Read Poumei Naga MARK 7 Bible Online

MARK 7 - Poumei Naga bible

MARK 7

¹Chuo Jerusalem hinou veyu Phariseemai ea razhai dou-apeimai kamainou Jisu hi tave dzüloure.

²Puletao nou Jisu rozümai kamainou naa thaifüa bah sheemoa ha touyu sü ngaoloure, süolouzü puletaohai Pharisee mainou maikhemai hi doupeiyu zhai thaifüa bah teilou more.

³(Daiolouzü Phariseemai ea Jihudimai hrülai nou puletao paipao mainou doupeiyu zhai thaifüa bah teitoulou molouzü ha toumoe;

⁴moa puletao nou hupobuh hinou poveyu hatalisü rai-a dzütheasheewu molouzü toumoe. Alia puletao nou reihyu zhai kukhe alaosou bue, sütaowo louzü pai, lee, hubakhao, alia züh khüsheeyu haitaoe.)

⁵Südonou Phariseemai ea razhai dou-apeimai taonou Jisu hi noue, “Daidonou ne rozümaitao nou paipaomai zhai nasü fümoa naa thaifüa bah sheemoa touwe?”

⁶Jisu nou puletao hi chila peie, “Daizhozhou kao-züa Isaiah nou aveikho souyu neletao vanou rachi paopa peiresa, süolouzü haibüa rüthou khaiwure: ‘Mai haitaonou Eye puletao tainou tsükhouwe; ana puletao lewo Ahinou doushoa bue.

⁷Puletao nou Eye hakonou thowe, daiolouzü puletao nou emai zhainou razhai soua doupeie!’

⁸“Neletao nou Ramai chikha thaowu-a emai zhainou potou loure.”

⁹Alia Jisu nou thaomoa puletao hi paoe, “Neletao hi lah neletao nou doupeiyu zhai nasü reih loure donou Ramai chikha polai loure kaishoyu do ali bue!

¹⁰Daiolouzü Moses nou chikha peie, ‘Nepfü nepuoye tsükhoulo,’ alia, ‘Pfü moa puo chi paoshiyu puhye sü southeawutheo.’

¹¹Ana neletao nou doupeie süolouzü maitalinou puhpfü moa puhpuoye soukhalouvei hatali bukhaia puhnou haibüa, ‘Haihai Korban baie’ (süvei kowo louzü, haisü Ramai veie), tea paowu louzü,

¹²puhye sü pfüpuoye soukhare hinou khaipeiwure.

¹³Haibüa neletao nou mai kukhehi doula koupeiyu sünanou Ramai chipaohai southou hako peire. Alia haibüa neletao nou souyu kukhe alaosou bue.”

¹⁴Süthaisü Jisu nou maisouye puh hi kuve puloukhaia puletao hi paoe, “Neletao hrülai keilo ea sülo.

¹⁵Vakounou louloua maiye lou souzhai peiyu halia hae; ana mailiye souzhai peiyu süwo louzü puh lekhe hinou payu na sütaonou baie.”

¹⁶(Südonou maitalinou keiloure nou pfülouzü, puhnou keiloukhaio!)

¹⁷Puhnou maisouye thaowu-a kikhahi talouyu kisü, puh rozümai taonou puh hinou nada sünasü paoshee ngaopeio tea khoe.

¹⁸Alia puhnou puletao hi paoe, “Neletao sümowu? Sükuyu thaisü neletaowo mai kukhetao jünou sükoukhai more. Vakounou lekhehi louyu hatalinou maiye souzhai peilou hoe,

¹⁹daiolouzü sünahai puh lekhehi loumoe ana puh pouhi louloua pfüphao hinou tei-dzülaiwu baiwe.” (Sübüa Jisu nou touso teitei hai sheekhaibaie tea paopeie.)

²⁰Alia puhnou thaomoa paoe, “Emai lekhe hinou payu sünanou puhye souzhai peiwe.

²¹Daiolouzü lekhe hinou süolouzü emai le hinou tsüshi, khulou souyu, vaoyu, maiye southeayu,

²²maipfü-maipuo sapayu, loküyu, maishi souyu, madayu, ke-zhe züpa souyu, ngaoraiyu, maichi paoshiyu, khaophu souyu, alia tsü chemoyu haitao pawe.

²³Ashi haitao pfüphou hai emai lekhe hinou paloua puhye souzhai baiwe.”

²⁴Süthaisü Jisu nou buh süsü thaowu-a Tair ea Sidon ngheiki buyu teideihi tare. Puh hai ki alihi taloure ea maitaliye panou puh sühi bue touyu hai sülou nümoe, sütoukhaia puh sü kheia bulou hore.

²⁵Daiolouzü rashinou louyu nah naotupai ali pfünou Jisu ko chouloure ea puh hi thashoa taveloua puh phinou kou duloure.

²⁶Naotu hainapai sü Surophoenikia teidei hinou nayu Greek tamaipfü alie. Puhnou Jisu hinou puh nah pai hi rashi louyu hai hulai papeio tea ve khoe.

²⁷Ana Jisu nou puh hi paoe, “Nahmaitaoye panou pouphoulou raio, daiolouzü nahmaitao vei raokhao hai poloua sei taohi polai peiyu kaomoe.”

²⁸Ana naotupainou puh hi chila peie, “Ovai Mapao; ana seitao koutea nahmaitao nou tourai kouyu hai arübuh phinou kotouwe!”

²⁹Jisu nou puh hi paoe, “Chi haina paoyu vanou ne kilo khaitawo; rashi nasünou ne nahpaiye thaowu-a tare.”

³⁰Alia naotupai nou puh kihi khaiveyu kisü, puh nahpaisü züh hinou züa buyu ngaoloue, alia chechenou rashi nasü nahpai hinou tapare.

³¹Süthaisü Jisu nou Tair teidei hinou khaitaloua Sidon tachopoa Galilee zaihi kouloua Dekapoli teideihi takoure.

³²Alia mai kamainou puh hi nou peyu ea la daoyu mailiye save; alia puletao nou puhye nou mai süna pei hi bah deipeire donou khoe.

³³Südonou Jisu nou khei-a mai sünaye maisou hronou vakouhi saku paloua, puh bahtounou mai süna nouhi thaithoupeie, alia taidzü süloua malisü deipeie.

³⁴Süthaisü Jisu nou rakiva zhuloua ea puh ssü liphouloua mai nahi paoe, “Ephphatha,” sünavei kowo louzü, “Houpalouwo!” touwe.

³⁵Sübühinou puh nousü houpare, puh malisü noutare ea puhsü veitoua chi paoloure.

³⁶Alia Jisu nou puletao hi maitalihi-a paokhaiso tea tukhapeie, ana puhnou puletao hi khouchia tukha peikhaie, puletao nou süvanou leloushoa paongaopu tare.

³⁷Alia puletao nou paosha louhosou khupaloua paoe, “Puhnou ha teiteisü souveisho peiwure; puhnou nou pemai kouteye panou chouloure ea la hamaiye panou chi paoloure!”