Read Poumei Naga LUK 1 Bible Online

LUK 1 - Poumei Naga bible

LUK 1

¹Raikai kinou nghithounou ngao-a zhopaoh souyutao ea chipao sünavei kuvah souyu taonou Eletao hi thoupeiyu büa,

²mai taolinou Eletao hrohinou pacheyu vah sütaovei vanou ko shoshonou rüre te-a buyu donou,

³Oh dushoyu Theophilas, E-a shurai hinou veishi sheesha-a sü-a buyu donou, nehi paodou peiyuna teitei sütaovei chechena vanou panou neye süloure donou,

⁴kobvüli shoshonou neye donou rüyuhai veivu zülai tea Enou chowe.

⁵Herod nou Judea hi veo soua bubukisü, sühisü Abija vei napao mehi buyu Zekharia tea kuyu napaomai ali bue. Puh chapfüsü Aaron khü hinou ve, alia puh zhihsü Elizabeth toue.

⁶Puhai maihainou Mapao vei razhai ea chikhatao sü soutaosou züa, Ramai nghojünou chaa lia ha-a cheche hinou hrüwe.

⁷Ana puhaisü nahmai hae, daiolouzü Elizabeth hai nahah-e alia puhai ahai nou khailoure.

⁸Nai teithe lisü puh mevei kuvah soure kho teile veyu thaifüa, puhnou Rathoki hinou naa soua buyu hinou,

⁹napaomai zhai thaifüa Mapao vei Rathokihi talou kai nüvei mei taore donou rako zhua puhye doloure.

¹⁰Alia maikhemai hrülai sü kaivei mei tao-a buyu phakisü vakou hinou veachi pao-a bue.

¹¹Sükisü, Mapao vei rakivamai alinou sühisü taveloua kai nüvei mei tao-a buyu sheelabuh bahkha zhoulo hinou ve la-a buloure.

¹²Alia Zekharia nou puhye ngaolouyu kisü khupasho loure, ea ngaopinou phouloure.

¹³Ana rakivamai sünanou puh hi paoe, “Pikhaiso, Zekharia, daiolouzü nevei veachi sü noupeire, alia ne chapfü Elizabeth nou nahpoutumai ali hrülai, alia nenou puh zhih sü Johan tea salai.

¹⁴Alia puhye nayu kisü neye donou daizhozhou sa-valaisa, alia kukhemai taoli donou daizhozhou salaisa;

¹⁵daiolouzü puhsü Mapaowo nghojü hinou dulai. Puh sü darkha zhaoh-a moa kukhe zhaoh talia külaimoe, alia puhsü nakourai hinou Rako Mashinou phoulai.

¹⁶Alia puhnou Israelmai taoliye puletao Ramai, Mapaowo hi sakhai velai.

¹⁷Alia puokhemaitao lesü nahmaitao hi ea paoyu zübayu maitaoye cheche maitao vei ratsü nahi panou khaive loure Mapaoye donou souda louyu maitaoye tuda loure donou puhnou Elijah vei rako ea khouko hinou Mapaowo nghojü hinou raia talai.”

¹⁸Zekharia nou rakivamai nahi paoe, “Süsü Enou kabüa süloulai, daiolouzü Esü khaimai alie ea Achapfü-a chipai loure?”

¹⁹Rakivamai sünanou puh hi chila peie, “Esü Ramai nghojü hinou la-a buyu Gabriel süe, alia nehi paopeire ea ko avei haina pove peire donou Eye seive peibaie.

²⁰Alia zhukhaio, shee haitao pamo sasü ne hai la ha-a chi paolou holai, daiolouzü teile kaovei hinou vete laiyu Avei chipao taosü nenou louche peimoe.”

²¹Süphakisü maikhemai taosü Zekhariaye khoa bue ea puhnou Rathoki hinou phashoh chao-a buyu donou puletao sü khupaloure.

²²Alia puhnou vakouhi tapayu kisü puhsü puletao hi chi paolou hore, alia sübüyu donou puh hai Rathoki hinou zho ali ngaoloure touyusü puletao nou süloure; alia puhnou puletao hi puh bahnou zhangao-a la phamoa bue.

²³Alia puhnou rathokihi vah soure teile cheyu thaisü, puhsü puh kihi khaivere.

²⁴Teile phajü thaisü puh chapfü Elizabeth sü poupfü loure, alia khouh angou phasü puh lah tutsü-a haibüa paoe.

²⁵“Enou maikhemai nghojü hinou ahrao ngao-a buyu nasü pota peiloure donou Mapaowo nou Eye tave zhupeiyu ki haibüa soupeiwure.”

²⁶Elizabeth nou poupfüyu khouh arou payu kisü Ramai nou rakivamai Gabriel ye Nazareth tea kuyu Galilee hi nuhdu nahi seive.

²⁷Puhnou veyuhai David khü hinou veyu Josef tea kuyu mai süna kihi tokhai touyu loumaina süpaihi ko povere donou ve. Loumainapai zhihsü Meri toue.

²⁸Alia puhnou puh hi taveloua paoe, “Nehi kaonayu buloukhaio, O Ramai nou khu-leshi shoyupai! Mapao nou neye kozhoa bue.”

²⁹Ana Meri sü puhvei chipaotao vanou tsübo phouha zheire, alia puhvei chiko nasü daitousa tea khupasho loure.

³⁰Rakivamai sünanou puh hi paoe, “Pikhaiso, Meri, daiolouzü neye Ramai nou khuleshi peire.

³¹Alia zhukhaio, ne sü poupfüloua nahpoutu ali hrülai, alia nenou puh zhihsü Jisu tea salai.

³²Puhsü dusholai, alia puhye nou Aku Kulai Ramai Nahpoutu tea kulai. Alia Ramai, Mapaowo nou puh hi puhpuo David vei Vebuh sü peilai,

³³alia puhnou teisanou Jakob tyaonah khemai pei hisü veo soua hrülai, alia puhvei vebuh sü hakia akhai bulaimoe!”

³⁴Meri nou rakivamai sünahi noue, “Kabüa haisü souloulai, daiolouzü Esü loumaina alibaie?”

³⁵Rakivamai sünanou puh hi chila peie, “Rako Mashi nou nehi kou loulai, alia Aku Kulaivei khouko sünanou neye züloulai. Südonou nakoure sheeyu nah sünaye sü Ramai Nahpoutu tea kulai.

³⁶Alia zhukhaio, ne tamai Elizabeth-a khai louyu thainou nahpoutumai ali pou pfüloure; alia puh hai nah hae toukhaia chuo puhnou poupfüyu khou arouhi koure.

³⁷Daiolouzü Ramaiye donou soulou hoyu alia hae.”

³⁸Alia Meri nou paoe, “Zhukhaio, Esü Mapao vei kilai naotupai baie; nevei chipao thaifüa sünasü Ahi panou paloukhaio.” Süthaisü rakivamai sünasü puh hinou tare.

³⁹Alia teile sükisü Meri nou tashuloua deichi hinou buyu Judea vei nuhdu alihi thala-a tare,

⁴⁰alia puhnou Zekharia kihi tavelouloua Elizabeth ye talou sasa-a khurü loure.

⁴¹Alia Elizabeth nou Meri vei khurüyu chidoh nasü choulouyu kisü, puh pou hinou buyu nah nasü hotuotuo loure; alia Elizabeth sü Rako Mashinou lou phouloure

⁴²ea puhnou pai kushoa shapae, “Naotumaitao hrohinou ne sü rako aveipai nasüe, alia nenou pfüa buyu nah nasü rako veie!

⁴³Ana daidonou A Mapao pfünou Ahi taveloua Eye süzhozhou khu-leshi peisa?

⁴⁴Daiolouzü zhukhaio, nevei khurüyu chidoh sü Enou choulou büyu kisü, Apou hinou buyu nah nasü sahsoua hotuotuowe.

⁴⁵Alia Mapao nou puh hi paopeiyu nasü vetelai tea louche louyu puh sü rakoveie!”

⁴⁶Alia Meri nou paoe, “Alenou Mapaoye showe;

⁴⁷ea Arakonou Ramai, Eye Khailu-apeio hisü asawe,

⁴⁸daiolouzü puhnou puhvei lelou hoyu kilaipai hisü khu-leshi peire! Zhukhaio, chu thainou maikha hrülainou Eyenou rako aveipai tea kulai;

⁴⁹daiolouzü khou-chihyu puhnou Eye donou dushoyu vah soupeire, puh zhih sü Amasheeo na toue.

⁵⁰Alia puhvei zhuveahai maikha-kha hinou puhye piyu maitaohi bue.

⁵¹Puhnou puhvei baosü topaloua khouko pongao peire; Puhnou puletao tsü lekhe hinou khaophu soua buyu maitaoye souraroure.

⁵²Puhnou khou-chihyu vemaitaoye puletao vei vebuh hinou pokoure, alia nataiyu taoyenou pokupa peiwure.

⁵³Puhnou hou-züa laiyu maitaoye ha aveinou panou pouphou soupeire, alia haniyu taoye puhnou bah sakhaia seitare.

⁵⁴Puhnou Abraham ea puhvei tao-nah khemaitaoye teisanou zhuvea peiyu sü panou licho loure donou,

⁵⁵Eletao puo-paomai taohi paopeiyu büa, puhnou puhvei kilai Israelye soukha peire!”

⁵⁶Meri nou Elizabethye khouh asüpha koa bulouyu thaisü puh kilohi khaitare.

⁵⁷Alia chuo Elizabethye donou nare teile veyu kisü, puhnou nahpoutumai ali naloure.

⁵⁸Südonou puhvei kinapa maitao ea tarai maitao nou Mapao nou puh hi dushoa zhuvea peire touyu sü chouloua puletao nou tave puhye koa sazho loure.

⁵⁹Alia teithe acha zhou sü puletao nou nah sünaye hee vadere donou tavere; alia puletao nou puh puo zhih thaifüa puhye nou Zekharia tea salai tea bure.

⁶⁰Ana puh pfünou paoe, “Sübülaimoe! Puh zhihsü Johan tea salai.”

⁶¹Puletao nou puh hi paoe, “Ne tarai hrohinou sübüa zhih sayu mailia hae.”

⁶²Süthaisü puletao nou puh puohi bahnou zhangao-a nah süna zhih sü thaohtea sayu züpae tea puh hinou noue.

⁶³Puhnou chuhkhaoli kholoua, “Puh zhih sü Johan toue,” tea rüloure. Alia puletao hrülaisü khupasho loure!

⁶⁴Sübü hinou puh müsü houpare ea puhvei malisü noutare, alia puhnou Ramaiye shoa chi paopare.

⁶⁵Südonou kinapa veishi hisü ngaopinou phouloure, alia sübüa palouyu kotao vanou Judea deichi hi buyu teideitao hisü kubou loure.

⁶⁶Alia ko haina choulouyu mai hrülaisü, “Nah süna hisü dai palaisa?” tea kua puletao lekhe hinou tsü choda khaire. Daiolouzü Mapao vei khoukosü puh pei hi bue.

⁶⁷Puhpuo Zekharia sü Rako Mashinou phoupei loure ea haibüa rachi shapare:

⁶⁸“Israel Ramai, Mapaoye sholo! Daiolouzü puhnou puhmai taoye tave zhupei-a puletaoye khaipa peire.

⁶⁹Puhnou puh kilai David khü hinou Eletaoye donou khou-chihyu Khailu-apeio ali seive peire.

⁷⁰Dao raikinou puhnou puhvei sheeyu rachi paolamaitao mü vanou paopeiyu büa,

⁷¹Süolouzü Eletaoye ngaobamai ea Eletaoye ngaorayu mai veishi bah hinou khailu peilai touyu;

⁷²Eletao pai-pao maitaohi zhuvea peiyu pongaore donou alia puhvei sheeyu vo nasü li-choloure donou,

⁷³Eletao puo-pao Abraham hi puhnou cha-chou soupeikhai touyu,

⁷⁴süolouzü Eletaoye Eletao vei ngaobamai bah hinou vupapei-a puh nghojü hinou halia piyu ha-a

⁷⁵sheeyu ea acheche hinou Eletao vei hrümaisa nou puhye kuvah soure donou, puh nou chi lüpeire.”

⁷⁶Alia, “Anahna neye toulouzü Aku Kulai Ramai vei rachi paolawona tea kulai; daiolouzü nenou Mapao vei ludusü soudare donou puh nghojünou raia talai.

⁷⁷Puhvei maitaohi puletao vei mah khaipeiyu hinou khailu louyu sü bue touyu nasü paodou peilai.

⁷⁸Eletao Ramai khu-leshi vanou, teizhi hinou buyu ea athai khu hinou buyu maitaoye vapei loure donou,

⁷⁹alia Eletao phisü kaonayu ludu hilo süthai-sata peire donou, khailu peiyu vei teinghi avasü raki hinou Eletao pei hisü koupeilai.”

⁸⁰Alia nah sünasü pfüphao hiloa dushu loure ea rako hilonoua khou-chihloure; alia puhnou Israel maitaohi tave dua ngaopeimo koutesü puhsü rekounou hrüa bue.