu hinou dayu zhopaoh phoue; ana puletao nou halia ngaolou moe.

⁵⁶Daiolouzü mai alaonou puh pei hi dayu zhopaoh peie, ana puletao vei zhopaoh taosü thaomoe.

⁵⁷Sühinou mai kamainou lashuloua puh pei hi dayu zhopaoh peia paoe:

⁵⁸“Bahnou soukhai touyu rathoki hainasü Enou souhawu-a bahnou soumoyu rathoki kukheli, teithe asü levai hinou Enou soupeilai, tea puhnou paoyu hai Ehnou choue.”

⁵⁹Ana sükoutea puletao vei zhopaoh sü thaokhai more.

⁶⁰Alia Napao Peichana nou puletao nghojünou lashuloua Jisu hi noue, “Ne chila peire lia hawu? Mai haitaonou nepei hi motoua dukhaiyu hai daie?”

⁶¹Ana Jisu nou ngasou buloua chila lia peimoe. Süthaia Napao Peichana nou puh hi noupue, “Ne hai Rako Avei Ramai Nahpoutu Khristawu?”

⁶²Jisu nou chila peie, “E-e; alia Mai Nahpoutu nou khoukhoulaiwo vei bah zhoulo vanou bua raki teihaopei vanou taveyu neletao hrülainou ngaolai!”

⁶³Napao peichana nou puh sah daophaloua paoe, “Eletao nou süpeinou zhopaoh kukhe phoupuyu dai zhiyu bue?

⁶⁴Puhnou Ramaiye paoshiyu sü neletao nou chouloure. Kakua neletao nou chowe?” Alia puletao hrülainou puh hai thaizüe tea puh pei hi mah dukhai peire.

⁶⁵Alia puletao hronou kamainou Jisu vahi taidzü süshopeie, alia puletao nou puh nghisü sahnou züwu-a ea puhye dapeia paoe, “Neye thaohnou dawe, paokhaio!” Alia reihkhaomai taonou puhye bahzünou dapeia saloure.

⁶⁶Alia Pitar nou chu koutea deiphi kijü hinou buyu phahinou Napao Peichawo vei kilai loumaina alisü tave-e.

⁶⁷Alia Pitar nou meivoua buyu sü puhnou ngaoloukhaie, Pitar hi zhuteiloua paoe, “Ne-a Nazareth hi Jisu ye koa laiwe.”

⁶⁸Ana puhnou süsü ba-a paoe, “Ewo sümoe moa nenou dai paosa touyu vei ko-a Ewo sümoe; alia puhsü kijü bomühi tapare.” Sübühinou houjü nou khaopare.

⁶⁹Süthaia kilai loumaina painou puhye sühinou ngaoloukhaie ngheiki la-a bumai hi paopukhaie, “Mai haina hai puhmaitao hrohinou alie!”

⁷⁰Ana Pitar nou süsü bapu khaire. Alia phajü thaisü ngheikihi la-a bumainou Pitar hi mah dukhaia paopu khaire, “Ne hai puletao hrohinou alie touyu hisü nenou hakia balou hoe, daiolouzü ne-a Galilee himaibaie.”

⁷¹Ana Pitar nou lahye cha-a ea choungao-a paoe, “Neletao nou pao-a buyu mai hainaye sü E sükhaimoe!”

⁷²Sübühinou houjünou lüh ahai chena khaopare. Alia Pitar nou puh hi Jisu nou kabüa, “Houjünou khaohaikho mojünou nenou Eye lüh asü chena koute balai,” tea paopeiyu sü liloure. Alia puhsü shochesou kraloure.