Read Poumei Naga MARK 15 Bible Online

MARK 15 - Poumei Naga bible

MARK 15

¹Alia shohna hisü napao adumaitao nou thashoa tsümaitao, razhai dou-apeimaitao ea tsüme teiteiye koa chikhai loure; alia puletao nou Jisu ye baorai phure ea sataloua Pilat bah hi thoupeire.

²Alia Pilat nou puh hi noue, “Ne Jihudimai Veowu?” Jisu nou chila peie, “Nenou süsü paowure.”

³Napao adumaitao nou Jisu pei hi chi taoli paodu khaipeie,

⁴Südonou Pilat nou puh hi chi noupu khaire, “Newo chila peilai mowu? Zhukhaio, puletao nou nepei hi chi daizhozhou paodusa!”

⁵Ana Jisu nou chilalia peikhai bare, südonou Pilat sü khupa loure.

⁶Chuo Tachonüh sasü maisounou züpa-a khoyu hukhahi bumai aliye puletaoye donou Pilat nou phapeiyu zhaibue.

⁷Süphakisü Barabbas tea kuyu mai ali-a hukha hinou teidei chibvüpayuki maiye southeayu maitaoye koa bue.

⁸Alia maisounou Pilat hi tave dzüloua puletaoye donou puh zhai thaifüa soupeire nasü kholoure.

⁹Alia puhnou puletao hi chila peie, “Neletao nou Eye panou neletaoye donou Jihudimai Veoye phapeiyu züpawu?”

¹⁰Daiolouzü Jisu ye napao adumaitao nou ngaoraiyu vanou puh bah hi thoupeibaie touyu hai Pilatnou sütoua bue.

¹¹Ana napao adumaitao nou maisouye Pilat hinou puletao donou Barabbas ye nou phapeire donou kholo tea süpeire.

¹²Pilat nou maisouhi paopukhaie, “Sütoulouzü neletao nou Jihudimai Veo tea kuyu mai naye sü Eye panou dai souyu züpawe?”

¹³Alia puletao nou shusou raopu khaire, “Puhye veatheawo!”

¹⁴Ana Pilat nou puletao hi paoe, “Daidonou? Puhnou daishi souwure?” Ana puletao nou chihpu sholoua shaloure, “Puhye veatheawo!”

¹⁵Südonou Pilat nou maisou züpa sounüa Barabbas ye puletao donou phapeire. Süthaisü puhnou Jisu ye sü dapeiwu-a kros vanou veatheare donou thoupeire.

¹⁶Alia reihmaitao nou Jisu ye sapoa teidei khowo vei fühao kijü levai hi loure ea puletao nou reihmaitaome teiteiye kuve dzüloure.

¹⁷Alia puletao nou Jisu vahi maomüyu sahli bapeie, alia shunou peirüli khealoua puh pei hi porüpeie.

¹⁸Süthaisü puletao nou puhye khurüshuloua paoe, “Jihudimai Veosü maishokhaio!”

¹⁹Alia puletao nou khu süponou puh pei hi dapeie, alia puh vahi taidzünou süshopeie ea puletao nou kikou khou khüloua puhye khurüe.

²⁰Alia puletao nou puhye konü chewuyu thaisü, puletao nou maomüyu sah nasü laokhaia lah puh sahbanou bapeire. Süthaisü puhye kros vanou veatheare donou puletao nou sapoa tare.

²¹Alia ludu hinou puletao nou deichi hilonou veiveyu Simon tea kuyu mailiye daoloure. Reihmaitao nou puhye nou Jisu vei kros pfükhapeio tea kutai loure. Simon hai Kurini teidei hi maie ea puh sü Alekjandar ea Rufus puoe.

²²Puletao nou Jisu ye Golgotha tea kuyu (süvei kowo louzü peiraobvü buh toue) buh hi sapoa tare.

²³Alia puletao nou kainüvei mair dzünou thou chohyu darkha dzü puh hi peie, ana Jisu nou süsü kübare.

²⁴Süthaisü puletao nou puhye sü kros vanou veakhare ea puh vei sabanüh taosü thaoh thaohmainou daidai ngaolaisa tea rakovei zhua zhiloure.

²⁵Puletao nou puhye veakhayu sü shona teilecho akü tare.

²⁶Alia puh pei hi paodu khaiyu chipao nasü haibüa rükhaitoue: “Jihudimai Veo.”

²⁷Puletao nou maivei saotoumai ahaiye Jisu ye koa kros vanou aliye puh bahkha zhoulova ea aliye puh bahkha nalova hinou veakhare.

²⁸(Haibüa sheeyu larübvü hinou, “Puhye sü mahmaitaoye koa chothou zhore” tea paokhai touyu sü panou vetere.)

²⁹Alia ngheikinou takou-takheyu maitao nou puletao pei zhaloua puhye konüa paoe, “Oho! Rathoki souha laiyu ea teithe asü hinou soupei khailou süyu ne,

³⁰chuo kros vanou takouloua nelah khailu louwo!”

³¹Süzhaibüa napao adumaitao ea razhai dou-apeimaitao-a Jisu ye konüa alinou lihi haibüa paoe, “Puhnou mai kukheye khaipeie, ana puhwo lahye khailu louhoe!

³²Eletao nou ngaoloua louche loure donou Israelmai Veo Khrista sü chu kros vanou takou louwo!” Alia Jisu ye koa kros vanou veakhayu puhai-a sübüa puhye nghi-a paoe.

³³Alia heako teilecho kiahai tayu phakisü teidei teitei sü zhitei loure ea süsü koukhe teilecho asü koute zhikoue.

³⁴Alia koukhe teilecho asü tayu phakisü Jisu nou pai kushoa raopare, “Eloi, Eloi, lama sabachthani?” süvei kowo louzü, “A Ramai, A Ramai, ne daidonou Eye thaowure?”

³⁵Alia ngheikinou la-a buyu mai kamainou süsü chouloua paoe, “Zhukhaio, puhnou Elijah ye lawe!”

³⁶Alia puletao hronou mai linou tuho phako li poloua khairouyu darkha zhaoh hinou pothou süchaloua süsü khu süpo ali pei hi khailoure. Süthaisü puhnou süsü Jisu mühi pola khepeia paoe, “Chalaio! Elijah nou taveloua puhye kros peinou pokoupei laimosa Eletao zhulaikhe!”

³⁷Alia Jisu nou shusou raoloua thaire.

³⁸Alia rathoki sheeyu buh hi hrakhaiyu sah nasü ahai soua peinou tei koute patare.

³⁹Alia Jisu kros nghojünou la-a buyu reihmai kaihpei chananou Jisu hai kabüa thairesa touyu ngaoloua paoe, “Chechenou mai haina hai Ramai Nahpoutu vuzüe!”

⁴⁰Naotumai kamaitao-a sühi adoukounou zhia bue. Puletao hrohisü Magdalini Meri, Jems nana ea Josef pfü Meri ea Solomi-a louwe.

⁴¹Jisu nou Galilee hi bubu kinou puletao nou puhthai füta-a puh kuvah soue. Jisu ye koa Jerusalem hi taveyu naotumai kukhe taolia sühi koa bue.

⁴²Arimathea hi Josef nou velouyu phahai koukhe loure. Puh hai Ramai Vedei veyu khoyu tsüme hinou tsükhouyu mai alie. Süzhouhai soudayu teithekie (süolouzü Soteithe nghojühi teithe nae), südonou Josef nou khuveisholoua Pilat nghojühi takou puh hinou Jisu pfüphao peio tea khoe.

⁴³

⁴⁴Pilat hai Jisu thaire touyu chouloua khupasho loure. Südonou puhnou reihmai kaihpeichawo naye kuloua Jisu thaiyu hai phasho parewu tea puh hinou noue.

⁴⁵Alia puhnou reihmai kaihpeichana hinou Jisu thaire touyu sülouyu kisü, puhnou Josef hi pfüphao nasü poloua veie tea paopeie.

⁴⁶Alia Josef nou jüyusah ali hrüloua pfüphao nasü deiphihi pokouloure ea sahba sünanou pozüwu-a chuhrao hinou vouthouloua soukhai touyu khüh nahi Jisu pfüphao sü pothou khaire. Süthaisü puhnou chuh aduli khüh mühi phaodakou khaire.

⁴⁷Magdalini Meri ea Josef pfü Meri nou süsü zhua Jisu pfüphao hai kahi povure sa touyu hai ngaoe.