Read Poumei Naga LUK 10 Bible Online

LUK 10 - Poumei Naga bible

LUK 10

¹Süthaisü Mapao nou kukhe mai rainai ahaiye doloua puletaoye maihai hainou puh jünou raia puhnou tave laiyu nuhdu veishi hi ea buh likihi seitare.

²Alia puhnou puletao hi paoe, “Chachire louzü alao soua bue, ana vapeire maisü daotu baie; südonou cha Mapao hinou puhvei cha ludouhi cha chire maiye seive peire donou veachi paokhaio.

³Takhaio; zhukhaio, Enou neletaoye nüsei hrohi zhaotu büa seitawe.

⁴Shavü lia moa lekhabvü moa phikha lia pfütaso; alia lududo hinou maita mailiye khurüso.

⁵Neletao nou ki talihi talouyu kisü, raikaia, ‘Ki hainahi kaonayu buloutheo!’ tea paowo.

⁶Alia hakinou kaonayu maili sühi bulouzü, neletao vei kaonayu sü puh pei hi bulai, ana halouzü sünasü neletao hi khaikoulai.

⁷Alia puletao nou peiyu tasü tou-a shoa ki süna hinou nai-a bukhaio, daiolouzü vah souyumai alinou puhvei zho ngaozüe. Ki ali hinou alihi taso.

⁸Neletao nou nuhdu talihi takouyu kisü ea puletao nou neletaoye shepei louzü, neletao nghojühi khaipeiyu tasü toukhaio;

⁹sühi buyu sounou maitaoye souvei peio ea puletao hi paokhaio, ‘Ramai Vedeisü neletao ngheikihi veloure.’

¹⁰Ana neletao nou nuhdu tahi talouyu kisü ea puletao nou neletaoye shepei molouzü, sünavei ludutao hi tapaloua haibüa paokhaio,

¹¹‘Eletao phihi neletao nuhdu vei nai taipfüa laiyu sükoute-a neletao pei hi motouyu zhopaoh soure donou Ehnou sülai koure; sütoukhaia Ramai Vedeisü neletao ngheikihi veloure touyu sü sülouwo.’

¹²Enou neletao hi chekhaoa paoe, Chikulaiyu teithe kisü nuhdu süna jünou Sodom ye nou sha-mealou veilai hie.

¹³“Oh Khorazin, neye donou daizhozhou ngaopisa! Oh Bethsaida, neye donou-a daizhozhou ngaopisa! Nehaihi soukhai touyu khupa vah taore Tair ea Sidon hi soungaore toulouzü, sühi maikhemai taosü dao raikinou puletao vei le daloure touyu zhopaoh soure donou puletao pei hi vounai vukhaiwu-a lousah nou ba-a bubu laire!

¹⁴Ana chiku laiyu teithe sükisü nehai jünou Tur ea Sidon ye nou shamealou veilai hie.

¹⁵Alia Kapernahum newo, rakihi khete kukhe laiwu? Neye akhai hayu raobvü hi polai thouwulai.”

¹⁶Jisu nou puh rozümai taohi paoe, “Neletao chi keiyu puh sü Achi keiwe, alia neletaoye motouyu puhsü Eye motouwe.”

¹⁷Alia mai rainai ahaitao nou sasa-a khaiveloua paoe, “Mapao, rashitao koutenou-a nezhih hinou Eletao vei kharo khehi hrübaiwe!”

¹⁸Jisu nou puletao hi paoe, “Raki hinou tei-peiyu büa Saitan nou dekouyu Enou ngaoe.

¹⁹Zhukhaio, nghoutao ea hairakhaotao pei hi nou taipoa taloure, alia ngaobamai vei khouko teitei koloure khouko Enou neletao hi peire, alia hatalinoua neletaoye zhuwu laimoe.

²⁰Sütoukhaia rashi taonou neletao khakhehi hrüe touyu vanou sawuso; ana neletao zhih hai rakihi rüthoure touyu vanou salo.”

²¹Teile süphabü hinou Jisu nou Rako Mashi hinou le sasholoua paoe, “Apuo, raki ea deiphao Mapao! Enou neye kalo paowe, süolouzü nenou tsü veimai ea hasümai nghojünou pokukhai touyu sü nahtumai taohi pongao peire; ovai, Apuo, haibüyu hai nevei züpa nabaie.

²²“Apuonou Ahi na teitei thoupeiwure; alia Apuo baideinou maita mailinoua Nahpoutu hai thaohsa touyu sümoe, moa Nahpoutu ea Nahpoutu nou Puoye pongao nüa dolouyu mai sütao baimoa maitalinoua Puohai thaohsa touyu sümoe.”

²³Süthaisü puhnou rozümaitao hi reiveloua puletao hi kheia paoe, “Neletao nou ngaoyutao ngaoyu nghithoutao sü rakoveie!

²⁴Daiolouzü Enou neletao hi paowe, süolouzü rachi paolamai taoli ea vemai taolinou neletao nou ngaoyu sü ngaonüshoe, ana süsü ngaolou more, alia neletao nou chouyu sü chounüshoe, ana süsü choulou more.”

²⁵Alia zhukhaio, razhai dou-apeimai alinou Jisu mah phoupare donou lashuloua puh hi noue, “Dou-apeio, teisa ahri ngaoloure donou Enou dai soulai?”

²⁶Jisu nou puh hi chila peie, “Razhai hi dai rüthou khaitoue? Nenou kabüa sütaosü phouwe?”

²⁷Alia mai sünanou chila peie, “Nenou Mapao nevei Ramaiye ne le teiteinou, ne rako teiteinou, ne khouko teiteinou ea netsü teiteinou leshilai; alia nevei kinapaye nelah neye büa leshilai.”

²⁸Jisu nou puh hi paoe, “Nenou kaobüa kheloure; haisü soukhaio, alia ne hriloulai.”

²⁹Ana puhnou puhlah souzülou nüa Jisu hi noue, “Akinapa sü thaoh-e?”

³⁰Jisu nou chila peie, “Teile alihi mai ali sü Jerusalem hinou Jeriko hi takouyu kisü puhsü maivei saotoumaitao hrohi louloua puletao nou puhye sü dapeiwure ea puhye sü thainonoyu hinou thaowu-a tare.

³¹Chuo napaomai alisü süphabü hinou ludu sünahi takoue; alia puhnou mai sünaye ngaolouyu kisü puhsü ludu polo dova hilonou tareipoa tare.

³²Sübüa Levimai ali-a buh sühi taveyu kisü puhye ngaoloua ludu polo dova hilonou tareipoa tare.

³³Ana Samaria tamai alinou veihdu hinou ta-a buyu hinou mai sünanou buyu buh sünahi tave loure;

³⁴alia puh hi takouloua puhvei zheemütao hisü theadzünou ea darkha zhaohnou lanapeiwu-a phutou peire; süthaisü puhnou puhye sü lah puhvei rheisüh phaova hi panou buloua puhye sü shechaoki alihi save khaipeiwure ea sühinou puhyesü zhutou peire.

³⁵Alia thainaisho kisü puhnou denarü ahai popaloua süsü shechaoki khoyu nahi peiwu-a paoe, ‘Puhye soutaosoua kitou peikhaio; alia nenou koua thou-sha soudowuyu taosü Enou khaiveyu kinou neye khapeilai!’”

³⁶Alia Jisu nou akhaisoua noue, “Puletao asü hrohinou kananou maivei saotoumai bah hi louyu mai sünavei kinapae tea nenou chowe?”

³⁷Razhai dou-apeio sünanou paoe, “Puh hi zhuvea peiyu mai sünasüe.” Sühinou Jisu nou puh hi paoe, “Takhaio ea ne-a sübüa soukhaio.”

³⁸Chuo Jisu ea puh rozümai taonou puletao vei veih duhi ta-a buyu hinou, puhsü nuh alihi taloure; alia sühinou Martha tea kuyu naotumai alinou puhye sü sheloure.

³⁹Alia Meri tea kuyu puhvei matoupai ali bue. Puhsü Mapao vei phi hinou bua puhnou doupeiyu sü kei-a bue.

⁴⁰Ana Marthawo louzü kuvah souretao hinou vah rushoa bue; südonou puhnou Jisu hi takouloua paoe, “Mapao, Eye panou lah kuvah teitei soure donou Athaihou painou Ahi thaothoukhou peiyu hai newo halia chomowu? Südonou puhye panou Eye soukha peire donou puh hi paopeio!”

⁴¹Ana Mapao nou puh hi chila peie, “Martha, Martha! Newo vah alao donou lekishoa ea levea-a bue;

⁴²ana alikhei soure matsübaie. Meri nou puh hinou potalou hoyu zha avei nasü doloure.”