Read Poumei Naga LUK 16 Bible Online

LUK 16 - Poumei Naga bible

LUK 16

¹Jisu nou puh rozümaitaohi-a paoe, “Teile alihi hanimai alivei kini khada-apeio ali bue, alia puhpei hisü hanimai sünavei kinisü kao-zümo hinou soudo laire tea mah dukhai peire.

²Südonou hanio nanou puhye kuloua puh hi paoe, ‘Enou nevanou choua buyu haisü daie? Nenou kini khada-apeio soua buyu vei thou-shapei teiteisü peikhaio, daiolouzü ne sü Avei kini khada-apeiona soupulou hore.’

³Alia kini khada-apeionanou lahnou puh hi paoe, ‘E dai soulai, daiolouzü Avei paopu nou Eye puhvei kini khada-apeio souyu buh hinou popawu laire? Esü dei daotoure khouko hae, alia tosü talai tea ahraoe.

⁴Eye touso khada-apeiona soua buyu buh hinou phawu louzü maikhe mainou Eye puletao kihi panou velou loure do ali chuo Enou süre.’

⁵“Südonou puhnou puh paopuvei pao pfüyu maitao veishiye ali linou kuve loua, puhnou araikhana hi haibüa noue, ‘Ne Apaopuvei pao kazhou pfüwe?’

⁶Puhnou ‘Oliv theadzü bvü kaihli pfüe’ tea chila peie. Sühinou puhnou mai süna hi paoe, ‘Nevei shapei larü hainasü poloua thalasou kou buloua raingou rüthoulou khaio.’

⁷Süthaisü puhnou kukhe alinahi noue, ‘Newo kazhou pfüwe?’ puhnou ‘Southou sülai kaihli pfüe,’ tea chila peie. Puhnou puh hi paoe, ‘Nevei shapei larü hainasü poloua raicha rüthouwuwo.’

⁸“Alia le sheemoyu kini khada-apeio nanou sübüa dokaishoa soulouyu vanou puhvei paopunou puhyesü paosho loure; daiolouzü deiphao hainavei nahmai taonou avavei nahmaitao jünou lah puletao vei maikha khaye koa hrüyuhi dokai veikou hie.

⁹“Alia südonou Enou neletao hi paoe, deiphao vei kini vanou neletao lah neletao vei samai phoulo, sübüa sünasü cheyu kisü puletao nou neletaoye teisa halouho kihi save loulai.

¹⁰Vah atai lihi louchelou veiyu puhye sü vah adu lihia louchelou veilai; alia vah atai lihinou le sheemoyu mai talisü vah adu lihia le sheemoe.

¹¹Südonou neletao nou deiphao vei kini seiyu hinou cheche loumoa bulouzü, thaohnou neletao bah hi cheche kini lüthou peilai?

¹²Alia neletao nou mai kukhe alivei kinihi chechelou molouzü, thaohnou neletao hi lah neletao vei kinisü thoupeilai?

¹³“Kilai talinoua paopu ahaivei kuvah soulou hoe; daiolouzü puhnou aliye ngaoraloua kukhe aliye leshilai, moa puhnou aliye tsükhouloua kukhe aliye ngaophou laimoe. Neletao nou Ramai ea deiphao kini ahaivei kuvah soulouhoe.”

¹⁴Phariseemai taonou chi sütao teitei choulouyu kisü puletao nou Jisu ye konü loure, daiolouzü puletaosü pousha züpae.

¹⁵Ana Jisu nou puletao hi paoe, “Neletaosü maikhemai nghojünou lah cheche khayu maitao baie, ana Ramai nou neletao lesü süwe; daiolouzü maikhemai hrohinou paoshoyu nasü Ramai nghojüwo louzü ngaorayuna baie.

¹⁶“Razhai ea rachi paolamaitao sü Johan teile koute bue; süshonou Ramai Vedei vei avei kosü paodoue, alia maikhemai hrülainou khaotsü tsüpoa sühisü taloue.

¹⁷Ana razhai hinou chah pei hi daopouyu li hatayu jüwo raki ea deiphao hatayu sünanou talahie.

¹⁸“Maita linou chapfüye rawu-a kukhe liye nalouzü puhsü mai chapfüye sapayu mah soure, alia puh chaanou rawuyu naotupai sünaye nayu mai sünasü mai chapfüye sapayu mah soure.

¹⁹“Teile lihi maomüyu sah ea jüyusah nou bah-nouyu ea teisanou touvah-shovah soua hrüyu hanimai ali bue.

²⁰Alia puhvei kijü bomü hisü Lazaras tea kuyu vasou teitei thoteatea-a buyu tosümai ali mainou sühi povepei khaitoua bubue.

²¹Alia puhsü hanimai sünavei arübuh hinou tourai kouyuhai tounüa bue; süthe baimoa seitao-a taveloua puh vasouhi chütaosü lai-a bue.

²²“Süthaisü tosüa laiyu mai sünasü thaitare ea puhye sü rakivamai taonou rakiva Abraham ngheiki hi sakhe peire. Hanimaipou süna-a thaitare ea povure;

²³alia puhnou veasho-a thaimai teidei hinou zhupayu kisü adou kounou Abraham ye puh ngheiki hinou Lazarasye koa buyu ngaoloure.

²⁴Sühinou puhnou paikua laloua paoe, ‘Apuo Abraham, Eye zhuvea peio, alia Lazaras ye puh vei bahtou peinou dzühi thou süchaloua Amalisü panou kou soukao peire donou seikou peikhaio; daiolouzü Esü meikei haihinou choro soua bure.’

²⁵“Ana Abraham nou paoe, ‘Anahna, likhaio, süolouzü nenou hribu kisü ne sü na avei teitei ngaoloure, alia sübüa Lazaras-a ashi teitei ngaoe; ana chuo puhsü haihinou vasho-a bure, alia newo chorosoua bure.

²⁶Alia sütao teitei pei hinou, buh haihinou neletao hilo tachopalai touyu mailia tacholou hore, alia buh sühinou Eletao hi maitalia kachopa louhore, Eletao ea neletao kolehi thoushoyu raobvü ali buloure.’

²⁷Mai sünanou paoe, ‘Sükulouzü Apuo Abraham, Enou nehinou khowe, Lazaras ye Apuo kihi seivepeio,

²⁸daiolouzü Avei thaihou-jüraimai angou bue. Puhye panou tave puletaoye tukha-a doupeikhaio, molouzü puletao-a choroyu buh hainahi veshulai.’

²⁹“Ana Abraham nou paoe, ‘Puletaoye tukha peire donou Moses ea rachi paolamaitao bue; puletaoye panou puletao nou paoyu sü keiloukhaio.’

³⁰Mai sünanou chila peie, ‘Moe, Apuo Abraham! Ana thaimai hrohinou kamainou hrishuloua puletao hi tave louzü, puletaosü veimosoua leda loulai.’

³¹Ana Abraham nou puh hi paoe, ‘Puletao nou Moses ea rachi paolamai taoye keipeimo louzü, thaimai hrohinou kamainou hrishuloukhaia puletaoye paothou louche peilou hoe.’ ”