Read Poumei Naga MARK 9 Bible Online

MARK 9 - Poumei Naga bible

MARK 9

¹Alia puhnou puletao hi thaomoa paoe, “Chechenou Enou neletao hi paowe, Ramai Vedei hai khouko nou pu veyu ngaomo koute thailai moyu mai kamai buh haihinou la-a bue.”

²Teithe arou thaisü Jisu nou puhye koa Pitar, Jems, alia Johan ye saloua kushoyu deichi alihi sapare ea sühinou puletao lia bue. Alia Jisu hai puletao nghojünou zhu datare,

³alia puh sahnühai kaathou peivava loure- süolouzü kaayu nou deiphao maitalinoua sübüa shaokaa pailou hore.

⁴Alia sühisü Elijah hai Moses nou kouloua Jisu ye sa-a chi phayu sü rozümai asü taonou ngaoe.

⁵Alia Pitar nou Jisu hi paoe, “Dou-apeio, Eletao nou buh haihi buyu hai daizhozhou veisa! Eletao nou repao asü, neye donou ali, Moses donou ali, alia Elijah donou ali soupeilai.”

⁶Daiolouzü puletao asühai piyule donou puh hai daichi paolaisa touyu koutea sükhai more.

⁷Süthaisü teihao alinou puletaoye kou züloure, alia teihao hinou pailinou haibüa paoe, “Haihai Enou leshishoyu lah Anah Poutue; puhnou paoyu keilo!”

⁸Puletao nou thalasou zhusühaoe ana Jisu likhei deinou puletao nou kukhe maitalia ngaokhai more.

⁹Alia puletao nou deichi phihi takouyu kisü, Jisu nou puletao hi kharochi pei-a paoe, “Neletao nou ngaolouyu haina hai, Mai Nahpoutu nou athai hinou hrishu loumo koute maita lihi-a paongao khaiso.”

¹⁰Südonou puletao nou chi süsü lah puletao lekhe hinou kheia khaire, ana puletao hrohinou, “Athai hinou hrishuyu touyu hai dai chie?” tea noushu tare.

¹¹Alia puletao nou Jisu hi noue, “Daidonou razhai dou-apeimai taonou Elijah nou verai laihie tea paowe?”

¹²Jisu nou puletao hi chila peie, “Elijah hai chechenou ha teitei souda loure donou raia vewure. Sütoukhaia daidonou sheeyu larübvü hinou Mai Nahpoutu hai alaosou vea vuzülai ea puhye sü motouwulai tea paowe?

¹³Ana Enou neletao hi paoe, süolouzü Elijah hai vechere ea puh vanou rüthouwuyu sübüa maikhemai nou puletao züpa teitei puh hi soupeire.”

¹⁴Puletao nou rozümai kukhetao hi velou louyu kisü, rozümaitaoye maisounou sühaoa buyu ea razhai dou-apeimai kamainou puletaoye veiva-a buyu ngaoloure.

¹⁵Maikhe mainou Jisu ye ngaolouyu kisü, puletaosü khupasho loure ea puh hi tukouloua puhye sasa-a sühloure.

¹⁶Jisu nou puh rozümai taohi noue, “Neletao puletaoye koa daivanou veiva-a bue?”

¹⁷Maisou hronou mailinou puh hi chila peie, “Dou-apeio, Enou Anahpoutuye nehi savewe, daiolouzü puh hi rashi ali loulouyu vanou puh hai la phalou hore.

¹⁸Rashi sünanou puhye nisasü, puhye deiphihi dokhaokou baiwe, alia puh mü hinou tudzü laroro paloua puh huh sü veitsütsü baiwe, alia puh pfüphao teitei nou tsütyata baiwe. Enou ne rozümaitao hinou rashinaye hupapeio tea khoe, ana puletao nou hulai palou hore.”

¹⁹Jisu nou puletao hi paoe, “O lühayu maikha, teile kasho doua Enou neletaoye koa bulai? Pha kasho Enou neletaoye sa-a shamea zholai? Nahpoutu sünaye Ahi sakoupeio!”

²⁰Alia puletao nou puhye sü Jisu hi sakoupeie. Rashina nou Jisu ye ngaolou bükhaie, nahpoutu sünaye nitsütsü peire, südonou puh hai deiphihi kaokoure ea kou durürüloua puh mü hinou tudzü laroro paloure.

²¹Jisu nou nah süna puo hinou noue, “Puh hi haibüa payu hai pha kasho doukoure?” Puhnou chila peie, “Puh taibu kinou sükure.

²²Rashina nou phabusa nou puhye southea loure donou meihi ea dzühi khaothou peipei baiwe. Ana nenou soulousüe toulouzü Ehye leshipeio ea soukha peio!”

²³Jisu nou puh hi paoe, “Nenou soulou sülouzü touho? Loucheyu puhye donou ha teitei hai soulou veibaie.”

²⁴Sübühinou nah sünavei puonou shusou raoloua paoe, “E louchewe; Enou louchelou moyu hai koloure soukhapeio!”

²⁵Alia Jisu nou maikhe mainou puletao hi koa tuveyu sü ngaloua, rashi nahi kharochi peia paoe, “Nou peyu ea la hayu rashi, Enou neye nahpoutuna hinou tapalouwo tea ea puh hi hakia loupu khaiso tea kharochi peiwe!”

²⁶Sühinou rashi sünanou shusou raoloure ea nahpoutu sünaye nitsütsü peiwu-a puh hinou tapare. Alia nahpoutu sünasü thaimai pfüphaoli bütou baire. Südonou maikhemai hrülainou paoe, “Puhwo thaire!”

²⁷Ana Jisu nou nah süna bah hinou kou pailoua puhye sülashue ea puh hai lashu loure.

²⁸Alia Jisu nou kikhahi taloulouyu thaisü, puh rozümai taonou puh hinou kheikheisoua noue, “Daidonou Ehnou rashinaye hupalou howe?”

²⁹Puhnou puletao hi paoe, “Haibüyu tyahai veachi paoyu nou moa ha kukhe talinou-a hupalou hoe.”

³⁰Jisu ea puh rozümai taonou buh süsü thaowu-a Galilee hilonou tachopoa tare. Jisu nou puh hai daiki busa touyu hai panou maitaliye sünümoe,

³¹daiolouzü puhnou puh rozümaitaoye haibüa doupeia bue: “Mai Nahpoutuye maikhemai bah hi thoupeiwu-a puletao nou puhye southeawulai; alia puhye southeawu louzü, teithe asü thaisü puh hrishulai.”

³²Ana puhnou paoyu kosü puletao nou süloumoe, alia puletao nou puh hi-a noupie.

³³Alia puletaosü Kapernahum hi velou loure; alia puhnou kikhahi lou louyu thaisü puh rozümai taohi noue, “Neletao duhinou daichi veivawe?”

³⁴Ana puletao nou puh hi chilalia peimoe, daiolouzü ludu hinou puletaohai lah puletao hronou thaohnou dukasa touyu vanou veivae.

³⁵Jisu nou kou buloua ea puh rozümai kiahai taoye kuloua puletao hi paoe, “Maitalinoua rainü louzü, puhnou mai hrülai jünou nakailai ea mai hrülai vei kilai soulai.”

³⁶Süthaisü puhnou nahmai aliye saloua puhye panou puletao nghojü hi laloure; alia puhye daopoloua puhnou puletao hi paoe,

³⁷“Maitalinou haibüyu nahmai aliye Azhih hinou popei louzü, Eye popeiwe; alia Eye popeiyu maitalinou Eye popeimoe ana Eye seive peiyu puhye popeiwe.”

³⁸Johan nou puh hi paoe, “Dou-apeio, mailinou nezhih hinou rashi hulai payu Ehnou ngaoe, alia Ehnou puhye souso tea nue, daiolouzü puh hai Eletao thaifüa tamoe.”

³⁹Ana Jisu nou puletao hi paoe, “Puhye nuso, daiolouzü Azhih hinou khupa vah soua buyu maitalinou thalasou Achi paoshi khailaimoe.

⁴⁰Daiolouzü Eletaoye bamoyu puhsü Eletao donoubaie.

⁴¹Enou neletao hi chechenou paowe, süolouzü neletao nou Khrista zhih pfüa tayu vanou maitalinou neletao hi dzüpaili peilouzü puhvei buu hai veimosoua ngaolai.

⁴²“Maitali nou Eye louche-a buyu taikayu haitao hrohinou aliye mah hi süthou peilouzü, mai sünaye donou puh nguhi dushoyu thoupa chuh ali phumuteiloua puhye zaihi polai thouwuyu sünanou veikouhie.

⁴³Südonou nebah nou neye mah hi süthou peilouzü, süsü daodewuwo!” Neye donou bah ahai bua teisanou ngheikhailai moyu meizai hi louyu jüwo, bah polova toua ahri buh hi louyuna nou veikouhie.

⁴⁴(Sühisü, puletaoye toua buyu shikhao sü hakia thaikhaiwu moe, alia puletaoye deia buyu meisü hakia ngheikhaiwu moe.)

⁴⁵Alia nephinou neye mah hi süthou peilouzü, süsü daodewuwo! Neye donou phi ahai bua meizaihi polai thouwuyu jüwo phi ali toua ahri buh hi louyuna nou veikouhie.

⁴⁶(Sühisü, puletaoye toua buyu shikhao sü hakia thaikhaiwu moe, alia puletaoye deia buyu meisü hakia ngheikhaiwu moe.)

⁴⁷Alia ne nghithounou neye mah hi süthou peilouzü, süsü reilapawo! Neye donou nghithou ahai pfüa meizaihi polai thouwuyu jüwo nghithou ali pfüa Ramai Vedeihi louyuna nou veikouhie.

⁴⁸Sühisü puletaoye toua buyu shikhao sü hakia thaikhaiwu moe, alia puletaoye deia buyu meisü hakia ngheikhaiwu moe.

⁴⁹“Posheelayu naye tainou sousheeyu büa mai hrülaiye meinou sousheelai.

⁵⁰“Taihai veishoe; ana tainou puhvei khüyu hai hawu louzü, kabüa neletao nou sünaye soukhü pulou khailai? “Lah neletao hrohi tai bulo, alia alinou liye koa kaona-a bulo.”