Read Poumei Naga LUK 14 Bible Online

LUK 14 - Poumei Naga bible

LUK 14

¹Alia Soteithe ali hisü Jisu nou Phariseemai peichamai ali ki hinou tovai touzhore donou taveyu kisü maikhe mainou Jisu ye sü zhutei loure.

²Alia zhukhaio, puh nghojü hisü phi-bah maayumai ali bue.

³Alia Jisu nou razhai dou-apeimai ea Phariseemai taohi noue, “Soteithe kihi sounou maiye souvei peiyu razhai buho, hae?”

⁴Ana puletaosü paikhai khaimore. Süthaisü puhnou mai sünaye kou deiloua souvei peire, alia puhye panou tare.

⁵Alia sükisü puhnou puletao hi paoe, “Neletao hrohinou mailivei nahpoutu maili bua moa cho ali bua sünasü Soteitheki dzübvühi delou louzü, puhye sü Soteitheyu donou thala-a popa peilai moyu thaoh bue?”

⁶Alia sünasü puletao nou chila peilou hore.

⁷Chuo vaibuh hi kuvekhai touyu shemaitao hrohinou kamainou tsükhouyu buh hi bure doyusü Jisu nou ngaoloua puletao hi nada ali paopeie:

⁸“Maitalinou neletaoye sheenghiyu nühbuh hi kuveyu kisü tsükhouyu buh hi buso, molouzü puhnou ne jünou matsü kouyu kukhe mailiye kukhai-a thaohnou sülai;

⁹alia nehai maihaiye kuveyu nevei shepao nanou taveloua nehinou, ‘Buh hainasü panou mai hainaye buwo’ tea paoyu kisü ne sü akhai khailaina buh hi kou bure ahraolai.

¹⁰Ana neye vaibuh hi kuveyu kisü taloua akhai khailaina buh hinou bukhaio, sükulouzü nevei shepao nanou taveyu kisü puhnou nehi, ‘Asa, buh aku nahi pabu loukhaio’ tea paolai; sükisü neye kukhe shemaitao, hrülai nghojünou tsükhou peilai.

¹¹Daiolouzü lah puhye soukuyu mai taliye sü sounalai, alia lahnou natai-a buyu puhye sü souku peilai.”

¹²Süthaisü Jisu nou puhvei shepao nahi paoe, “Nenou koukhe vaili moa tovai aduli peiyu kisü nevei sa-pa moa thaihou-jüraitao moa ne ta-raitao moa haniyu kinapa taoye kuso, molouzü puletao nou-a neye kudaloua nevei paosü khawulai.

¹³Ana nenou tovai aduli peiyu kisü, toure hamai, sho-vaimai, phi chamai ea nghi chamai taoye kukhaio;

¹⁴sübü louzü neyesü hapeilai, daiolouzü puletao nou neyesü pao khapei louhoe, Ramai nou neyesü cheche maitao hrishuyu kinou pao khapeilai.”

¹⁵Alia Jisu ye koa arübuh hinou buyu maikhe maitao hrohinou alinou haisü chouloua puh hi paoe, “Ramai Vedei vei nühbuh hinou tou-sholaiyu maisü daizhozhou rako veie!”

¹⁶Ana Jisu nou puh hi paoe, “Teile alihi mai alinou dushoyu tovai ali peia maikhemai taoye alaosou kue;

¹⁷alia tovai sünavei teile veyu kisü puhnou puhvei kilaiye, ‘Taveo; daiolouzü chuo ha teitei soudakhai toure,’ tea panou puhvei shemai taohi paore donou seitare.

¹⁸Ana puletao veishinou kheihao-a velou more chi veishoa paokhai loure. Araikha nanou kilai sünahi haibüa paoe, ‘E douli hrükhaitoue, alia Enou taho sünasü zhumo louzü shilaire; leshia Eye khaipei baio.’

¹⁹Alia kukhe alinou paoe, ‘E chode paa angou hrükhaitoue, alia Enou taho sütaoye veiyu shiyu zhulaihie; leshia Eye khaipei baio.’

²⁰Süthaisü kukhe alinanou paoe, ‘E zhovubü hinou sheehie, alia südonou E velou hore.’

²¹“Südonou kilai sünanou dakhaive puhvei paopuhi chi sütaosü paongao peire. Sühinou paopu sünanou rarouloua puh kilaihi paoe, ‘Ne thala-a nuhduhi duvatao ea kijüdu taohi taholoua toure hamaitao, shovai maitao, nghicha maitao ea phi chamaitaoye savekhaio.’

²²Süthaisü thala-a kilai sünanou paoe, ‘Paopu, nenou chikha peiyu taosü souchere, ana chua sühisü buh buhie.’

²³Südonou paopu sünanou kilai nahi paoe, ‘Ne nuhfütao duvahi ea ludu taohi taholoua Avei kisü ve phouloure donou maikhe maiye kutailoua panou tavekhaio.

²⁴Daiolouzü Enou neletao hi paowe, raia kukhai touyu maikhe maitao alinoua Avei tovaisü ve chilai moe!’”

²⁵Chuo maikhemai alaosou Jisu ye koa tayu kisü, puhnou reiveloua puletao hi paoe,

²⁶“Maita linou Ahi taveloua lah puhvei puo, pfü, chapfü, nahmaitao, thaihou-jürai, tumaitao, ovai puhlah puh pfüzhoye-a ngaoramo louzü puhsü Arozümai soulou hoe.

²⁷Maita mailia lah puhvei kros pfüloumoa Athai füyu maisü Arozümai soulou hoe.

²⁸“Daiolouzü neletao hrohinou maita linou kishoki sounüa bulouzü, sünasü souche khoulou süyu muh bumosa tea raia puhnou kou buloua thou-shapei cholai mowu?

²⁹Sübümo louzü puhnou kifü sü khochewu-a ki sünasü souchelou holouzü sünaye ngaoyu maikhemai hrülainou puhye hai konü-a,

³⁰‘Mai hainanou kisü soushue, ana souchelou hore!’ tea paolai.

³¹“Moa kakuyu vemainou kukhe vemai aliye reih züre donou tapa laiyu kisü, puh pei hi reih züre donou reihmai thekaiye koa laiyu ve sünaye puhnou puhvei reihmai the kirou sütaonou zülou sülai mosa tea raia kou buloua tsü cholai mowu?

³²Alia puhnou zülou holaina toulouzü, kukhe sünanou doushoa laibu kinou, puhnou puhvei ko paolamaiye seita-a kaonayu vei vo souloure donou panou tave kholai.

³³Südonou, haibüa neletao hrohinou maita linou puhvei buyu teiteisü thaokhaiwu molouzü puhsü Arozümai soulou hoe.

³⁴“Tai hai veishoe; ana tainou khü halouzü kabüa sünaye panou khüh dalou khailai?

³⁵Sünasü dei donoua moa podzükhai touyu mato donoua matsü hare; sünasü maikhe mainou polaiwu baiwe. “Chouloure nou püyu puhye panou chouloukhaio.”