Read Poumei Naga MARK 3 Bible Online

MARK 3 - Poumei Naga bible

MARK 3

¹Süthaia Jisu nou rathobuh hi khailou khaire, alia sühisü bah pothaimai ali bue.

²Sühisü Jisu pei hi mah dukhai nüyu kamaia bue; südonou puletao nou soutaosoua Jisu nou Soteithezhou mai sünaye souvei peilaiho mosa tea choh-a bue.

³Alia Jisu nou mai nahi paoe, “Nghojülo takoulo.”

⁴Sükisü puhnou maikhemai hi paoe, “Soteithe zhou avei souyu zhaiho ashi souyu zhaie? Maihrirai khaipei laiho southealai?” Ana puletao nou hachilia paomoe.

⁵Jisu nou lekhanoupu maikhemai hi zhuloua ea puletao le khouleyu vanou levealoua mai sünahi paoe, “Nebah topalo.” Alia puhnou puh bah sü topae, alia süsü veiloure.

⁶Südonou Pharisee maitaosü rathobuh hinou tapare, alia puhye kabüa souhaloulai touyu vanou thalasou Herod memaitaoye koa chikhaitare.

⁷Jisu nou puh rozümaitaoye koa Galilee zaihi tare, alia maisoudu nou puhthai fütare. Puletao sü Galilee, Judea,

⁸Jerusalem, Idumea teidei, Jordan teinghi palova teidei hinou alia Tair ea Sidon nuhdu pehao teideitao hinou ve-e. Mai hrülai haitaonou Jisu nou soupfüyu teitei sü choulouyu vanou puh hi tave-e.

⁹Maikhe mainou pouleyu vanou puhye kou khaokhao more donou Jisu nou puh rozümai taohi sakhaoli puhye donou souda peio tea paoe;

¹⁰daiolouzü puhnou mai alaoye souvei peie, alia sounoumai hrülainou puhye kou deiloure donou puh hilo khaova koure.

¹¹Alia rashinou louyu maitao nou Jisu ye ngaoloukhaie, puletao sü puh nghojünou kou duloua, “Nehai Ramai Nahpoutue,” tea shusoua shaloure.

¹²Alia Jisu nou rashitaohi puh hai thaoh-e touyu vanou maitalihia paokhaiso tea tukhatsü peire.

¹³Süthaisü Jisu nou deichi alivahi tapaloua puhnou züpayu maitaoye sü puh hi kuve loure. Puletao nou puh hi tave,

¹⁴alia puhnou sei-atamai tea zhih sapeiyu kiahai taoye panou puhye koa bure donou, vakouhi seiho ko paodoure donou

¹⁵alia rashitaoye hupare soulousü zü nasü buloure donou doloure.

¹⁶Puhnou dolouyu mai kiahai taosü haitaore: Simon, (Jisu nou puh zhih sü Pitar tea sada peire);

¹⁷Zebedee nahpoutu Jems ea puh thaihou Johan (Jisu nou puhai zhih hai Boanerges tea sapeie, süvei kowo louzü “Teisüyu nahai” toue);

¹⁸Andrew, Philip, Bartholomew, Mathiu, Thomas, Alphia nahpoutu Jems, Thadia, Kanaan pouna Simon,

¹⁹alia Jisu ye shoh soupeiyu Judas Iskariot.

²⁰Süthaisü Jisu hai kihi vetare; alia mai alaonou tave dzüpulou khaire, süvanou Jisu ea puh rozümai taosü tou-shoyu teile koute-a ngaolou hore.

²¹Puh kihikhamai nou ko süsü chouloukhaie, puhye niloure donou puletao sü tapare, daiolouzü maikhe mainou, “Puh hai votare!” tea paoe.

²²Jerusalem hinou veyu razhai dou-apeimai kamainou paoe, “Puh hi Beelzebul bue! Rashitao pei aduwo nou puh hi rashitaoye hulai palou sü khouko hai peibaie.”

²³Südonou Jisu nou puletaoye puh hi kukouloua puletao hi nadanou paoe: “Kabüa Saitan nou Saitan ye hupalou süe?

²⁴Vedei alihai meme souloua alinou aliye hrailouzü vedei süsü porarou bailai.

²⁵Alia kihikha alihai meme soua hraiva louzü, kihikha sünasü porarou bailai.

²⁶Südonou Saitan vedei hai meme soua dadewu louzü, süsü busholou hoe, ana porarouloua hazhei bailai.

²⁷“Maitalia khouyumai ali kihi loulouzü, puhye raia raiphuwu molouzü, puh vei natao sü pota louhoe, ana raia nou puhye phulouyu thainou puh vei natao sü shaolou süe.

²⁸“Cheche vuzü Enou neletao hi paowe, maikhemai mah ea puletao nou Ramaiye paoshiyu pfüphou sü khaipeilai.

²⁹Ana Rako Mashiye paoshiyu maiye sü hakia khaipei laimoe, daiolouzü puhnou hashalou hoyu mah soure.”

³⁰(Haisü Jisu nou maikhemai kamainou puh hi, “Puh hi sheemoyu rako bue,” tea paoyu vanou paoe.)

³¹Süthaisü Jisu pfü ea puh thaihoumai taosü tavere. Puletao nou kipanou la-a bua puh hi maiye seilou-a panou puhye kue.

³²Alia mai alaonou Jisu ye sühaoa chobua bue; alia puletao nou puh hi paoe, “Zhukhaio, nepfü, ne thaihou maitao ea ne tumaitao nou vakounou neye phoua bue.”

³³Jisu nou chila peie, “Apfü thaoh-e? Athaihou maitao thaoh-e?”

³⁴Alia puhnou puhye sühaoa chobua buyu maitaoye zhu sühaoloua paoe, “Zhukhaio! Haihi Apfü ea Athaihou maitao bue!

³⁵Ramai leli souyu maitali sü Athaihou, Atu ea Apfüe.”