Read Poumei Naga MARK 2 Bible Online

MARK 2 - Poumei Naga bible

MARK 2

¹Alia puhnou teithe daotuthai Kapernahum hi khaiveyu kisü, puh hai kihi bure touyu kosü kubou loure.

²Südonou mai alaosou tave dzüloure, alia süvanou sühisü puletaoye donou buh hare ea kikhu nghojü koute hazheire; alia puhnou chipao nasü puletao hi paodoupeie,

³sübüa buyuhinou mai adainou pothaimai aliye kaopoa Jisu hi save-e.

⁴Sütoukhaia maipouleyu donou puletao sü puhye Jisu hi sakoulou hore. Südonou puletao nou Jisu nou buyu chübü kiphao hinou sousha loure, alia puletao nou kulu ali soucha louyu kisü, puletao nou pothaimai nanou züa buyu züh nasü deiphihi kezhukoupeie.

⁵Alia Jisu nou puletao vei dushoyu lü ngaolouyu kisü, puhnou pothaiyu mainahi paoe, “Anahna, ne mah sü khaipeiwure.”

⁶Chuo sühinou chobua buyu razhai dou-apeimai kamainou lah puletao lekhe hinou haibüa choloure,

⁷“Mai hainanou daidonou haibüa paoe? Haisü Ramaiye paoshiwe! Mah khaipeilou süyu hai Ramai likhei baie!”

⁸Thalasou Jisu nou puletao nou cho-a buyu sü süloua puletao hi paoe, “Neletao daidonou haibüyu tsühai chowe?

⁹Pothaiyu mainahi, ‘Nemah khaipeire,’ tea paoyu nanou talaho, ‘Lashuloua ne züh nasü poloua takhaio’ tea paoyu nanou talae?

¹⁰Ana Mai Nahpoutu nou deiphao hi mah khaipeire soulousü zü bue touyu hai Enou neletao hi ngaopeilai.” Südonou puhnou pothaiyu mainahi paoe,

¹¹“Enou nehi paoe, kushulouwo ea ne züh poloua kihi tawo!”

¹²Maikhe mainou zhua buyu hinou mai sünanou lashu puh züh sü poloua puletao nghojünou thalasou tare. Puletao hrülaisü khupasho loure ea Ramaiye sholoua paoe, “Ehnou haibüyu hai hakia ngaokhai mohie!”

¹³Süthaisü Jisu sü Galilee zaipe hi tapu khaire; alia maisounou puh hi tavedzüa buloure, alia puhnou puletaoye doupei tare.

¹⁴Alia puhnou ta-a buyu hinou, puhnou Alphia nahpoutu Levi kikha khawoye kikha vahbuh ki hinou buyu sü ngaoloua puh hi paoe, “Athai fülo.” Alia puhnou shuloua puhthai fütare.

¹⁵Chuo haibüa pare, süolouzü Jisu nou Levi kihinou toua bubu kinou kikha khamai alao ea kukhe mahmaitao-a Jisu ea puh rozümaitaoye koa bue; daiolouzü mai taolinou puh thaisü füloure.

¹⁶Alia Pharisee maitao hrohinou razhai dou-apei mai kamainou Jisu nou mahmaitao ea kikha khamaitaoye koa hatouyu ngaoloukhaie puh rozümai taohi paoe, “Daidonou puhnou kikha khamaitao ea mahmaitaoye koa tou-showe?”

¹⁷Alia Jisu nou süsü choulouyu kisü puletao hi paoe, “Pfüphao veimai donou pou-apeimaiye koyu hae, ana lishimai donou likhei kobaie, Enou acheche maiye kure donou vemoe, ana mahmaiye donou baie.”

¹⁸Teitheli hisü Johan Baptist thaifümai ea Phariseemai taosü lüh-a bue. Mai kamainou Jisu hi taveloua puh hi noue, “Daidonou Johan Baptist rozümaitao ea Phariseemai rozümaitao nou lühkhaia ne rozümaitaowo lühmoe?”

¹⁹Alia Jisu nou puletao hi chila peie, “Sheerepunou sheenghiyu nüh buh hi shemaitaoye koa bubukisü, puletaoye panou lüh-a bulaiwu? Moe. Sheerepunou puletaoye koa busasü puletao nou süsü soulou hoe.

²⁰Ana sheerepuye puletao hinou potawu laiyu teithe sü velai, alia sükinou puletao sü lühlai.

²¹“Maitalia sah ashu penou poshu sahnü kuhi khopawumoe, daiolouzü khopayu sahpe ashu nanou sahnü kunaye sü daopha laiwu-a lejünou chahdupu bailai.

²²Moa maitalinou darkha zhaoh ashuhai souhee zhaohlah kutaohi lathouwumoe, daiolouzü darkha zhaoh nou souhee zhaohlahye sü pfükhowu bailai, alia zhaoh ea souhee zhaohlahtao ahaikhei nou soushiwu bailai. Ana darkha zhaoh ashu sü souhee zhaohlah ashu hi lathoulai.”

²³Soteithe zhouli Jisu sü southou luhinou ta-a bue. Puh rozümaitao nou puhye koa ta-a buyu hinou, puletao nou southouko haitare.

²⁴Südonou Pharisee maitao nou Jisu hi paoe, “Zhukhaio, daidonou ne rozümai taonou Soteithe zhou sounouyu hai souwe?”

²⁵Jisu nou chila peie, “David ea puhye koa laimai taonou moshilaiyu ea houyu phaki puhnou daisoue touyu vanou neletao phoukhai mohiwu?

²⁶Südonou puhnou Ramaiki hi taloulou-a Ramai hi posheelayu raokhao nasü toue. Haihai Abiathar nou napao peichawo soubuki pae. Eh razhai thaifüa raokhao sünasü napaomaitao likhei toulou veibaie, ana David nou süsü toue ea puh maikhemai hi koutea peie.”

²⁷Alia puhnou puletao hi paoe, “Soteithe hai maiye donou soupeie, alia maiye sü Soteithe donou soupeimoe.

²⁸Südonou Mai Nahpoutuwo nou Soteithe pei hi koutea Mapaoe.”