Read Poumei Naga LUK 17 Bible Online

LUK 17 - Poumei Naga bible

LUK 17

¹Alia Jisu nou puh rozümaitaohi paoe, “Mah hi panou loure athaosü veimosoua velai; ana athao panou veyu puhye donou daizhozhou ngaopisa!

²Puhnou tai-noukayu haitao hrohinou aliye mah hi southou peiyu jüwo mai süna donou puhvei nguhi dushoyu thouveiyu chuhpa alinou phumutei loua zaihi polai thouyu sünanou puhye donou veikou hie.

³Südonou neletao lah neletao nou soua buyu hisü zhutoulo! “Ne thaihou jürai alinou mah soua bulouzü puhye sü tukha-a doupeikhaio, alia puhnou le dalouzü puhye sü khaipeio;

⁴alia puhnou ne pei hi nai teithe hinou lüh anai koute mah souwu louzü, alia nehi khaive lü anai koute, ‘E le daloure,’ tea paolouzü nenou puhye sü khaipei vuzülai.”

⁵Sei-atamaitao nou Mapao hi paoe, “Eletao vei lü soukhou pupeio!”

⁶Alia Mapao nou paoe, “Neletao hi javu thoupfü leli lü bulouzü, neletao nou koulushibe hainahi, ‘Ne maanoupu paipaloua zai hinou lou paopa louwo,’ tea paolouzü sünanou neletao chi zülai.

⁷“Hakinou neletao hrohinou mai alivei kilai ali bua, puhsü dou sha-a moa zhao khoa bulouzü ea puhnou koukhe rekounou kihi khaiveyu kisü puh hi, ‘Ne thalasou toure donou arübuh hi kou buloukhaio’ tea paolaiwu?

⁸Süjüwo puhnou puh hi, ‘Avei koukhe vai soudakhaio; alia nelah sahkhya vealoua Enou touche-shochelou mosa kuvah soukhaio; süthaisü ne tou-sho ta-a bailai,’ tea paolai mowu?

⁹Puhnou kharochi peiyu nasü kilai sünanou züyu donou puhye paoshowu?

¹⁰Sübüa neletao-a neletao hi kharochi peiyu teitei soucheyu kisü, ‘Ehwo züdou moyu kilaitaobaie; Eletao nou soure vah likhei Ehnou soulou baie,’ tea paokhaio.”

¹¹Chuo Jisu nou Jerusalem hi tayu kisü, Samaria ea Galilee deirai kole hinou puhsü tachopoa tae.

¹²Alia puhnou nuh alihi talouyu kisü, puhye sü loukhaora soumai kirounou tave daoloure, alia puletao nou adou konou laloua

¹³ea puletao vei paisü kusholoua paoe, “Jisu! Dou-apeio! Eh ye zhuvea peikhaio!”

¹⁴Jisu nou puletaoye ngaolouyu kisü puletao hi paoe, “Neletao lah taloua napaomai taohi pongaokhaio.” Alia puletao nou luduhi ta-a buyu hinou puletaosü sheeloure.

¹⁵Süthaisü puletao hrohinou aliwo louzü puhvei sou veilouyu sü ngaoloua paikushoa Ramaiye shoa dakhaive-e;

¹⁶alia puhnou kou Jisu phi hinou duloua puh hi kalo paoe. Mai sünasü Samaria tamaie.

¹⁷Sühinou Jisu nou paoe, “Mai kirouye sousheepei mowu? Kukhe mai akütaosü daiki bue?

¹⁸Daiolouzü vakoumai haina likheithe dakhaive Ramaiye kalo paobaiwe?”

¹⁹Alia Jisu nou puh hi paoe, “Shuloua talouwo; nevei lü nanou neye souvei peire.”

²⁰Phariseemai kamaitao nou Ramai Vedeihai duki velaisa tea nouyu donou Jisu nou puletao hi chila peie, “Ramai Vedeihai nghithounou ngaolou veiyu sheenou soungao-a velaimoe;

²¹moa ‘Zhukhaio, haihi bue!’ moa ‘Hohi bue!’ tea paolai moe, daiolouzü Ramai Vedeisü neletao hrohi bue.”

²²Süthaisü puhnou rozümai taohi paoe, “Neletao nou Mai Nahpoutu vei teile li ngaonü shoyu phasü velai, ana neletao nou süsü ngaolai moe.

²³Alia puletao nou neletao hi paolai, ‘Zhukhaio, Puh sühi bue!’ moa ‘Zhukhaio, Puh haihi bue!’ Ana ta-a taso, puletao thai-a füso.

²⁴Daiolouzü teinou peilouzü ratei polova hinou polo vahi vaveyu kua, Mai Nahpoutu-a puhvei teithe kisü sübülai.

²⁵Ana raia puhsü alaosou veasho vuzülai ea maikha hainanou motoulai.

²⁶Alia Noha teilehi payu kua Mai Nahpoutu vei teithekia sükulai.

²⁷Noha nou dzüluki hi talou loumo teithe koute alia puletao hrülaiye dzüdu nanou souhamo koute puletaosü toua, shoa, shee-a ea nghipei-a bue.

²⁸Süsü Lot teilehi payu kulai- puletao nou tou-shoe, puletao nou na hüa-zhoa bue, süübe-poube shoe ea ki soua bue,

²⁹ana Lot nou Sodom hinou tapayu teithe kisü rakinou mei alia meichuh rükou loua puletao hrülaiye souha khaire.

³⁰Mai Nahpoutuye pongaoyu teitheki-a sükulai.

³¹“Teithe sükisü kipei hi buyu puhye panou kikhahi buyu puhvei kinatao pota loure donou panou takouwuso; sükua ludouhi buyu puhye panou hatali donou panou kihi khaivewuso.

³²Lot chapfüye liloukhaio!

³³Maitalinou lah puhvei hrirai khailu lounüa phoulouzü puhnou süsü hawulai, ana maitalinou puhvei hrirai hawulouzü puhnou süsü khailu loulai.

³⁴Enou neletao hi paowe, khei sükisü züh ali hinou mai ahai züa bulai; alinaye potaloulai ea kukhe naye sü thaowulai.

³⁵Naotumai ahai thou vei-a bulai; aliye potaloulai ea kukhe naye sü thaowulai.

³⁶(Mai ahai douhinou vah soua bulai; aliye poloulai ea kukhenaye sü thaowulai.”)

³⁷Alia rozümai taonou puh hi noue, “Kahinou, Mapao?” Jisu nou puletao hi chila peie, “Thai pfüphao buyu buh hisü rasho peikinou vedzüa bulai.”