Read Poumei Naga LUK 13 Bible Online

LUK 13 - Poumei Naga bible

LUK 13

¹Teile süpha hinou mai kamainou Jisu hi taveloua kabüa Galilee hi mai kamaivei zhesü Pilatnou puletao vei posheelayu na sütaoye koa pohrüresa touyu vanou paongaoe.

²Alia puhnou puletao hi chila peie, “Galilee hi mai sütaoye sübüa southeayu donou puletaosü kukhe Galilee himai hrülai jünou shikayu mahmaitaoye tea neletao nou chowu?

³Enou neletao hi paowe, Moe; ana neletao-a le dalou molouzü neletao hrülai-a sübüa habailai.

⁴Moa Siloam hi ki-aku nanou pokou deitheayu mai kiacha taonou kukhe Jerusalem hi hrüa buyu maikhemai hrülai jünou mah soukou shoyu mai hie tea neletao nou chowu?

⁵Enou neletao hi paowe, Moe; ana neletao-a le dalou molouzü neletao hrülai-a sübüa habailai.”

⁶Süthaisü Jisu nou puletao hi nada hainasü paopeie: “Mai alivei darkha kipei hi doushibe ali bue; alia puhnou taveloua be sühinou doushi phoue, ana halia phouhae.

⁷Alia puhnou puhvei kipeikhowo hi paoe, ‘Zhukhaio, po asü haitao hisü Enou taveloua doushibe haina hinou doushi phoue, alia Enou halia ngaolou moe. Hainasü vilaiwuwo! Daidonou hainaye panou dei aveisü raoha-a souhalai?’

⁸Ana kipeikhowo nou puh hi chila peie, ‘Dou-apeio, khai potei-a panou hainasü haibüa khaibaio; Enou sünaphi hinou deibvü raoloua mato thoulai.

⁹Alia sünanou daokou pohi shi shilouzü, veishore; ana shi shimo louzü, nenou süsü vilaiwuwo!’”

¹⁰Alia Soteitheki ali hisü Jisu nou rathobuh ali hinou doupei-a bue.

¹¹Alia sühisü po kiacha lelou hoyu rakonou loua buyu naotumai ali bue; puhsü chü taoyu donou puhlah hakia lashulou hore.

¹²Alia Jisu nou puhye ngaolouyu kisü, puhye laloua puh hi paoe, “Naotupai, neye nevei sou hinou do soupeire.”

¹³Alia Jisu nou puh bahsü puh pei hi pokhaipeie, alia süphabü hinou puhsü lashuloua Ramaiye sholoure.

¹⁴Ana rathobuh hi peichananou Jisu nou Soteithe hinou souvei peiyu vanou rarouloua maikhemai hi paoe, “Vah soure donou teithe arou bue; südonou teithe sütao hinou taveloua souveilou khaio, ana Soteithe kihio veso!”

¹⁵Ana Mapao nou puh hi chila peie, “Oh aveikho souyutaore! Neletao maita mailinou Soteithe kihi puhvei cho moa rheisühye chopao hinou rai khikhai touyu sü pheipapeiwu-a sünaye panou dzü küloure donou vakouhi süpapei mowu?

¹⁶Sübülouzü Saitan nou po kiacha phukhai toua buyu Abraham nah naotupai hainawo puhye phukhai touyu süna hinou Soteitheki phapei zümowu?”

¹⁷Puhnou sübüa paoyu hinou puhye ngaobamai hrülaiye sü sou-ahraopei khaire; alia maikhemai hrülaisü puhnou soulouyu khupa vah sütao teitei vanou asasho loure.

¹⁸Südonou Jisu nou paoe, “Ramai Vedeihai daiye kheihaoe? Alia Enou sünaye sü daiye pao nadalai?

¹⁹Sünasü mai alinou javu thoutaili poloua puh kipei hi vuthouyu kheihaoe; alia sünanou paopaloua süübe ali daloure, alia teihi raohoutao nou sünavei botao hinou phe mealoure.”

²⁰Alia puhnou paopu khaire, “Enou Ramai Vedei sü daiye pao nadalai?

²¹Haisü naotumai alinou sou alaosou sülai alihi thouloua süteitei lapamosa koute pothou hükhai touyu kheih kue.”

²²Süthaisü Jisu nou Jerusalem hi tare veiduh hinou nuhdutao ea nuhbuh taohi tave louloua doupeie.

²³Alia mai kamainou puh hi noue, “Mapao, mai daotu likheithe khailulou bailaiwu?” Jisu nou puletao hi chila peie,

²⁴“Kikhu ataina hilonou talou loure donou telo; daiolouzü Enou neletao hi paoe, maikhemai alaosou sühi talou loure donou phoulai ana loulou holai.

²⁵Ki paopu nanou shuloua kikhu khuyu kisü, neletao nou vakou hinou la-a ea kikhusü khoua haibüa paolai, ‘Dou-apeio, Eletao hi kikhu houpeikhaio!’ Puhnou neletao hi, ‘Neletao daikinou vesa, Ewo sümoe’ tea chila peilai.

²⁶Sükisü neletao nou, ‘Eletao nou neye koa ne nghojü hinou tou-shoe, alia nenou Eletao vei ludutao hinou doupeie!’ tea chila peilai.

²⁷Ana puhnou paopu khailai, ‘Enou neletao hi paowe, neletao daikinou vesa, Ewo sümoe; vah ashi souyu maitaore, neletao Ahinou tawo!’

²⁸Neletao nou Abraham Isak, Jakob ea rachi paolamaitao hrülaiye Ramai Vedei hinou buyu, ana neletaoye vakouhi polai payu ngaolouyu kisü sühinou neletaosü kra-a neletao huhsü veikükülai.

²⁹Alia maikhe maitao nou teinghi palo, teinghi loulo, reikou ea khekou nou taveloua Ramai Vedei vei nühbuh hi ve bulai.

³⁰Alia zhukhaio, railai yumai kamai chu nah-a bue, alia nahlai yumai kamai chu rai-a bue.”

³¹Teile süphabü hinou Phariseemai kamainou Jisu hi taveloua puh hi paoe, “Buh haihinou shuloua kukhe buh alihi taloubaio, daiolouzü Herodnou neye southea-a nüwe.”

³²Alia Jisu nou puletao hi chila peie, “Taho lakhao sünahi paongaokhaio, ‘Zhukhaio, Enou zhoua, doso-a rashitaoye hulai pawe ea sounou souvei peiwe, alia teithe asü kisü Enou Avah sü souchewulai!’

³³Sütoukhaia zhoua, doso-a daonai-a Enou Avei ludu hisü tavu zülai; daiolouzü rachi paolamai alihai Jerusalem hinou moa vakou hinou thai khailaimoe.

³⁴“Rachi paolamai taoye southeayu ea nehi seiveyu taoye chuhnou deitheayu, Oh Jerusalem, Jerusalem! Houkünou toutu taoye puhvei shou khenou bvüpeiyu kua Enou ne nahmai taoye pha kasho koute tobai soumoa bvüpei nüsa, ana nenou bakhaoe!

³⁵Zhukhaio, nevei Rathoki sü thaowulai. Alia Enou nehi paowe, ‘Mapaowo zhih hinou tave louyu puhsü rako veie!’ tea nenou paomo koutesü nenou Eye ngaokhai laimoe.”