Read Poumei Naga MARK 16 Bible Online

MARK 16 - Poumei Naga bible

MARK 16

¹Soteithe talayu thaisü, Magdalini Meri, Jems pfü Meri, alia Solomi nou taloua Jisu pfüphao hi noupeire donou kainü veiyu natao hrüloure.

²Alia Rathozhou shona teinghi payu phahinou, puletaosü khüh hi tare.

³Ludu hinou puletao alinou lihi haibüa paoe, “Thaohnou Eletaoye donou khühmü hinou chuh nasü phaota peilai?”

⁴Alia puletao nou zhupakhaie chuh nasü phaolaiwu-a ngaoloure (chuh süsü dushoe.)

⁵Südonou puletao nou khüh hi taloue ea sühinou puletao nou sahkaa bayu khemaina ali bahkha zhoulonou chobuyu ngaoloua puletao hai khupare.

⁶Alia puhnou puletao hi paoe, “Khupaso; neletao hai kros vanou veatheawuyu Nazareth Jisu ye phoue touyu hai Enou süe. Puhwo haihi hae. Puh hrishu loure! Zhukhaio, haisü puletao nou puhye pokhaiyu buh-e.

⁷Ana chuo taho puh rozümaitao ea Pitar hi, ‘Puhnou neletao hi paopeiwuyu sübüa puh hai neletao jünou raia Galilee hi tare; sühinou neletao nou puhye ve ngaolai,’ tea paopeio.”

⁸Alia puletao nou khüh hinou tapaloua tutare; daiolouzü puletaosü pi-nguyu ea khupanou phouloure; alia puletaosü piyu vanou alinou lihi ha chilia paomoe.

⁹[Chuo Jisu nou athai hinou Rathozhou shohna ki hrishu louyu thaisü, puhnou raikaia raiki puhnou rashi anaiye hulaipa peiyu Magdalini Meri hi tave ngaopeie.

¹⁰Puhnou taloua Jisu samai taohi paopeie. Puletao sü dopfüa ea kra-a bue.

¹¹Ana puletao nou puh hai hriwe ea puhnou Jisu ye ngaoe touyu choulouyu kisü, puletao nou puhchi sü louchepei more.

¹²Haithaisü Jisu nou zhai akuli hinou rozümai ahaihi nuhbuhlo tahoyu ludu hinou ve ngaopeie.

¹³Puhainou khaiveloua kukhetaoye paongao peie, ana puletao nou süsü louchebae.

¹⁴Akhai khailai hinou Jisu nou puh rozümai kialitaonou toua buyu hinou tave ngaopeie. Alia puletao nou louche bayu ea le khouleyu vanou puhnou puletaoye züpeie, daiolouzü puh hrishu louyu ngao-a bumaitaoye puletao nou louche peimoe.

¹⁵Puhnou puletao hi paoe, “Deiphao teiteihi taholoua emai hrülaihi ko avei nasü paodou peikhaio.

¹⁶Loucheloua dzükhao dalouyu mai talinou khailu loulai; louchelou momai taliye sü mah dukhaiwulai.

¹⁷Alia louche louyu maitao hisü shee haitaonou thaifüpoa talai: Azhih hinou puletao nou rashitaoye hupalai; puletao nou la ashu ashu paolai;

¹⁸puletao nou nghou kezhu khaia moa poudzü ashi tali poküloukhaia, sütaonou puletaoye halia soushi laimoe; puletao nou sounoumai pei hi bah lakhailai, alia puletao sü veiloulai.”

¹⁹[Südonou Mapao Jisu nou puletaoye koa chi phalouyu thaisü puhye sü rakihi pokhere ea Ramai bahkha zhoulonou buloure.

²⁰Alia rozümaitao nou taloua buh likinou ko paodou tare, alia Mapaowo nou puletaoye koa vahsoue ea puletao nou souyu sheetao nou puletao vei paodouyu hai cheche-e touyu hai lapeie.]