Read Poumei Naga MARK 4 Bible Online

MARK 4 - Poumei Naga bible

MARK 4

¹Jisu nou Galilee zaipenou doupei puta khaire. Alia puhye sühaoa buyu maitaosü pouleyu vanou puhnou sakhao alihi talouloua sühinou lou buloure; alia sakhao nasü zai hinou bue, anou maisouwo louzü zaipe vakou deithe hinou bue.

²Alia puhnou nadanou puletao hi ko alaosou doupeie; alia puhnou doupeia haibüa puletao hi paoe:

³“Keilo! Teile lihi mailinou thoutai vure donou tapae.

⁴Alia puhnou thoutai vuyu kisü, thoutai kamaisü luduhi dekoure, alia raohou taonou zhaoveloua süsü kotou loure.

⁵Kamaisü dei veimoyu chuhrao hrohi dekou loure, alia thoutai taosü deifü shoumoyu vanou thalasou paopare.

⁶Süthaisü teinghinou pakhaie roube taoye sü deire; alia maa thoua chülou moyu vanou thalasou süsü thaitare.

⁷Thoutai kamai sü raishu hrohi deloure ea raishu sütaonou dupaloua roube sütaoye bouloure, alia sütaosü thoushi more.

⁸Ana thoutai kamaisü dei avei hi deloure, alia roube sütaosü paopaloua dushu loure ea thoushi loure; kamainou thou shirou, kamainou rairou ea kukhetao nou kaih shiloure.”

⁹Alia Jisu nou akhai soua paoe, “Keiloure nou pfüa buyu puhnou keilo!”

¹⁰Alia Jisu nou puh lah buyu phahinou, puhnou paoyu keia buyu mai kamainou rozümai kiahaiye koa puh hi ve-e ea puh hinou nada sütao vei kosü paoshee ngaopeio tea khoe.

¹¹Alia puhnou puletao hi paoe, “Neletao hiwo louzü Ramai Vedei vei kheitsü nasü peiwure, ana kukhemai hiwo louzü hateitei hai nada hinou paopei baie;

¹²sübüa, ‘Puletao nou zhukhai zhukhailai, sütoukhaia ngaolaimoe; Puletao nou keikhai keikhailai, sütoukhaia sülaimoe. Sükumo louzü puletao nou dakhai veloua Ramai nou puletao mah khaipeiwu shulai.’ ”

¹³Süthaisü Jisu nou puletao hi noue, “Neletao nada haina hai sümowu? Sükulouzü kabüa neletao nou nada kukhe talihai süloulai?

¹⁴Thoutai vuyu nanou Ramai chipao sü vuthouwe.

¹⁵Mai kamaisü ludu hi dekouyu thoutaitao büe; puletao nou thalasoua chipao nasü choulouyu kisü Saitan nou tave puletao hi vuthou khaitouyu chipao nasü potare.

¹⁶Kukhemai taosü chuhrao hi delouyu thoutaitao büe. Puletao nou chipao nasü choulou bükhaie sashoa poloure.

¹⁷Ana sünanou lekhehi maa chülou moyu vanou phajü bubaire. Südonou chipaona vanou souchoyu moa souveayu vekhaie puletao sü thalasou kaotare.

¹⁸Mai kukhetao nou raishu hrohi vuthouwuyu thoutaitao büe. Puletao sü chipao süna choulouyu maitaoe,

¹⁹ana deiphao hrü haina vanou doyu, kiniye leshiyu, alia kukhe ha taliye züpayu sütaonou ve phouloua chipao sünaye boutheare, alia sütaosü shithou shikhai more.

²⁰Ana mai kukhetaowo deivei buh hi vuthou khaitouyu thoutaitao kue. Puletao nou chipao nasü chouloua süsü poloure ea shithou shiloure: kamainou shirou, kamainou rairou, alia kamainou kaih shiloue.”

²¹Alia Jisu nou puletao hi paoe, “Maitalinou meibvü hai taoloua süsü sülai moa züh khehi pothou khaiwu? Puhnou süsü meibvü dzükhaiyu buh hi khailai mowu?

²²Kheia khaikhai touyu talisü dua popa ngaowulai, alia hokhai touyu talisü hapawulai.

²³Keiloure nou pfüa buyu puhnou keilo!”

²⁴Süthaia puhnou puletao hi paoe, “Neletao nou choulouyutao hisü leikeilo! Neletao nou kukhe maiye chikuyu süna zhai hinou Ramai nou neletaoye chikulai, ana choulouyu neletaoye louzü khoupua chikulai.

²⁵Daiolouzü buyu puh hinou puhvei daotu buyuna koutea potawu bailai.”

²⁶Alia Jisu nou thaomoa paoe, “Ramai Vedei sü haibüe. Mai alinou puh douhi thoutai vuthoue.

²⁷Alia puhnou kheihea zhia, kaia bue, alia pha sütao hinou thoutai taosü paopaloua dupaloure. Sütoukhaia puhnou süsü kabüa palousa touyu sümoe.

²⁸Deinou thoutai sütaoye panou paopaloua shithou shiloue; raikaia jü lapae, süthainou nghou ea akhai hinou rouko pae.

²⁹Ana rou nasü meiyu kisü, mai nanou kainou vatare, daiolouzü cha chiyu phasü veloure.”

³⁰Alia puhnou paoe, “Eletao nou Ramai Vedei hai daiye pao khalai, moa Eletao nou süna vanou paosheengao peire dai nada seilai?

³¹Süsü javu thoutai ali kheihaoe, süolouzü mailinou thoutai süsü deihi vuthouyu phakisü, süsü deiphao nou thoutai kukhe teitei jünou taikayu thoutai nasüe.

³²Ana phajü thaisü sünanou dupaloua deiphao nou dukayu vupoube souloure ea dushoyu bo lapaloua tei raohoutao nou ve sünavei khu hrohinou puletao phe souloure.”

³³Jisu nou haibüyu nadataonou seia puh chipao sü maikhe mai hi paodoupeie; alia maikhe mainou soutaosoua sülou süyu hinou puhnou puletaoye doupeie.

³⁴Puhnou nada seimoanou chilia paomoe, ana puhnou lah puh rozümaitaoye koa buyu hinou, puhnou sheetoua ha teitei hai doupeie.

³⁵Süzhou koukhe hisü Jisu nou puh rozümaitao hi paoe, “Eletao zaipe polo dovahi talaikhe.”

³⁶Südonou puletao nou maisouye thaowu-a tare; alia rozümaitao nou Jisu ye saloua puhnou raia lou buyu sakhao nahi sü louloure. Sühisü sakhao kukhe-a bue.

³⁷Alia sükhaimoa chihshoyu teikhai teirü vere, alia dzü-akhüh nou sakhaoye sü shore, südonou sakhaosü dzünou houngpaloua phoulou laire.

³⁸Jisu sü sakhao thailo nou peikhü khüpfüa zhia bue. Rozümai taonou puhye kaishuloua paoe, “Dou-apeio, Eletao thaiyu lai-a ne domowu?”

³⁹Jisu nou tashu laloua teikhai teirüye kharochi peie, “Ngasou buwo!” Alia puhnou dzü-akhüh hi paoe, “Kao nalo!” Alia teikhaisü khailoure ea sühisü kaonasei tare.

⁴⁰Süthaisü Jisu nou puh rozümai taohi paoe, “Daisoua neletao piwe? Neletao chu koutea lü hahiwu?”

⁴¹Ana puletao sü ngaopi sholoua linou lihi paoe, “Mai haina hai thaoh-e? Teikhai ea dzü-akhüh koutenoua puh chi züwe!”