Read Poumei Naga LUK 15 Bible Online

LUK 15 - Poumei Naga bible

LUK 15

¹Teithe ali hisü kikha khamai ea mahmaitao alaosou Jisu chi keire donou puhye tave sühao loure.

²Alia Phariseemai ea razhai dou-apeimai taonou mülealealoua paoe, “Mai hainanou mahmai taoye saloua puletaoye koa toushowe!”

³Südonou Jisu nou puletao hi nada hainasü paopeie:

⁴“Hakinou neletao hrohinou mailivei zhaotu kaihli bulouzü ea sütao hinou ali hawulouzü, puhnou raikükü taoye rekou khobuh hi thaowu-a hawuyu sünaye ngaoloumo koute phoulai mowu?

⁵Alia puhnou sünaye ngaolouyu kisü, sasholoua sünaye sü puh phaovahi popakhailoua

⁶kihi khaive baiwe. Süthaisü puhnou puh samaitaoye ea kinapataoye kuve dzüloua puletao hi paoe, ‘Eye koa sazho peikhaio, daiolouzü hawuyu Avei zhaotu nasü ngaoloure.’

⁷Sübütoua, Enou neletao hi paowe, le daloure matsü hayu cheche maitao raikükü jünou le dalouyu mahmai ali süna donou raki hinou lesa koulai hie.

⁸“Moa hakinou naotumai alinou puhvei shapo kirou buyu hinou ali hawulouzü puhnou meibvü taoloua ea ki vaishee-a süna ngaoloumo koutesü soutaosoua phoulai mowu?

⁹Alia puhnou süna ngaolouyu kisü, puhnou puh samaitao ea kinapa taohi paoe, ‘Eye koa sazho peikhaio, daiolouzü Enou hawuyu shapo nasü ngaoloure.’

¹⁰Sübütoua, Enou neletao hi paowe, le dalouyu mahmai ali donou Ramai vei rakivamaitao nou sashowe.”

¹¹Alia Jisu nou thaomoa paoe, “Teile alihi mai alivei nahpoutumai ahai bue;

¹²alia napuwo nou puhpuohi paoe, ‘Apuo, nevei kina Ahi peire zha taosü peikhaio.’ Südonou mai sünanou puhvei kinataosü puh nahpoutu haihi zhipeire.

¹³Teile phajü thaisü napu sünanou puhvei buyu kini teiteisü podzüloua ea sünasü pfüloua doushoyu teidei alihi veitare, alia sühinou puhnou puhvei kini taosü kao-zümoyu hrü hinou chaochaosoua souha khaire.

¹⁴Alia puhnou puhvei buyu teiteisü souha chewuyu kisü, teidei sühisü ngaopisoua tokaa veloure, alia puhsü toure hare.

¹⁵Südonou puhnou teidei sühimai ali kihinou zho kutoure donou tavere, alia mai sünanou puhye panou vo khore donou puhvei douhi seitare.

¹⁶Alia puhsü vo nou touyu bei-maa to sünanou puhlah touthou puh pouphou soulou nüwe, ana maitalinoua puh hisü toure hatalia peimoe.

¹⁷Ana puhnou tsü chodakhai louyu kisü, puh lahnou haibüa paoe, ‘Apuo hinou zho kutoua buyu mai kazhounou touli-tousho-a busa, ana Ewo buh haihinou khütheawuzhu laire!

¹⁸Enou tashuloua ea Apuohi taveloua puh hi ve paolai, Apuo, Enou Ramai pei hi ea ne nghojünou mah soure.

¹⁹Chuo Eye ne nahpoutu tea kuzüdou khaimore; Eye ne zhokua laiyu kilaitao hrohinou alie tea popeio.’

²⁰Südonou puhnou shuloua puhpuo hilo tavere. “Ana puhnou doushoa tabukinou puh puonou puhye sü zhingaoloure ea puh lesü leshi-zhuvea nou phouloure, alia tuho puhye sü kholoua münou muloure.

²¹Alia nahpoutu sünanou puh hi paoe, ‘Apuo, Enou Ramai pei hi ea ne nghojünou mah soure; chuo Eye ne nahpoutu tea kure züdou khaimore.’

²²Ana puonou puh kilai taoye laloua puletao hi paoe, ‘Avei veilai zaodu nasü thala-a popaloua puhye noupeikhaio; alia puhbah hi bahtoukhali ea puh phihi phikha thoupeio.

²³Süthaisü taloua hrüvei velai chotuo nasü dathealoua povekhaio, alia Eletao tou-shoa nüh nülaikhe;

²⁴daiolouzü Anahpoutu hainasü thailoua hridashu loure ea hawuyu hinou ngaoloure.’ Alia sübüa puletao nou sasho loure.

²⁵“Sükisü puhvei nahpoutu tsünasü rekou dou hinou bue; alia puhnou khaiveloua ki ngheiki veyu kisü, puhnou shabe-toubvü kho ea do souyu paisü chouloure.

²⁶Südonou puhnou kilaitao aliye kuloua süsü dai vanoue tea puh hinou noue.

²⁷Alia kilai sünanou puh hi chila peie, ‘Ne thaihou sü kihi khaivere, alia nepuo nou puhye thaisou daomoa ngaolouyu vanou hrüvei veilai chotuo nasü dapeiwe.’

²⁸“Ana puhsü rarouloua kihi talou bare. Südonou puhpuonou vakouhi tapaloua puhye kihi talou loure kukhai kukhai loure,

²⁹ana puhnou puh puohi chila peie, ‘Zhukhaio, po haizhozhou sü kilai ali büa Enou nevei kuvah soua bue, alia Enou hakia nevei kharochi nasü züba moe; sütoukhaia Eye panou Asamaitaoye koa sazhore donou nghitu ali koutea nenou Ahi peikhai mohie.

³⁰Ana ne nahpoutu hainanou nevei kinisü khakhapfü taoye koa touloua khaiveyu kisü, nenou puhye donou vasou avei veilai chotuo nasü dathea peiwe!’

³¹Sühinou puonou puh hi chila peie, ‘Anahna, newo teisanou Eye koa bue, alia Avei teiteisü neveibaie.

³²Ana Eletao sasa-a nüh nüzüe, daiolouzü ne thaihou hainasü thailoua hridashu loure ea hawuyu hinou ngaoloure.’”